ក្រុមហ៊ុន Huawei ទើបតែបានបង្ហាញនូវស្មាតហ្វូនស៊េរីថ្មីដ៏ល្អបំផុតរបស់ខ្លួនម៉ូដែល P20, Mate 20 Pro និង Mate RS Porsche Design នៅក្នុងខែមីនាកន្លងទៅ ស្របពេលដែលស្មាតហ្វូន P20 និង P20 Pro មានការប្រើប្រាស់នូវ Notch ហើយស្មាតហ្វូន Mate RS គឺមិនមានភ្ជាប់ជាមួយនឹង Notch នោះទេ។ នាយកប្រតិបត្តិរបស់ស្មាតហ្វូន Porsche Design ពេលនេះ បានទម្លាយចេញនូវហេតុផលទៅលើការផ្លាស់ប្តូរនៅលើស្មាតហ្វូន Porsche Design Mate RS នេះហើយ។
ថ្លែងប្រាប់ទៅកាន់សារព័ត៌មាន Digital Trends កាលពីពេលថ្មីៗនេះ លោក Christian Schwamkrug ដែលជាប្រធានផ្នែករចនាម៉ូដ នៃស្មាតហ្វូននេះ បានមានប្រសាសន៍ថា ការមិនប្រើប្រាស់នូវ Notch នៅលើស្មាតហ្វូន Porsche Design នេះ គឺខ្លាចប៉ះពាល់ទៅលើការរចនានៃអេក្រង់របស់ស្មាតហ្វូននេះ ពិព្រោះថា វានឹងអាចធ្វើអោយការបង្ហាញនូវរូបភាពមិនពេញលេញ។ ហើយការបង្ហាញព័ត៌មាននេះ គឹត្រូវបានធ្វើការវាស់ស្ទង់ទៅលើអ្នកប្រើប្រាស់ជាច្រើននាក់ ដោយគ្រប់គ្នា បានបញ្ជាក់ថា ការប្រើប្រាស់នូវ Notch នេះ គឺនឹងមានការប៉ះពាល់ទៅដល់អេក្រង់ នៅពេលដែលអ្នកប្រើប្រាស់កំពុងតែធ្វើការទស្សនាវីដេអូ ឬការលេងហ្គេមជាដើម។ ស្មាតហ្វូន Mate RS Porsche Design នឹងដាក់លក់នៅក្នុងតម្លៃ €2095 (~$2599) សម្រាប់ម៉ូដែល 512GB ស្របពេលដែលស្មាតហ្វូនទំហំ 256GB មានតម្លៃ €1,695 (~$2,103) នោះ៕