ក្រុមហ៊ុន Apple អាចនឹងប្រកាសបង្ហាញនូវទូរស័ព្ទ iPhone X ពណ៌មាសថ្មីនៅក្នុងពេលឆាប់ៗនេះ យោងតាមព័ត៍មានមួយ ដែលចេញផ្សាយដោយ www.ibtimes.com។ នៅក្នុងការដាក់ស្នើររបស់ FCC ដែលបានធ្វើឡើងដោយក្រុមហ៊ុន Apple បានបង្ហើបថា ទូរស័ព្ទ iPhone X នឹងមានផ្នែកខាងក្រោយពណ៌មាសដែលស្រដៀងគ្នាទៅនឹងាំ iPhone 8 និង iPhone 8 Plus ពណ៌មាសផងដែរ។ ថ្មីៗនេះ MacRumors ក៏បានប្រទះឃើញនូវឯកសារជាច្រើនសន្លឹកដែលបញ្ជាក់ថា ក្រុមហ៊ុន Apple ស្នើរទៅកាន់ United States Federal Communications Commission ដែលពាក់ព័ន្ធទៅនឹងកាសស្តាប់របស់ iPhone X ពណ៌មាសនេះ។ ឯកសារជាច្រើនត្រូវដាក់ស្នើរនៅក្នុងខែកញ្ញាកាលពីឆ្នាំ 2017 ហើយក៏មានរូបភាពជាច្រើនសន្លឹករបស់ទូរស័ព្ទ iPhone X ពណ៌មាសផងដែរ។
ផ្អែកទៅលើរូបភាពបែកធ្លាយជាច្រើនសន្លឹកនេះ ប្រហែលជាពណ៌ជម្រើសទី 3 របស់ iPhoneX ហើយពណ៌មាសថ្មីនេះ គឺមានលក្ខណៈស្រដៀងគ្នាទៅនឹងពណ៌មាសរបស់ iPhone 8 និងiPhone 8 Plus។ ក្រុមហ៊ុន Apple ប្រហែលជាមានគម្រោងក្នុងការបញ្ចេញនូវ iPhoneX ចំនួន 3 ពណ៌ ប៉ុន្តែសម្រាប់ពណ៌មាសនេះប្រហែលជាមានបញ្ហាជាច្រើននៅក្នុងការផលិតផងដែរ។ ក្រឡេកទៅមើលផ្នែកខាងក្រោយរបស់ទូរស័ព្ទ iPhoneX នេះវិញ តាមការបញ្ជាក់របស់លោក Ming-Chi Kuo របស់ក្រុមហ៊ុន KGI Securities បានបញ្ជាក់កាលពីខែកញ្ញានៅឆ្នាំមុននេះថា ក្រុមហ៊ុនបច្ចេកវិទ្យានេះ ក៏មានបញ្ហាក្នុងការផលិតទៅលើទូរស័ព្ទ “Blush Gold” iPhone X ។ លោកបញ្ចាក់ថា ពណ៌មាសថ្មីរបស់ iPhoneX នេះ នឹងដាក់លក់នៅក្រោយគេ។
កាលពីខែមុននេះ ប្លុកមួយរបស់ជប៉ុនដែលមានឈ្មោះថា Mac Otakara បានរាយការណ៍ថា ក្រុមហ៊ុន Apple ក៏បានបញ្ចេញនូវពណ៌មាសរបស់ទូរស័ព្ទ iPhone X ហើយការលក់ក៏រំពឹងថា ខ្ពស់ផងដែរ។ ក្រុមហ៊ុន Apple ក៏ត្រៀមប្រកាសបង្ហាញនូវ iPad ដែលមានអេក្រង់ទំហំ 9.7 អ៊ីញដែលទ្រទ្រង់នូវ Apple Pencil ផងដែរ។ គួរបញ្ជាក់ថា ថ្មីៗនេះ ក្រុមហ៊ុន Apple ទើបតែបញ្ចេញនូវ (PRODUCT) RED iPhone 8 និង 8 Plus ផងដែរ។ ប្រសិនបើក្រុមហ៊ុន Apple ពិតជាមានគម្រោងក្នុងការប្រកាសបង្ហាញនូវ iPhone X ពណ៌មាសពិតមែននៅពាក់កណ្តាលឆ្នាំនេះ គឺពិតជាបង្កើននូវប្រាក់ចំណូលកាន់តែច្រើនសម្រាប់ក្រុមហ៊ុន Apple ផងដែរ៕