កាលពីប៉ុន្មានសប្តាហ៍មុននេះវាមានព័ត៌មានបែកធ្លាយជាច្រើននិងព័ត៌មានចចាមអារ៉ាមជាច្រើនទៀតអំពីស្មាតហ្វូនស៊េរីថ្មី LG G7 ThinQ ហើយស្មាតហ្វូននេះប្រហែលជាត្រៀមខ្លួននឹងប្រកាសបង្ហាញជាផ្លូវការនៅថ្ងៃទី 2 ខែឧសភាខាងមុខនេះ។ព័ត៌មានចុងក្រោយបំផុតដែលទទួលបាននោះគឺស្មាតហ្វូន LG G7 ThinQ នឹងប្រើប្រាស់នូវប៊ូតុង hardware buttons ដែលដំណើរការជាមួយនឹងប្រព័ន្ធឆ្លាតវៃ Google Assistant បញ្ជាជាសំឡេងបានថែមទៀត។
វាមានន័យថាក្រុមហ៊ុនបច្ចេកវិទ្យា LG ខ្ចីនូវយុទ្ធសាស្រ្តពីក្រុមហ៊ុនបច្ចេកវិទ្យា Samsung ដែលមើលឃើញថាស្មាតហ្វូន Galaxy S8 និង Galaxy S9 ភ្ជាប់ជាមួយនឹងប៊ូតុង Bixby assistant នោះ។សម្រាប់ប៊ូតុង Google Assistant button របស់ស្មាតហ្វូនស៊េរីថ្មី G7 ThinQ ស្ថិតនៅផ្នែកខាងឆ្វេងរបស់ស្មាតហ្វូននេះហើយវាក៏មានភ្ជាប់ជាមួយនឹងប៊ូតុង Power នៅផ្នែកខាងស្តាំនេះបើតាមការបញ្ជាក់របស់ CNET ។វាគឺជាស្មាតហ្វូនដំបូងបំផុតដែលប្រើប្រាស់នូវប៊ូតុងសម្រាប់ការប្រើប្រាស់មុខងារ Google Assistant នោះ។
កាលពីដើមខែនេះក្រុមហ៊ុនបច្ចេកវិទ្យា LG អះអាងថាស្មាតហ្វូន G7 ThinQ គឺជាការវិវត្តន៍នៃស្មាតហ្វូន LG V30SThinQ ដែលជាស្មាតហ្វូនដំបូងបំផុតរបស់ក្រុមហ៊ុន LG ដែលប្រើប្រាស់នូវមុខងារ AI ដែលជាផ្នែកមួយដ៏សំខាន់របស់ស្មាតហ្វូននេះផងដែរ។ក្រុមហ៊ុនបច្ចេកវិទ្យាLG នឹងប្រើប្រាស់នូវប៊ូតុង Google Assistant button គឺជាផ្នែកមួយនៃយុទ្ធសាស្រ្តរបស់ខ្លួនក្នុងការប្រើប្រាស់នូវបច្ចេកវិទ្យា AI សម្រាប់ស្មាតហ្វូន G7 ThinQ ដើម្បីប្រកួតប្រជែងនៅលើទីផ្សារនោះ។
ការបែកធ្លាយកាលពីពេលមុននេះបញ្ជាក់ថាសម្រាប់ G7 ThinQ hardware មានការបង្ហាញអំពីការប្រើប្រាស់ប៊ូតុងចំនួន 2 នៅផ្នែកខាងឆ្វេងរបស់វាដែលប្រហែលជាប៊ូតុងសំឡេងខណៈពេលដែលប្រព័ន្ធស្កេនក្រយ៉ៅដៃស្ថិតនៅផ្នែកខាងក្រោយក្រោមកាមេរ៉ា។ស្មាតហ្វូននេះត្រូវគេរំពឹងថានឹងភ្ជាប់ជាមួយនឹង Notch ដូចគ្នាទៅនឹង iPhone X នៅផ្នែកខាងលើរបស់វាផងដែរ៕