តាមរយៈវេទិកា និងការផ្សព្វផ្សាយរបស់បណ្តាញសង្គម YouTube ក្រុមហ៊ុនបច្ចេកវិទ្យា OnePlus បានផ្តល់នូវមតិយោបល់ថា ក្រុមហ៊ុនរបស់ខ្លួនតែងតែស្តាប់នូវសំណើរពីសហគមន៍របស់ខ្លួន។ ពេលនេះ ក្រុមហ៊ុនបច្ចេកវិទ្យារបស់ចិននេះ បាននឹងកំពុងតែស្វែងរកនូវគំនិតជាច្រើនបន្ថែមទៀតក្នុងការផ្សព្វផ្សាយទៅលើស្មាតហ្វូនស៊េរីថ្មី OnePlus 6 ដែលនឹងបង្ហាញខ្លួននាពេលខាងមុខនេះ។
OnePlus បានចែករំលែកនូវវីដេអូផ្សព្វផ្សាយមួយ និងស្នើរទៅកាន់អ្នកគាំទ្ររបស់ខ្លួនក្នុងការប្រាប់អំពីអ្វីដែលពួកគេចង់ឃើញ។ ការចែករំលែកគំនិតនៅលើវេទិកានេះ គឺធ្វើឡើងតាមរយៈការបង្ហោះនូវការផ្សព្វផ្សាយនៅលើវីដេអូក្នុង YouTube ឬបណ្តាញសង្គមជាច្រើនទៀតដូចជា Facebook និង Twitter តាមរយៈការប្រើប្រាស់នូវ #NeverSettleFilm hashtag ។
រាល់ពេលដែលក្រុមហ៊ុន OnePlus បានសម្រេចចិត្តក្នុងការបន្ថែមនូវគំនិតជាច្រើនរបស់អ្នកគាំទ្រខ្លួន នឹងបញ្ចេញនូវវីដេអូផ្សព្វផ្សាយផ្លូវការមួយ។ ដូចនេះ វីដេអូខាងលើនេះដែលមានឈ្មោះថា “The Never Settle Film: Version 1” នឹងដាក់បង្ហាញនូវឈ្មោះមនុស្ស ដែលបញ្ចេញនូវគំនិតទាំងនេះ។ សម្រាប់វីដេអូផ្សព្វផ្សាយចុងក្រោយបំផុតរបស់វានឹងចាក់ផ្សាយនៅថ្ងៃសម្ភោធន៍ស្មាតហ្វូន OnePlus 6 ។
របាយការណ៍ថ្មីៗនេះ បានបង្ហាញថា ស្មាតហ្វូនស៊េរីថ្មី OnePlus 6 នឹងប្រើប្រាស់នូវបន្ទះឈីប Snapdragon 845 និងរ៉េមទំហំ 8GB។ ស្មាមតហ្វូននេះ អាចនឹងមានម៉ូដែលភ្ជាប់ជាមួយនឹងរ៉េមទំហំ 6GB ផងដែរ។ ស្មាតហ្វូននេះ នឹងប្រើប្រាស់នូវម៉េមូរីក្នុងម៉ាស៊ីនទំហំ 64GB, 128GB និង 256GB ។ មានពាក្យចចាមអារ៉ាម បានបញ្ជាក់ថា ស្មាតហ្វូននេះ នឹងប្រើប្រាស់នូវបច្ចេកវិទ្យា Dash Charge V2 fast charging ហើយនឹងមានប្រើប្រាស់នូវ Notch នៅលើអេក្រង់ AMOLED ទំហំ 6.28 អ៊ីង ជាមួយនឹងអេក្រង់ធំដល់ទៅ 90% បើធៀបទៅនឹងតួខ្លួន។ Teaser ថ្មីៗនេះ បញ្ជាក់ថា នេះគឺជាស្មាតហ្វូនដំបូងបំផុតរបស់ក្រុមហ៊ុន OnePlus ដែលនឹងប្រើប្រាស់នូវមុខងារការពារការជ្រាបទឹក៕