ថ្មីៗនេះ មានព័ត៌មានដ៏ភ្ញាក់ផ្អើលចេញពីប្រព័ន្ធផ្សព្វផ្សាយមួយ បានបង្ហាញអំពីការរចនារូបរាងចុងក្រោយបំផុតរបស់ស្មាតហ្វូនស៊េរីថ្មី Galaxy S10។ ប្រភពខាងលើនេះ បានទម្លាយថា ស្មាតហ្វូន Galaxy S10 នឹងប្រើប្រាស់នូវអេក្រង់ Infinity Display ទំហំ 5.8" និង 6.3" ដែលធំជាងស្មាតហ្វូន Galaxy S9 និងGalaxy S9+ ដែលមានទំហំត្រឹមតែ 5.77" និង 6.22" ប៉ុណ្ណោះ។ ស្មាតហ្វូននេះមាន ទំហំធំជាង 0.03" និង 0.08" បើធៀបនឹងស្មាតហ្វូនជំនាន់មុននេះ។
សម្រាប់តួខ្លួនរបស់ស្មាតហ្វូននេះ គឺមានការកែសម្រួលតិចតួចប៉ុណ្ណោះ ហើយវាក៏មានការដកចេញនូវប្រព័ន្ធស្កេនក្រយ៉ៅដៃដោយធ្វើការផ្លាស់ប្តូរទៅដាក់នៅក្រោមអេក្រង់វិញ។ ក្រុមហ៊ុន Samsung មានគម្រោងក្នុងការប្រើប្រាស់នូវបច្ចេកវិទ្យាស្កេនក្រយ៉ៅដៃក្រោមអេក្រង់ជាមួយនឹងក្រុមហ៊ុន Qualcomm និង Synaptics នៅក្នុងសហរដ្ឋអាមេរិក ក៏ដូចជាធ្វើការជាមួយនឹងក្រុមហ៊ុន Aegis Tech របស់តៃវ៉ាន់ដែលជាអ្នកផ្គត់ផ្គង់ផងដែរ។
ព័ត៌មានខាងលើបង្ហាញថា Samsung មានការអភិវឌ្ឍន៍ដ៏អស្ចារ្យមួយទៀតនោះ គឺថា ក្រុមហ៊ុន Samsung ប្រហែលជាធ្វើការបន្ថែមនូវមុខងារថ្មីៗ សម្រាប់ស្មាតហ្វូន Galaxy S10 នៅក្នុងខួបលើកទី 10 របស់ស្មាតហ្វូន Galaxy S ហើយក៏មានការភ្ជាប់ជាមួយនឹងមុខងារ 3D Sensing ស្ថិតនៅក្នុងការអភិវឌ្ឍក្នុងភាពជាដៃគូជាមួយនឹងក្រុមហ៊ុន Mantis Vision របស់អ៊ីស្រាអែល នៅក្នុងការអភិវឌ្ឍទៅលើបច្ចេកវិទ្យាកាមេរ៉ានោះថែមទៀតផង៕
