ក្រុមហ៊ុនផលិតស្មាតហ្វូនរបស់ចិន ZTE ទើបតែបញ្ចេញនូវគំនិតនៃការរចនាទៅលើស្មាតហ្វូនស៊េរីថ្មីរបស់ខ្លួនដែលប្រើប្រាស់នូវ notch ចំនួន 2។ ស្មាតហ្វូននេះ មានឈ្មោះថា ZTE “Iceberg” ប្រើប្រាស់នូវតួខ្លួនពីកញ្ចក់ ហើយនឹងឈ្នះពានរង្វាន់ iF Design Award 2018 ផងដែរ។ តាមរយៈការពណ៌នានៅក្នុងវេបសាយ iF Design Award បានបញ្ជាក់ថា “ស្មាតហ្វូន ZTE Iceberg ប្រើប្រាស់នូវកញ្ចក់ក្នុងការភ្ជាប់ទៅកាន់តួខ្លួនរបស់វា ដែលប្រៀបបីដូចជាទឹកកក។ សម្រាប់គែមទាំង 4 របស់វាពិតជាស្រស់ស្អាតស៊ីគ្នាជាមួយនឹងតួខ្លួនធ្វើពីកញ្ចក់។ វាពិតជាស្រស់ស្អាត និងអស្ចារ្យបំផុត។”
សម្រាប់ Notches ដែលបង្ហាញនៅលើអេក្រង់របស់ស្មាតហ្វូននេះគឺកាន់តែមានការពេញនិយមនេះក៏ដោយសារតែវត្តមានរបស់ទូរស័ព្ទ iPhone X ។ ប៉ុន្តែក្រុមហ៊ុន ZTE ប្រហែលជាសម្រេចចិត្តក្នុងការប្រើប្រាស់នូវ Notch ពីរសម្រាប់គំនិតនៃការរចនានេះ។ វាពិតជាមិនធម្មតានោះទេ។ ការប្រើប្រាស់នូវ Notch ពីរនៅលើអេក្រង់ផ្នែកខាងមុខជាមួយនឹងឧបាល័យរដែលអស្ចារ្យសម្រាប់អ្នកប្រើប្រាស់ក្នុងការស្តាប់តន្ត្រីនៅក្នុងពេលលេងទូរស័ព្ទ ឬការលេងហ្គេមដោយមិនចាំបាច់ដោតកាសស្តាប់នោះ។
សម្រាប់ Notch ដែលនៅលើអេក្រង់នេះគឺប្រើប្រាស់នូវសេនស័រ ខណៈផ្នែកខាងក្រោយរបស់ស្មាតហ្វូន ZTE Iceberg ប្រើប្រាស់នូវប្រព័ន្ធស្កេនក្រយ៉ៅដៃ និងប្រព័ន្ធកាមេរ៉ាភ្លោះនោះ។ វាក៏មានការទ្រទ្រង់នូវបច្ចេកវិទ្យា Wireless Charging ផងដែរ។ ផ្នែកខាងក្រោយរបស់ស្មាតហ្វូននេះប្រើប្រាស់នូវ smart connector សម្រាប់ភ្ជាប់ទៅកាន់ឧបករណ៍អេឡិចត្រូនិកជាច្រើនទៀត។ វា៏អាចប្រើប្រាស់ជាមួយនឹង Moto Mods connector ផងដែរ។ ZTE Iceberg ស្ថិតនៅក្នុងបញ្ជីនៃស្មាតហ្វូនដែលត្រូវការអភិវឌ្ឍរយៈពេល 13 ទៅ 24 ខែ។ វាប្រហែលជាមានគោលដៅក្នុងការដាក់លក់នៅក្នុងតំបន់អាស៊ី អ៊ឺរ៉ុប និងអាមេរិកខាងជើង។ សម្រាប់ “Iceberg” គឺគ្រាន់តែជាឈ្មោះកូដប៉ុណ្ណោះ៕