ឆ្នាំនេះ ពិតជាអស្ចារ្យមែនទែន សម្រាប់ក្រុមហ៊ុន Xiaomi ដែលបានក្លាយជាក្រុមហ៊ុនផលិតស្មាតហ្វូនធំបំផុតលំដាប់ទី 2 នៅក្នុងប្រទេសឥណ្ឌូនេស៊ី បន្ទាប់ពីក្រុមហ៊ុនយក្សមួយនេះ ទើបតែទទួលបានចំណាត់ថ្នាក់លេខ 4 លំដាប់ពិភពលោក ដែលបានផលិតទូរស័ព្ទស្មាតហ្វូនល្អបំផុត។ ទន្ទឹមនឹងនេះ យើងសង្កេតឃើញថា ក្រុមហ៊ុន Xiaomi ត្រូវបានធ្វើការពង្រីកការចែកចាយឥតឈប់ឈរនៅទូរទាំងពិភពលោក ហើយក្រុមហ៊ុនយក្សរបស់ចិនមួយនេះ បាននឹងកំពុងតែវាយលុកនៅលើទីផ្សារ ដោយបានបំបែកកំណត់ត្រានៃការលក់ទូទាំងពិភពលោក នឹងហាក់កំពុងតែប្រជែងតំណែងជាមួយក្រុមហ៊ុនយក្ស Samsung និង Apple ផងដែរ។
គួរបញ្ជាក់ថា ថ្មីៗនេះ អនុប្រធានជាន់ខ្ពស់ លោក Wang Xiang ទើបតែបានចេញផ្សាយរបាយការណ៍មួយរបស់ផ្តល់ដោយគេហទំព័រ Canalys ដែលបង្ហាញពីជំហរទីពីររបស់ក្រុមហ៊ុន នៅក្នុងចំណាត់ថ្នាក់ ដែលមានចំនួន 18,3 ភាគរយ នៃភាគហ៊ុននៅក្នុងត្រីមាសទី1 ឆ្នាំ 2018 គិតចាប់ពីខែមករាដល់ខែមីនា ។ ហើយក្នុងរយៈពេលចុងក្រោយនេះ មានតែក្រុមហ៊ុន Samsung តែមួយគត់ ដែលបាននាំចេញស្មាតហ្វូនច្រើនជាងក្រុមហ៊ុនបច្ចេកវិទ្យាយក្សរបស់ប្រទេសចិនមួយនេះ នៅក្នុងប្រទេសឥណ្ឌូនេស៊ីដែលមានចំណែក 25,5 ភាគរយ។ ក្រុមហ៊ុន Samsung បានលក់ចេញសរុបចំនួន 2.3 លានគ្រឿង ស្របពេល ដែលក្រុមហ៊ុន Xiaomi មានចំនួន 1.7 លានគ្រឿង។
ក្រុមហ៊ុន Xiaomi បានចុះបញ្ជីនូវកំណើន 1455% ក្នុងមួយឆ្នាំ ធៀបនឹងរយៈពេលដូចគ្នា កាលពីឆ្នាំមុន ក្រុមហ៊ុន Xiaomi បានលក់ដាច់ស្មាតហ្វូនត្រឹមតែ 107.000 គ្រឿងប៉ុណ្ណោះ នៅក្នុងប្រទេសឥណ្ឌូនេស៊ី ដែលនេះគឺពិតជាផ្នែកមួយ នៃការរីកចម្រើនមិនគួរឱ្យជឿ ដែលមិនធ្លាប់មាននៅលើទីផ្សារស្មាតហ្វូន។ ចំណែកចំណាត់ថ្នាក់ទី 3 នៃការកំណត់ចំណាត់ថ្នាក់ គឺមាន OPPO ជាមួយនឹងការលក់ដាច់ 1,5 លានគ្រឿង ដូចគ្នានឹងត្រីមាសទី1 ឆ្នាំ 2017 និងមានចំណែកទីផ្សារ 16,8% ស្របពេលដែលចំណាត់ថា្នក់ទី 4 គឺបានទៅលើក្រុមហ៊ុន Vivo ជាមួយនឹងចំណែកទីផ្សារ 6,5% និងស្មាតហ្វូន 600,000 គ្រឿង ត្រូវបានលក់ចេញ។
អ្នកជំនាញបានបញ្ជាក់ថា ក្រុមហុន Xiaomi បានប្រើពេលត្រឹមតែមួយឆ្នាំប៉ុណ្ណោះ ដើម្បីទទួលបានចំណាត់ថ្នាក់ខ្ពស់ជាងក្រុមហ៊ុន Oppo និង Vivo នៅក្នុងប្រទេសឥណ្ឌូនេស៊ី៕
