កាលពីពេលថ្មីៗនេះ លោក Evan Blass បានបង្ហាញពីការរចនាម៉ូដរបស់ TalkBand B5 ដោយក្រុមហ៊ុន Huawei ដែលព័ត៌មាននេះ ត្រូវបានបង្ហើបឱ្យដឹងនៅក្នុង Tweet របស់លោក ប៉ុន្ដែមិនមានព័ត៌មានលម្អិតផ្សេងទៀត ត្រូវបានបង្ហាញនៅពេលនោះទេ។ ឥឡូវនេះ គណនី Weibo ជាផ្លូវការរបស់ក្រុមហ៊ុន Huawei បានបញ្ជាក់ពីកាលបរិច្ឆេទនៃការបង្ហាញខ្លួនរបស់ឧបករណ៍នេះហើយ គឺនៅថ្ងៃទី 18 ខែកក្កដាខាងមុខនេះ។
ជាមួយគ្នានេះ ស្មាតហ្វូនថ្មី Nova 3 ក៏នឹងបង្ហាញខ្លួននៅកាលបរិច្ឆេទដូចគ្នា ដូច្នេះយើងរំពឹងថា ឧបករណ៍ទាំងពីរនះ នឹង ត្រូវបានបង្ហាញខ្លួន នៅកន្លែងដូចគ្នា។ ទោះបីជាផលិតផលនេះ នឹងត្រូវបានប្រកាសនៅថ្ងៃទី 18 ខែកក្កដា ការលក់នឹងចាប់ផ្តើមនៅថ្ងៃទី 20 ខែកក្កដា វេលាម៉ោង 13:00pm។ គួរបញ្ជាក់ផងដែរថា ផ្ទាំងផ្សព្វផ្សាយ បានបង្ហាញថា នាឡិកានេះ នឹងទទួលបានការបំពាក់អេក្រង់ធំ និងពណ៌ច្បាស់ ដែលជាការធ្វើអោយប្រសើរឡើង នូវរូបរាងដែលមានទំហំតូចរបស់ TalkBand B3 ដែលត្រូវបានបង្ហាញខ្លួន កាលពីឆ្នាំ 2016 ។
នាឡិកាដៃដ៏ទំនើបនេះ នឹងមិនត្រឹមតែបន្ថែមបច្ចេកវិទ្យា Bluetooth ប៉ុណ្ណោះទេ ប៉ុន្តែវាក៏នឹងមានភ្ជាប់ជាមួយនូវលក្ខណៈពិសេស ដែលទាក់ទងនឹងកាយសម្បទាផងដែរ ពិសេសគឺមុខងារតាមដានសុខភាពផ្ទាល់តែម្តង។ យើងនឹងដឹងអំពីលក្ខណៈពិសេស និងមុខងារពេញលេញ នៅពេលដែលវាត្រូវបានបង្ហាញខ្លួនជាផ្លូវការ៕
