យោងតាមប្រភពឧស្សាហកម្មនៅខាងក្នុងស្រុករបស់ប្រទេសកូរ៉េខាងត្បូង បានបញ្ជាក់កាលពីថ្ងៃទី 16 ខែមេសាកន្លងទៅនេះ បានអោយដឹងថា នៅក្នុងកំឡុងពេលដែលមានជម្លោះពាណិជ្ជកម្មរវាងប្រទេសមហាអំណាចសេដ្ឋិច្ចធំៗពីរនៅលើពិភពលោក ចិន និងអាមេរិក បានធ្វើអោយក្រុមហ៊ុនបច្ចេកវិទ្យាយក្សរបស់កូរ៉េខាងត្បូងៗ ដែលមានដូចជាក្រុមហ៊ុន Samsung និង LG ទំនងជា នឹងបិទចោលនូវរោងចក្រផលិតអេក្រង់ LCD TV របស់ខ្លួននៅក្នុងប្រទេសចិនផងដែរ។
កន្លងមករោងចក្រជាច្រើននៅប្រទេសចិន បានផលិតនូវទូរទស្សន៍អេក្រង់ទំហំ 40-50 អ៊ីង ហើយបាននាំចេញទៅកាន់សហរដ្ឋអាមេរិក។ ក្រុមហ៊ុនទាំងពីរនេះ ត្រូវបានគេបញ្ជាក់ថា អាចនឹងបិទទ្វារដោយសារតែបញ្ហានៃការគៀបសង្កត់ពន្ធទៅលើផលិតផលជាច្រើនរបស់ចិននោះ។ ក្រុមហ៊ុន Samsung បានពន្យល់ថា “នេះគឺជារឿងដែលមិនអាចជៀសផុតបាននោះទេ ចាប់តាំងពី ភាគីទាំងពីរនេះ គ្មានវិធីណាដែលយើងអាចជៀសផុតពីពន្ធ 25% នោះ។”
បុគ្គលិករបស់ក្រុមហ៊ុន LG បានបញ្ជាក់ថា ក្រុមហ៊ុនរបស់ខ្លួន កំពុងតែពិចារណាទៅលើជម្រើសជាច្រើនក្នុងការឆ្លើយតបទៅនឹងបញ្ហាជម្លោះនៃពាណិជ្ជកម្មរបស់ចិន និងសហរដ្ឋអាមេរិកនោះ។ ក្រុមហ៊ុនបច្ចេកវិទ្យាទាំងពីរនេះក៏មានគម្រោងក្នុងការបញ្ឈប់ការផលិតម៉ូដែលទូរទស្សន៍ជាច្រើនសម្រាប់ការនាំចេញទៅកាន់ប្រទេសផ្សេងទៀតផងដែរ។
របាយការណ៍ខាងលើនេះ បានអោយដឹងថា បរិមាណនៃការនាំចេញរួមគ្នារបស់ក្រុមហ៊ុនបច្ចេកវិទ្យាទាំងពីរនេះ ចេញពីប្រទេសចិន ទៅកាន់ទីផ្សាររបស់សហរដ្ឋអាមេរិក មានចំនួនតិចជាង 10% នៃការនាំចេញទូរទស្សន៍ទាំងអស់របស់ខ្លួន។ សម្រាប់ទូរទស្សន៍ជាច្រើនទៀត ត្រូវបានគេផលិត ដើម្បីផ្គត់ផ្គង់ទៅលើទីផ្សារប្រទេសផ្សេងៗក្នុងតំបន់នោះ មានដូចជាម៊ិចស៊ិចកូជាដើម។
គួរបញ្ជាក់ថា កាលពីថ្ងៃទី 3 ខែមីនា កន្លងទៅនេះ រដ្ឋាភិបាលរបស់សហរដ្ឋអាមេរិកសម្រេចចិត្តយកពន្ធ 25% ទៅលើផលិតផលរបស់ចិនចំនួន 1300 ប្រភេទ នៅក្នុងនោះមានដូចជារ៉ូបូត ឧបករណ៍ទូរគមនាគមន៍ ផលិតផលគីមី និងគ្រឿងអេឡិចត្រូនិកជាច្រើនទៀត ដែលជាហេតុធ្វើអោយមានការប៉ះពាល់ទៅលើបណ្តាក្រុមហ៊ុនជាច្រើន ដែលកំពុងតែវិនិយោគនៅក្នុងប្រទេសចិន៕
