គំរូផលិតស្មាតហ្វូន APEX របស់ក្រុមហ៊ុន vivo ដែលក្រុមហ៊ុនបានប្រកាសនាពេលកន្លងមកឥលូវនេះ គឺបានក្លាយជាការពិតហើយ ដោយពេលនេះក្រុមហ៊ុនចិមួយនេះបានធ្វើការប្រកាសចេញនូវស្មាតហ្វូនដែលស្ថិតក្នុងគំរូនេះជាផ្លូវការណ៍ហើយដែលមានម៉ូដែល vivo NEX S ជាកំពូលស្មាតហ្វូនកំលាំងខ្លាំង និង NEX A ជាស្មាតហ្វូនធុនមធ្យម។ ដូច្នេះ ចង់ដឹងថាកំពូលស្មាតហ្វូន vivo NEX S មានចំនុចប្លែក ខ្លាំង និងទំនើបអ្វីខ្លះ? ខាងក្រោមនេះក្រុមការងារយើងនឹងលើយកចំនុចពិសេសមួយចំនួនរបស់វាមកបង្ហាញជូន៖
រូបរាង និងការរចនាដ៏ប្រណិតជាមួយកញ្ចក់អេក្រង់លាតពេញផ្ទៃខាងមុខតែម្តង
តួរខ្លួនរបស់ vivo NEX S ត្រូវបានបង្គុំឡើងដោយលោហះធាតុ និងកញ្ចក់ហើយផ្ទៃខាងក្រោយរបស់វាមានស្នាមក្រឡាល្អិតតូចៗបង្កប់នៅក្រោមកញ្ចក់។ ស្មាតហ្វូននេះមានទំហំវិមាត្ររួម 162x77x8 មីលីម៉ែត្រ និងទំងន់ 199 ក្រាម។ ផ្ទៃខាងមុខរបស់វាត្រូវបានក្រាលពេញដោយកញ្ចក់អេក្រង់លាតទំហំធំដល់ទៅ 6.59 អ៊ីងឯណោះប្រភេទកញ្ចក់ Super AMOLED Display ដែលមានវិមាត្រ 19.3:9 ratio ជាមួយកម្រិតដង់ស៊ីតេភាពម៉ដ្ឋ 388ppi និងទ្រទ្រង់ការបង្ហាញចេញក្នុងកម្រិត Full-HD+ ទំហំ 2316 x 1080 ភិចសែលនៅលើផ្ទៃកញ្ចក់បង្ហាញសរុប 91.24%។
ហើយល្អម្យ៉ាងដែរដោយកញ្ចក់អេក្រង់របស់វាមិនមែនជាអេក្រង់មានឆក (notch) ដូច្នេះលោកអ្នកអាចធ្វើការទស្សនាវីដេអូ និងលេងហ្គេមបានច្បាស់ពេញផ្ទៃអេក្រង់តែម្តង។ vivo ហៅអេក្រង់របស់ NEX S ថា Ultra FullView Display ព្រោះថាវាមានសមត្ថភាពខ្ពស់ក្នុងការបង្ហាញចេញផ្ទាំងរូបភាពបានក្នុងទំហំធំទូលាយពេញផ្នែក និងមានពណ៌ច្បាស់ដិតល្អបំផុត។ ស្មាតហ្វូនមួយនេះប្រើប្រាស់បច្ចេកវិទ្យាសំគាល់ក្រយ៉ៅម្រាមដៃបង្កប់ក្រោមកញ្ចក់អេក្រង់ (In-Display Sensor) ដូចម៉ូដែល X21 UD ដែរ។ NEX S មិនមានឧប៉ាល័រសម្រាប់ស្តាប់ការសន្ទនាទេគឺវាប្រើប្រាស់រលកសំឡេងចេញពីតួរខ្លួន vibrating screen តែម្តងដូចស្មាតហ្វូន Xioami Mi Mix ដែរ ដោយ ViVo បានបញ្ជាក់ថារលកសំឡេងនេះប្រើប្រាស់នូវបច្ចេកវិទ្យា Screen SoundCasting Technology ដែលធ្វើអោយរលកសំឡេងរបស់វាលឺច្បាស់ល្អផងដែរ។
ម្យ៉ាងទៀតសម្រាប់កាមេរ៉ាមុខវិញត្រូវបានបង្កប់ចូលក្នុងតួរគែមខាងលើរបស់វាតែម្តងហៅថា Elevating Camera ដែលវាលេនចេញ-ចូលនៅពេលបើក-បិទដំណើរការកាមេរ៉ាសែលហ្វី។ នៅខាងក្រោមមានរន្ធដោត USB-C ឧប៉ាល័របំពងសំឡេង និងរន្ធស៊កបញ្ចូលទ្រនាប់ស៊ីមកាត, រន្ធដោតកាសខ្នាត 3.5mm ស្ថិតនៅខាងលើ, ចំហៀងខាងស្តាំមានប៊ូតុងសំឡេង និងប៊ូតុងចាក់សោរ រីនៅខាងឆ្វេងមានប៊ូតុងបញ្ជាមុខងារជំនួយការសំឡេង (Jovi digital assistant) ដែលវាដំណើរការស្រដៀង Bixby របស់ Samsung ដែរ។
ប្រព័ន្ធកាមេរ៉ាភ្លោះមានភ្ជាប់នូវមុខងារថតរូបឆ្លាតវៃ AI ទៀត
កាមេរ៉ាខាងក្រោយរបស់ ViVo NEX S ជាប្រភេទកាមេរ៉ាភ្លោះដាំបញ្ឈរក្បែរគែមខាងឆ្វេងឈៀងខាងលើ។ កាមេរ៉ារបស់វាមួយគ្រាប់ប្រើប្រាស់កែវលែនដែលមាន សែនស័រទំហំ 12MP ជាមួយ aperture f/1.8 និងមួយគ្រាប់ទៀតប្រើប្រាស់កែវលែនដែលមានសែនស័រទំហំ 5.0MP ជាមួយ aperture f/2.4។ កាមេរ៉ាភ្លោះរបស់វាភ្ជាប់នូវបច្ចេកវិទ្យាទប់លំនឹង OIS និងមុខងារ Dual Pixel AF ថែមទៀតផង។ សម្រាប់កាមេរ៉ាមុខវិញគឺមានទំហំ 8.0MP មាន aperture f/2.0 ជាប្រភេទលែនកាមេរ៉ា motorized popup platform ដែលបង្កប់ចូលក្នុងតួរនៅគែមខាងលើដោយវានឹងលេនចេញនៅពេលដំណើរកាមេរ៉ាថតសែលហ្វី។
កំលាំងម៉ាស៊ីនស្ថិតក្នុងលំដាប់កំពូលស្មាតហ្វូន
vivo NEX S គឺជាកំពូលស្មាតហ្វូនជំនាន់ថ្មីចុងក្រោយរបស់ vivo ដែលបំពាក់នូវបន្ទះឈីបដ៏ខ្លាំងរបស់ Qualcomm គឺ Snapdragon 845។ កំលាំងម៉ាស៊ីនរបស់វារត់បានក្នុងកម្រិត 8-core ដោយ 4-core មានកំលាំងល្បឿន 2.8GHz Kryo Gold និង 4-core ទៀតមានកំលាំងល្បឿន 1.7GHz Kryo Silver។ កំលាំងម៉ាស៊ីនរបស់ វាអមល្បឿនដោយរ៉េមទំហំធំដល់ទៅ 8GB និងឈីបក្រាហ្វិចស៊េរី Adreno 630។ NEX S មានទំហំម៉េមូរីផ្ទុកក្នុងម៉ាស៊ីនពីរជម្រើសគឺទំហំ 128GB និង 256GB។ សម្រាប់ប្រព័ន្ធប្រតិបត្តិការវិញគឺវាបានដំឡើងមកជាមួយ Funtouch OS4.0 ដែលទ្រទ្រង់ដោយ Android Oreo ចេញពីប្រអប់។
កំលាំងថ្មខ្លាំងសមនឹងតួរខ្លួន
ជាមួយតួរខ្លួនដែលក្រាលដោយកញ្ចក់អេក្រង់ធំទូលាយស្មាតហ្វូននេះក៏ត្រូវបាន vivo បុកបញ្ចូលថ្មប្រភេទ Li-Ion ដែលមានកំលាំងផ្ទុកថាមពលធំដល់ទៅ 4,000 មីលីអំពែម៉ោងដែលធ្វើអោយការប្រើប្រាស់កាន់បានយូរ និងជាពិសេសថ្មរបស់វាក៏ទ្រទ្រង់នូវបច្ចេកវិទ្យាសាកថាមពលល្បឿនលឿន Fast Battery Charge កំលាំង 22.5V ថែមទៀតផង។
កាលបរិច្ឆេទចេញលក់ និងតម្លៃ
vivo បានដាក់អោយធ្វើការបញ្ជាទិញមុនបានសម្រាប់ស្មាតហ្វូន vivo NEX S នេះចាប់ពីថ្ងៃទី 13 ខែមិថុនានេះទៅ ហើយស្មាតហ្វូនមួយនេះនឹងអាចរកជាវបានតាមបណ្តាហាងលក់នៅថ្ងៃទី 23 ខែមិថុនានេះផងដែរសម្រាប់ទីផ្សារប្រទេសចិន ប៉ុន្តែក្រុមហ៊ុនមិនបានបង្ហើបពីលទ្ធភាពដែលស្មាតហ្វូននេះនឹងចេញវាយលុក លើទីផ្សារសលកនៅឡើយទេ។ ចំពោះតម្លៃរបស់វាគឺម៉ូដែល 128GB មានតម្លៃប្រមាណ CNY 4,498 ប្រហែល $702 និងម៉ូដែល 256GB មានតម្លៃប្រមាណ CNY 4,998 ប្រហែល $780។