ក្រុមហ៊ុន LG ទើបតែបានប្រកាសចេញនូវស្មាតហ្វូនធុនមធ្យមស៊េរីថ្មីមួយស៊េរីនៅក្នុងទីផ្សារសហរដ្ឋអាមេរិកម៉ូដែល LG Stylo 4។ ស្មាតហ្វូនស៊េរីថ្មីមួយនេះត្រូវបាន LG ធ្វើការកែលម្អរូបរាងថ្មីខុសពីស៊េរី Stylo 3 ដែលចេញកាលពីឆ្នាំទៅ។ ម៉ូដែល Stylo 4 នេះ ត្រូវបានក្រុមហ៊ុនបំពាក់ នូវកញ្ចក់អេក្រង់ IPS LCD ធំទូលាយទំហំ 6.2 អ៊ីងជាប្រភេទអេក្រង់លាតគែមខ្លីខ្នាត 18:9 aspect ratio និងអាចទ្រទ្រង់ការបង្ហាញចេញកម្រិត Full-HD+ ទំហំ1080x2160 ភិចសែល។
ស្មាតហ្វូន ថ្មីនេះបំពាក់នូវកំលាំងម៉ាស៊ីនខ្លាំងជាងជំនាន់មុនបន្តិចដោយវាប្រតិបត្តិការលើបន្ទះឈីប Qualcomm Snapdragon 450 កម្រិត octa-core processor មានល្បឿនគណនា 1.8GHz ជាមួយរ៉េមទំហំ 2GB និងអង្គផ្ទុកទិន្នន័យស្រាប់ក្នុងម៉ាស៊ីនទំហំ 32GB ហើយក៏អាចបង្កើនទំហំផ្ទុកបានផងដែរជាមួយម៉េមូរី microSD។ Stylo 4 មានកាមេរ៉ាក្រោយមួយគ្រាប់ជា AI Camera ទំហំ 13MP ប្រើប្រាស់កញ្ចក់លែនកាមេរ៉ាប្រភេទ QLens មាន aperture f/2.4 អមដោយអំពូលភ្លើងជំនូយពន្លឺមួយគ្រាប់ប្រភេទ autofocus LED flash និងអាចផលិតរូបភាពបែបព្រាលផ្ទៃ (Portrait) បានដូចស្មាតហ្វូនកាមេរ៉ាភ្លោះផងដែរដោយប្រើបច្ចេកវិទ្យា AI។ រីឯកាមេរ៉ាមុខសម្រាប់ថតសែលហ្វីគឺមានទំហំ 5.0MP។
ចំពោះប្រតិបត្តិការវិញ LG Stylo 4 ត្រូវបានដំឡើងមកស្រាប់ជាមួយ Android 8.1 Oreo ចេញពីប្រអប់ និងមានភ្ជាប់នូវកម្មវិធីប្រើប្រាស់ថ្មីៗយ៉ាងច្រើនផងដែរដូចជា មុខងារ Screen Off Memo ដែលអាចអោយយើងធ្វើការសរសេរគូសវាស់កំនត់ចំណាំផ្សេងៗលើផ្ទៃអេក្រង់ជាមួយប៊ិច Stylus Pen ពេលអេក្រង់បិទដូច Galaxy Note 8 ដែរ, GIF Capture ថតវីដេអូខ្លីរួចបំលែងទៅជាវីដេអូ GIF, QSlide Function អនុញ្ញាតិអោយយើងធ្វើការបែបចែកអេក្រង់របស់វាជាពីរសម្រាប់ការកម្សាន្តផ្សេងគ្នាក្នុងពេលដំណាលគ្នា, Knock On គោះលើផ្ទៃអេក្រង់ដើម្បីបិទ-បើកពន្លឺអេក្រង់, មុខងារចែករំលែកតាមរយះបច្ចេកវិទ្យា NFC និងការដោះសោរទូរស័ព្ទដោយការស្កែនក្រយ៉ៅម្រាមនៅផ្ទៃខាងក្រោយក្រោមកាមេរ៉ាផងដែរ។
ស្មាតហ្វូនជំនាន់ថ្មីនេះទ្រទ្រង់ប្រព័ន្ធសេវា 4G LTE ហើយវាមានថ្មកំលាំងខ្លាំងដល់ទៅ 3,300 មីលីអំពែម៉ោងជាប្រភេទថ្ម Lithium Ion ជាមួយនឹងមុខងារសន្សំសំចៃថាមពលថ្ម Battery & Power Saving និងទ្រទ្រង់នូវបច្ចេកវិទ្យាសាកថាមពលល្បឿនលឿនតាមរយះរន្ធដោត USB-C ថែមទៀតផង។ ស្មាតហ្វូនជំនាន់ថ្មី LG Stylo 4 នេះត្រូវបានដាក់លក់នៅលើបណ្តាញចែកចាយ MetroPCS ក្នុងតម្លៃប្រមាណតែ $179 ប៉ុណ្ណោះដែលតម្លៃនេះគឺធ្លាក់ចុះពីតម្លៃដើមរបស់វាដែលមានតម្លៃ $239។ គេមិនទាន់ដឹងថា តើ LG នឹងបញ្ចេញស្មាតហ្វូនមួយនេះទៅចរាចរណ៍លក់ក្នុងបណ្តាទីផ្សារក្នុងប្រទេសផ្សេងក្រៅពីអាមេរិកដែរឬអត់នោះទេ៕