យើងបានដឹងព័ត៌មានរួចហើយថាក្រុមហ៊ុន LG ត្រៀមប្រកាសចេញកំពូលស្មាតហ្វូនជំនាន់ថ្មីក្នុងត្រកូល G-Series ម៉ូដែល LG G7 ThinQ ក្នុងពេលឆាប់ៗនេះមានដូចជាម៉ូដែល G7 ThinQ Plus និង V35 ThinQ ជាដើម។ ហើយព័ត៌មានចុងក្រោយដែលយើងទទួលបានគឺស្មាតហ្វូនជំនាន់ថ្មីទាំងអស់នេះនឹងត្រូវប្រកាសចេញផ្លូវការណ៍នៅថ្ងៃទី 03 ខែក្រោយនេះ។ ប៉ុន្តែអ្វីដែលជាល្បើយបន្ថែមដែលបង្កើនការការចាប់អារម្មណ៍កាន់តែខ្លាំងចំពោះក្រុមហ៊ុនបច្ចេកវិទ្យាចម្រុះរបស់កូរ៉េខាងត្បូងមួយនេះក្នុងពេលនេះ គឺការលេចធ្លាយចេញនូវព័ត៌មានថ្មីមួយទៀតពីកំពូលទូរស័ព្ទស្មាតហ្វូនជំនាន់ថ្មីក្នុងត្រកូល V-Series ដែលមានឈ្មោះថា V40។
ព័ត៌មានថ្មីនេះ ត្រូវបានបញ្ចេញដោយគណនីធ្វីស្ទ័រ @evleaks របស់លោក Evan Blass ដែលជាបុគ្គលអ្នកវិភាគដ៏ល្បីល្បាញមួយរូបដែលគ្រប់គ្នាទទួលស្គាល់ថារាល់ព័ត៌មានដែលលោកបញ្ចេញហាក់ច្បាស់ត្រឹមត្រូវស្ទើរតែ 95% ទៅហើយ។ ចំពោះព័ត៌មានដែលលោកបានទម្លាយចេញនៅលើប្លុកធ្វីស្ទ័ររបស់លោកពេលនេះគឺលោកបាននិយាយពីកំពូលស្មាតហ្វូនជំនាន់ថ្មីក្នុងត្រកូល V-Series របស់ LG គឺម៉ូដែល V40 ដែលស្មាតហ្វូនជំនាន់ថ្មីមួយនេះត្រូវបានលោកប្រាប់អោយដឹងថាវានឹងប្រើប្រាស់ឈ្មោះសំគាល់ (Codename) ថា “Storm” ប្រែថា “ព្យុះ”។
ប៉ុន្តែគួរអោយស្តាយដោយលោកមិនបានបញ្ជាក់អ្វីច្រើនឡើយពីទូរស័ព្ទស្មាតហ្វូនជំនាន់ថ្មីមួយនេះ។កំពូលស្មាតហ្វូនត្រកូល V-Series មួយត្រូវបានគេរំពឹងនឹងបង្ហាញខ្លួនផ្លូវការណ៍នៅពេលណាមួយនាឆ្នាំ 2018 នេះបន្ទាប់ពីការបង្ហាញវត្តមានកំពូលស្មាតហ្វូន LG G7 ThinQ៕
