ក្រុមហ៊ុនផលិតស្មាតហ្វូនម៉ាកល្បីមួយរបស់ចិន Xiaomi ទើបតែបានប្រកាសចេញកំពូលស្មាតហ្វូនប្រភេទ Gaming Phone ដំបូងគេរបស់ខ្លួនឈ្មោះថា Xiaomi Black Shark Gaming Phoneកាលពីប៉ុន្មានថ្ងៃមុននេះ។ កំពូលស្មាតហ្វូន Gaming នេះទទួលបានការចាប់អារម្មណ៍ខ្លាំងពីសំណាស់នៃអ្នកប្រើប្រាស់ពិសេសអ្នកដែលនិយមការលេងហ្គេមតែម្តង។ បើទោះបីជាក្រុមហ៊ុនមិនទាន់ដាក់ចេញលក់ជាផ្លូវការណ៍ក្តីប៉ុន្តែក្រុមហ៊ុនបានបើកអោយធ្វើការចុះឈ្មោះក្នុងការបញ្ជាទិញសម្រាប់ស្មាតហ្វូនមួយនេះ។ ដោយឡែកកាលពីថ្ងៃម្សិលមិញក្រុមហ៊ុនបានប្រកាសអោយដឹងថាបន្ទាប់ពីការបើកអោយមានការចុះឈ្មោះក្នុងការបញ្ជាទិញដំបូងរហូតមកទល់នឹងពេលនេះ Xiaomi Black Shark Gaming Phone បានទទួលការចុះឈ្មោះពីអតិថិជនប្រមាណជា 1 លាននាក់រួចបាត់ទៅហើយ។
Xiaomi បានប្រកាសបន្ថែមទៀតថាក្រុមហ៊ុននឹងប្រកាសចេញលក់ផ្លូវការណ៍សម្រាប់ Xiaomi Gaming Phone នេះក្នុងពេលឆាប់ៗនេះផងដែរ។ ក្រឡេកមកមើលនៅលើចំនុចដែលទទួលបានការចាប់អារម្មណ៍ខ្លាំងនៅលើ Xiaomi Gaming Phone វិញគឺវាមានការរចនារូបរាងខុសពីបណ្តាស្មាតហ្វូនទាំងឡាយដោយផ្នែកខាងក្រោយរបស់វាត្រូវបានផលិតឡើយយ៉ាងពិសេសពីលោហៈធាតុលាយនឹងជ័រពិសេសមានគែមសងខាងក្តោបរំលេចដោយអក្សរ S មានព័ទ្ធដោយពណ៌ខៀវមើលទៅពិតជាមានអំណាចមែន។ ផ្ទៃខាងមុខរបស់វាក្រាលដោយកញ្ចក់អេក្រង់លាតកម្រិត 18:9 ratio ទំហំ 6.0 អ៊ីងដូចស្មាតហ្វូនដទៃដែរជាមួយកម្រិតបង្ហាញ FullHD+ ប៉ុន្តែវាប្រើបច្ចេកវាអេក្រង់បង្ហាញធម្មតាមិនមែនពពួកកញ្ចក់អេក្រង់ដែលមាន refresh rate 120Hz ដូច Razer Phone ឡើយ ប៉ុន្តែវាបានប្រើប្រាស់បច្ចេកវិទ្យាបង្ហាញពណ៌ DCI-P3 ដែលជួយធ្វើអោយការបង្ហាញចេញមានភាពច្បាស់ល្អ និងជំនួយដល់ការ render ក្រាហ្វិករបស់ហ្គេមបានប្រសើរផងដែរ។
Black Shark ប្រតិបត្តិការលើនៅលើបន្ទះឈីបខ្លាំងចុងក្រោយ Qualcomm Snapdragon 845 Octa-core kryo មានរ៉េមទំហំ 6GB & 8GB, ប្រើក្រាហ្វិកកាតជំនាន់ Adreno 630 និងមានថ្មខ្នាត 4,000mAh កាន់ថាមពលប្រើប្រាស់បានយូរជាមួយមុខងារ Qualcomm Quick Charge 3.0 សាកថាមពលថ្មបានលឿន។ សម្រាប់កាមេរ៉ាវិញក៏នូវតែជាចំនុចដែលអ្នកប្រើប្រាស់ត្រូវការផងដែរដោយនៅលើស្មាតហ្វូន Gaming Phone មួយនេះបំពាក់នូវកាមេរ៉ាក្រោយជាប្រភេទកាមេរ៉ាភ្លោះទំហំ 12MP និង 20MP មានកម្រិតចាប់រូបភាព aperture f/1.8 ដូចគ្នា ព្រមទាំងមានសមត្ថភាពអាចធ្វើការហ្ស៊ូមបែប digital zoom បាន 2x ប្រើប្រាស់មុខងារ dual pixel PDAF និងមានភ្លើងជំនួយពន្លឺមួយគ្រាប់ប្រភេទ dual LED dual tone flash។ រីឯកាមេរ៉ាមុខគឺមានទំហំ 20MP មានកម្រិតចាប់រូបភាព aperture f/2.2។
Xiaomi Black Shark Gaming Phone នឹងចេញលក់ជាផ្លូវការក្នុងតម្លៃចាប់ពី CNY3,000 ប្រមាណ $480 ឬ €385 សម្រាប់ទីផ្សារប្រេទសចិន ដែលតម្លៃនេះគឺធូរថ្លៃច្រើនជាងបើធៀបនឹងកំពូលស្មាតហ្វូនដទៃដែលប្រើប្រាស់បន្ទះឈីប Qualcomm Snapdragon 845 ដូចគ្នាដែលកំពុងមានវត្តមាននៅលើទីផ្សារនាពេលបច្ចុប្បន្ន៕
