ក្មេងវ័យជំទង់នៅក្នុងសហរដ្ឋអាមេរិកជាមធ្យមបានចាប់ផ្តើមចូលចិត្តប្រើប្រាស់ទូរស័ព្ទ iPhone ជាងពេលមុន។ ការស្ទង់មតិចុងក្រោយមួយដែលធ្វើដោយក្រុមហ៊ុនវិនិយោគ Piper Jaffray បានសួរទៅកាន់ក្មេងជំទង់អាមេរិកចំនួនជាង 6000 នាក់នៅក្នុងរដ្ឋចំនួន 40 អំពីការចូលចិត្តស្មាតហ្វូនរបស់ពួកគេ។ ដែលក្មេងៗជំទង់ទាំងនោះភាគច្រើនមានអាយុជាមធ្យមគឺ 16 ឆ្នាំ។
បើតាមរបាយការណ៍របស់ Piper Jaffray បានបង្ហាញថា ប្រមាណជា 82% នៃមនុស្សវ័យជំទង់បានប្រើប្រាស់ទូរស័ព្ទ iPhone ហើយ 11% ជាហ្វែនរបស់ទូរស័ព្ទ Android ។ តួរលេខទាំងនេះត្រូវបានកត់ត្រាទុកនៅក្នុងត្រីមាសដំបូងនៃឆ្នាំនេះហើយតួលេខនេះបានកើនឡើងជាលំដាប់ក្នុងរយៈពេលប៉ុន្មានឆ្នាំចុងក្រោយនេះជាមួយនឹងតួលេខចុងក្រោយបំផុតដែលមានចំនួនខ្ពស់បំផុតគួរអោយកត់សំគាល់។ ទន្ទឹមនឹងនេះដែរមនុស្សវ័យជំទង់ 84% បាននិយាយថាពួកគេរំពឹងទុកថាអាចនឹងផ្លាស់ប្តូរទូរស័ព្ទរបស់ពួកគេមកប្រើប្រាស់ទូរស័ព្ទ iPhone វិញ។
ដូចនេះតួរលេខដែលបានបង្ហាញមកនេះវាបានបញ្ជាក់យ៉ាងច្បាស់ថាទូរស័ព្ទ Apple iPhone ពិតជាទទួលបានការពេញនិយមខ្លាំងពីសំណាក់សិស្សានុសិស្សវិទ្យាល័យក្នុងសហរដ្ឋអាមេរិកព្រោះថាវាបានបង្ហាញនូវភាពទាន់សម័យ ភាពពេញនិយមដោយបច្ចេកវិទ្យា និងបង្ហាញពីភាពទំនើបស៊ីវីល័យសម្រាប់ពួកគេ។ បន្ថែមពីនេះការស្ទង់មតិក៏បានអោយដឹងផងដែរថាមានយុវវ័យជំទង់របស់អាមេរិកប្រមាណ 15% បានប្រើប្រាស់នាឡិកា Apple Watch ខណៈពេលដែលមានយុវវ័យជំទង់ប្រមាណ 20% មានគម្រោងក្នុងការទិញនាឡិកា Apple Watch មួយគ្រឿងយកមកប្រើប្រាស់ក្នុងរយះពេល 6 ខែ។
សូមបញ្ជាក់ផងដែរថាក្រុមហ៊ុន Apple iPhone ពេលនេះបានកាន់កាប់ចំនែកទីផ្សារស្មាតហ្វូនសរុបក្នុងទឹកដីកំណើតរបស់ខ្លួនគឺសហរដ្ឋអាមេរិកប្រមាណជា 45%៕