ស្មាតហ្វូនស៊េរីថ្មី Galaxy S9 និង S9+ ដែលទើបតែបង្ហាញខ្លួន ថ្មីៗនេះ បើគេពិនិត្យមើលទៅលើការរចនារូបរាង និងមុខងារសំខាន់ៗរបស់វានោះគឺមិនមានលក្ខណៈខុសប្លែកគ្នាខ្លាំងពីស្មាតហ្វូន Galaxy S8 និង S8+ នោះទេ។ ដោយការប្រើប្រាស់នូវលក្ខណៈដូចគ្នានេះ មានការប៉ាន់ស្មានថា ក្រុមហ៊ុន Samsung ប្រហែលជាអាចនឹងបញ្ឈប់ការផលិត ឬការជម្រុញការលក់ស្មាតហ្វូនត្រកូល Galaxy S8 series ដើម្បីអោយអតិថិជនក្រឡេកទៅប្រើប្រាស់ស្មាតហ្វូន Galaxy S9 វិញនោះ។
ទោះជាយ៉ាងណាក៏ដោយ ក្រុមហ៊ុន Samsung ប្រហែលជាគិតផ្ទុយពីនេះ គឺជម្រុញទៅលើការលក់ម៉ូដែលមុនៗវិញដោយគ្មានការបារម្ភពីការលក់របស់ខ្លួននោះទេ។ នៅដើមខែនេះ ក្រុមហ៊ុន Samsung នៅក្នុងប្រទេសឥណ្ឌា បានបង្ហាញនូវ ការបញ្ចុះតម្លៃពិសេសសម្រាប់ស្មាតហ្វូន Galaxy S8 និង S8+ ។ មុនពេលដែលមានការបញ្ចុះតម្លៃនេះ ស្មាតហ្វូន Galaxy S8 and S8+ គឺមានតម្លៃខ្ពស់ដដែលបើធៀបទៅនឹងស្មាតហ្វូន Galaxy ស៊េរីថ្មីនេះ។
ដើម្បីបង្កើនការទាក់ទាញសម្រាប់ស្មាតហ្វូនត្រកូល Galaxy S8 នោះ ក្រុមហ៊ុន Samsung ក៏នាំយកនូវពណ៌ថ្មី Burgundy Red Galaxy S8 ទៅកាន់ប្រទេសឥណ្ឌា។ សម្រាប់ពណ៌ថ្មីនេះ គឺអាចរកទិញបាននៅលើទីផ្សារដែលបានជ្រើសរើសប៉ុណ្ណោះនៅលើពិភពលោក ហើយបច្ចុប្បន្ននេះក្រុមហ៊ុន Samsung ផ្តល់នូវពណ៌មួយចំនួនសម្រាប់ស្មាតហ្វូន Galaxy S8 ដូចជា Midnight Black, Maple Gold និង Orchid Gray នៅក្នុងប្រទេសឥណ្ឌា៕