កាលពីថ្មីៗនេះ ក្រុមហ៊ុនបច្ចេកវិទ្យានាំមុខគេក្នុងពិភពលោករបស់ចិន Xiaomi បានធ្វើការប្រកាសចេញទូរស័ព្ទស្មាតហ្វូនស៊េរីថ្មីរបស់ខ្លួនម៉ូដែល Redmi S2 ដែលស្មាតហ្វូននេះផលិតឡើងសម្រាប់បំពេញតម្រូវការអ្នកប្រើប្រាស់ដែលនិយមថតរូបសែលហ្វីតែម្តងដោយសារតែកាមេរ៉ាមុខរបស់វាមានទំហំធំរហូតដល់ទៅ 16MP ប្រើប្រាស់នូវបច្ចេកវិទ្យា pixel binning technology និងបចេ្ចកវិទ្យា AI Beautify ដែលធ្វើអោយការចាប់យករូបភាពមានបានច្បាស់ស្រស់ស្អាតបែបធម្មជាតិពិតៗ។
ជាមួយតម្លៃប្រមាណ 999 រ៉ូពីប្រហែល 160 ដុល្លារឡើងទៅស្មាតហ្វូននេះក៏ត្រូវបានក្រុមហ៊ុនធ្វើការបំពាក់មកនូវប្រព័ន្ធកាមេរ៉ាភ្លោះប្រភេទ AI Dual rear camera នៅកាមេរ៉ាខាងក្រោយដែលមានទំហំ 12MP+5.0MP ថែមទៀតផង។ ហើយកាន់តែពិសេសជាងនេះទៅទៀតនោះ Redmi S2 មានភ្ជាប់នូវប្រព័ន្ធដោះសោរសុវត្ថិភាពដោយប្រើប្រាស់បច្ចេកវិទ្យា AI Face-Unlocking, បច្ចេកវិទ្យាជំនួយការសំឡេង Xiao Ai Voice Assistant និងមានភ្ជាប់នូវមុខងារ IR blaster សម្រាប់ប្រើជំនូសតេលេបញ្ជាគ្រឿងអេឡិចត្រូនិកផងដែរ។
កាមេរ៉ាថតរូបសែលហ្វីបានស្អាតបំផុត
ជាមួយកាមេរ៉ាខាងមុខទំហំ 16MP របស់ Xiaomi Redmi S2 មានសមត្ថភាពខ្ពស់អាចផលិតសាច់រូបភាពបានច្បាស់ទាំងនៅទីតាំងមានពន្លឺគ្រប់គ្រាន់ និងទីតាំងខ្សោយពន្លឺជាមួយទំហំរីសូលូហ្ស៊ីនរូបភាពធំបំផុតមួយ។ នៅពេលថតនៅទីតាំងខ្សោយពន្លឺសែនស័រកាមេរ៉ារបស់វាប្រើប្រាស់បច្ចេកវិទ្យា pixel binning technology ដោយធ្វើការរួមគ្នាទៅលើស្រទាប់ភិចសែលចំនួនបួនរបស់កាមេរ៉ាក្នុងការផលិតចេញនូវផ្ទាំងរូបភាពដ៏ធំមួយក្នុងកម្រិត 2.0µm pixel ដែលធ្វើអោយផ្ទៃរូបភាពទទួលបានពន្លឺច្បាស់គ្រប់គ្រាន់ និងមានចំនុចអ៊ុចៗតិចបំផុត។
ហើយនៅពេលបើកដំណើរការមុខងារ auto HDR ពេលនោះកាមេរ៉ា 16MP របស់វានឹងធ្វើការគណនាកម្រិតពន្លឺទៅតាមមជ្ឍដ្ឋានខាងក្រៅដោយស្វ័យប្រវត្តិដើម្បីផ្តល់អោយទៅមុខងារ HDR effect ធ្វើអោយរូបភាពទទួលបានពន្លឺគ្រប់គ្រាន់ និងមានលក្ខណះច្បាស់បែបធម្មជាតិ។ បន្ថែមពីនេះវាក៏ភ្ជាប់នូវមុខងារ Portrait mode ក្នុងការផលិតរូបភាពព្រាលផ្ទៃផងដែរដោយប្រើប្រាស់មុខងារ AI Bokeh ដែលមានសមត្ថភាពកាត់ត្រេនៃរូបវត្ថុ ពិសេសទម្រង់មុខ និងសក់បានដាច់ស្អាតផុសអណ្តែតគួរជាទីពេញចិត្ត។
កាមេរ៉ាភ្លោះនៅខាងក្រោយថតរូបច្បាស់ទាំងថ្ងៃទាំងយប់ជាមួយបច្ចេកវិទ្យា AI Dual Camera
សម្រាប់កាមេរ៉ាក្រោយរបស់ស្មាតហ្វូនតម្លៃខ្ទង់ 160 ដុល្លាររបស់ Xiaomi មួយនេះក៏ធ្វើការមិនអន់ចាញ់ស្មាតហ្វូនធន់កណ្តាលដទៃទៀតដែរ។ កាមេរ៉ាធំរបស់វាមានទំហំ 12MP អាចផលិតសាច់រូបភាពបានក្នុងកម្រិត 1.25 µm pixel ដោយប្រើប្រាស់ aperture f/2.0 មានសមត្ថភាពផលិតរូបភាពបានច្បាស់គួរជាទីពេញចិត្តទោះនៅកន្លែងមានពន្លឺទាបក្តី និងកាមេរ៉ាទីពីររបស់វាមានទំហំ 5.0MP សម្រាប់ថតរូបព្រាលផ្ទៃដោយប្រើប្រាស់មុខងារ Bokeh Effect។
ជាមួយ Portrait Mode ទាំងកាមេរ៉ាមុខ និងកាមេរ៉ាភ្លោះទាំងពីរគ្រាប់របស់ Redmi S2 សុទ្ធតែទ្រទ្រង់នូវមុខងារ AI Beautify ដូចគ្នាដែលធ្វើអោយការផលិតសាច់ផ្ទៃមុខរបស់យើងបានស្រស់ស្អាតបែបធម្មជាតិពិតៗមិនធ្វើអោយអោយផ្ទៃមុខស្លេកខ្លាំងមិនលើសពីទម្រង់ធម្មតាឡើយ។ និយាយរួមគឺបានស្អាតដូចការ Make Up អីចឹង។
បច្ចេកវិទ្យាអេក្រង់លាតទំហំ 5.99 អ៊ីងកម្រិត ratio 18:9
Xiaomi Redmi S2 ប្រើប្រាស់បន្ទះអេក្រង់លាតទំហំ 5.99 អ៊ីង Full Screen ជាមួយកម្រិត aspect ratio អេក្រង់ 18:9 ទ្រទ្រង់ការបង្ហាញកម្រិត HD+ ទំហំ 720 x 1440px និងមានកម្រិតដង់ស៊ីតេភាពច្បាស់ 269ppi។ ស្មាតហ្វូននេះមិនបានចូលក្នុងសម្ព័ន្ធបក្សឆកថ្ងាសលើអេក្រង់ដូចគេឡើយ។ សម្រាប់ការរចនារូបភាពផ្ទៃខាងក្រោយវិញគឺមានសណ្ឋានមូលក្តោបគែមផ្តល់ភាពងាយស្រួលក្នុងការកាន់ប្រើដោយដៃម្ខាង និងរំលេចដោយខ្សែកោងរាងអក្សរ “U” ពីរខ្សែជាប់គែមលើក្រោម។
កំលាំងម៉ាស៊ីន និងប្រព័ន្ធប្រតិបត្តិការ
ស្មាតហ្វូននេះប្រើប្រាស់បន្ទះឈីប Qualcomm Snapdragon 625 platform ខ្នាត 14nm ដែលមានស៊ីភីយូកម្រិត octa-core cortex-A53 ល្បឿន 2.0 GHz និងប្រើឈីបក្រាហ្វិចពពួក Adreno 506 ជាមួយមុខងារសន្សំសំចៃថាមពលថ្មបានយ៉ាងប្រសើរ។ វាមានពីរម៉ូដែលគឺម៉ូដែលប្រើរ៉េមទំហំ 3GB ជាមួយអង្គផ្ទុកទិន្នន័យ 32GB និងម៉ូដែលប្រើរ៉េមទំហំ 4GB ជាមួយអង្គផ្ទុកទិន្នន័យ 64GB។
Redmi S2 ប្រើប្រាស់ទ្រនាប់ស៊ីមកាតប្រភេទ Triple Slot ដែលអាចដាក់បានស៊ីមកាតពីរប្រព័ន្ធ និងមេម៉ូរីកាតមួយព្រមគ្នាតែម្តងដោយមិនចាំបាច់ត្រូវបោះបង់ស៊ីមទីពីរដូចស្មាតហ្វូនមួយចំនួនឡើង។ ហើយយើងក៏អាចដាក់ម៉េមូរីបន្ថែមបានដល់ទំហំ 256GB ផងដែរ។ ស្មាតហ្វូននេះដំណើរការដោយ Android 8.1 Oreo និងស្រោបដោយផ្ទៃ MIUI9.5។ ជាមួយថ្មកំលំាង 3080mAh ប្រភេទ Li-Po របស់វាអាចអោយយើងប្រើប្រាស់មុខងារទូទៅបានជិតមួយថ្ងៃដែរ ប៉ុន្តែវាមិនមានមុខងារសាកថ្មល្បឿនលឿនមកជាមួយនោះទេ។
តម្លៃ និងកាលបរិច្ឆេទចេញលក់
Xiaomi Redmi S2 នឹងត្រូវចេញលក់ផ្លូវការណ៍នៅទីផ្សារប្រទេសចិននៅថ្ងៃទី 17 ខែឧសភានេះ ជាមួយជម្រើសបីពណ៌គឺទឹកមាស (Gold), ផ្កាឈូក (Rose Gold), និងប្រផេះ (Dark Gray)។ ចំពោះតម្លៃគឺប្រហែល 160 ដុល្លារសម្រាប់ម៉ូដែល 3G RAM /32GB Storage និងប្រហែល 205 ដុល្លារសម្រាប់ម៉ូដែល 4GB RAM/64GB Storage។ ហើយសម្រាប់ទីផ្សារក្រៅពីប្រទេសចិន Xiaomi មិនទាន់កំនត់ពេលវេលាក្នុងការនាំចេញទៅលក់នៅឡើយទេតែអាចធ្វើឡើងជាបន្តបន្ទាប់ក្រោយចេញលក់ក្នុងប្រទេសចិន៕