នៅក្នុងរបាយការណ៍ថ្មីៗនេះអះអាងថា ក្រុមហ៊ុនបច្ចេកវិទ្យា LG នឹងប្រកាសបង្ហាញនូវស្មាតហ្វូនស៊េរីថ្មី LG G7 ThinQ នៅដើមខែក្រោយនេះ។ នៅថ្ងៃនេះ ក្រុមហ៊ុននេះនៅទីបំផុតបញ្ជាក់ថា ស្មាតហ្វូននេះនឹងប្រកាសបង្ហាញខ្លួនជាផ្លូវការនៅថ្ងៃទី 2 ខែឧសភា។ អ្នកទម្លាយព័ត៌មានដ៏ល្បីឈ្មោះ Evan Blass ក៏បញ្ចេញនូវរូបភាព Renders របស់ស្មាតហ្វូន G7 ThinQ អំពីការរចនារូបរាងរបស់ស្មាតហ្វូននេះគ្រប់ជ្រុងតែម្តង។
ដូចអ្វីដែលអ្នកឃើញនៅក្នុងរូបភាពខាងលើនេះ ក្រុមហ៊ុនបច្ចេកវិទ្យា LG បញ្ជាក់ថា ខ្លួននឹងធ្វើការប្រកាសបង្ហាញនូវស្មាតហ្វូនស៊េរីថ្មី LG G7 ThinQ នៅថ្ងៃទី 2 ខែឧសភាខាងមុខនេះ។ លក្ខណៈសម្បត្តិរបស់ស្មាតហ្វូននេះ និងការរចនារបស់វាត្រូវបានទម្លាយផងដែរ។ រូបភាពខាងក្រោមនេះគឺចែករំលែកដោយ Blass ដែលបង្ហាញថា ស្មាតហ្វូននេះនឹងមានប្រើប្រាស់នូវ Notch Display ដែលនឹងមានកម្រិតទំហំ screen-to-body ratio កាន់តែធំនោះ។ សម្រាប់ Notch នេះមានកាមេរ៉ាខាងមុខ In-Call Speaker និងសេនស័រ Ambient & Proximity ផងដែរ។ ផ្នែកខាងក្រោមរបស់ស្មាតហ្វូននេះគឺមានគែមក្រាស់ជាងគែមផ្សេងទៀត។
ផ្នែកខាងលើរបស់ស្មាតហ្វូននេះនឹងប្រើប្រាស់នូវស៊ីមមួយ ហើយនៅផ្នែកខាងឆ្វេងរបស់វាគឹមាននភ្ជាប់ជាមួយនឹងប៊ូតុងឡើងសំឡេងចុះ។ វាក៏មាននូវប៊ូតុងសម្រាប់ការប្រើប្រាស់នូវ Google Assistant នៅផ្នែកគែមខាងឆ្វេងផងដែរ។ ស្មាតហ្វូន LG G7 ThinQ មានភ្ជាប់ជាមួយនឹងប៊ូតុង Power Key នៅគែមផ្នែកខាងស្តាំ។ ផ្នែកខាងក្រោមរបស់ស្មាតហ្វូននេះមានភ្ជាប់ជាមួយនឹងរន្ធដោត 3.5mm audio jack, USB-C port និង Speaker ខាងក្រៅផងដែរ។ ផ្នែកខាងក្រោយរបស់ស្មាតហ្វូន G7 ThinQ ប្រើប្រាស់នូវប្រព័ន្ធកាមេរ៉ាភ្លោះបញ្ឈរ ប្រព័ន្ធស្កេនក្រយ៉ៅដៃ និងឡូហ្គោ G7 ThinQ logo ផងដែរ។
នៅក្នុងរបាយការណ៍ថ្មីៗនេះវាមានការទម្លាយថា ស្មាតហ្វូន LG G7 ThinQ នឹងប្រើប្រាស់នូវអេក្រង់ទំហំ 6.1-inch MLCD+ display ដែលមានកម្រិតភាពច្បាស់ QHD+ 1440 x 2880 ភិចសែល។ ស្មាតហ្វូននេះមានបន្ទះឈីប Snapdragon 845 SoC រ៉េមផ្ទុកទិន្នន័យទំហំ 4GB ម៉េមូរីក្នុងម៉ាស៊ីនទំហំ 64GB ថាមពលថ្ម 3,000mAh ហើយវាក៏ប្រើប្រាស់នូវប្រព័ន្ធកាមេរ៉ាភ្លោះទំហំ 16MP និងកាមេរ៉ាខាងមុខទំហំ 8MP ផងដែរ។
នៅថ្ងៃទី 2 ខែឧសភាខាងមុខនេះ ស្មាតហ្វូន LG G7 ThinQ នឹងធ្វើព្រឹត្តិការណ៍មួយនៅក្នុងទីក្រុងញ៉ូវយ៉ក។ នៅថ្ងៃបន្ទាប់នោះ ក្រុមហ៊ុននេះនឹងដំណើរការនូវការលក់របស់ខ្លួននៅក្នុងប្រទេសរបស់ខ្លួនផងដែរ៕