បន្ទាប់ពីបានជ្រើសរើសជាប្រធានាធិបតីរបស់សហរដ្ឋអាមេរិក លោក Donald Trump បានដាក់ពន្ធគយជាបន្តបន្ទាប់ទៅលើការនាំចូលបរទេសដែលមានន័យថា សហរដ្ឋអាមេ រិក ចង់ធ្វើការជម្រុញទៅលើផលិតកម្មក្នុងស្រុកវិញ។ ពន្ធគយនេះ គឺដាក់នៅក្នុងឆ្នាំ 2018 ហើយវាផ្តោតជាដំបូងទៅលើផលិតផលគ្រឿងអេឡិចត្រូនិច ប៉ុន្តែក្រោយមកវាក៏បានពង្រីកទៅកាន់ទំនិញជាច្រើនទៀតដែលក្នុងនោះក៏មានដែកផងដែរ។ ក្រៅពីពន្ធស្តង់ដារនេះ រដ្ឋបាលរបស់លោក Trump ក៏ធ្វើការកំណត់ និងតម្លើងពន្ធទៅលើទំនិញជាច្រើនដែលនាំចេញពីប្រទេសចិន ដែលធ្វើអោយមានសង្គ្រាមពាណិជ្ជកម្មរវាងប្រទេសទាំងពីរនេះ។
ខណៈពេលដែលប្រទេសទាំងពីរ បានព្យាយាមធ្វើការចចារទៅលើកិច្ចព្រមព្រៀងមួយនៅក្នុងរយៈពេលប៉ុន្មានខែនេះ នៅថ្ងៃនេះ ប្រធានាធិបតីរបស់សហរដ្ឋអាមេរិក និងមន្រ្តីជាន់ខ្ពស់របស់រដ្ឋាភិបាលចិន បានជួបគ្នានៅសេតវិមាន White House របស់សហរដ្ឋអាមេរិក។ ប្រទេសទាំងពីរនេះ បានឈានដល់កិច្ចព្រមព្រៀងបឋមមួយ ដើម្បីធ្វើអោយស្ថានការណ៍នេះកាន់តែល្អប្រសើរនោះ។ យោងទៅតាមកិច្ចព្រមព្រៀងនេះ ប្រទេសចិន នឹងធ្វើការសម្របសម្រួលទៅលើកិច្ចការពារទៅលើកម្មសិទ្ធិបញ្ញាដែលធ្វើការគ្រប់គ្រងដោយក្រុមហ៊ុនជាច្រើនរបស់សហរដ្ឋអាមេរិក។ ក្រៅពីការបង្កើនទៅលើការទិញផលិតផលជាច្រើនផ្នែកកសិកម្មរបស់សហរដ្ឋអាមេរិកចាប់ពី 40 ពាន់លានដុល្លារទៅ 50 ពាន់លានដុល្លារអាមេរិក។ ត្រឡប់មកវិញ សហរដ្ឋអាមេរិកនឹងធ្វើការពន្យារពេលទៅលើការតម្លើងពន្ធដែលត្រូវកំណត់នៅថ្ងៃទី 15 ខែតុលានេះ ដែលមានទឹកប្រាក់ប្រមាណជា 250 ពាន់លានដុល្លារអាមេរិកនៅក្នុងការនាំចូលនៅក្នុងប្រទេសចិន។
ក្រៅពីនេះ សហរដ្ឋអាមេរិក ក៏គ្រោងនឹងធ្វើការតម្លើងនូវពន្ធបន្ថែមទៅលើផលិតផលប្រើប្រាស់ជាច្រើន ដែលនាំចេញពីប្រទេសចិន ដែលបានចូលជាធរមាននៅថ្ងៃទី 15 ខែធ្នូ។ សម្រាប់ពេលនេះ គ្មានការសម្រេចចិត្តណាមួយ ដែលបានធ្វើឡើងថា តើពន្ធគយនេះនឹងបន្ត ឬមិនបន្តនោះទេ។ ទោះជាយ៉ាងណាក៏ដោយ កិច្ចព្រមព្រៀងនេះ មិនបាននិយាយថា ក្រុមហ៊ុន Huawei នឹងត្រូវបានដកចេញពីបញ្ជីខ្មៅរបស់ក្រសួងពាណិជ្ជកម្មរបស់សហរដ្ឋអាមេរិកនោះទេ។ ប្រទេសទាំងពីរនេះ នឹងធ្វើនូវកិច្ចចចារជាច្រើនទៀតនៅក្នុងពេលដ៏ខ្លីខាងមុខនេះ ហើយស្ថានភាពរបស់ក្រុមហ៊ុន Huawei ត្រូវបានគេរំពឹងថា នឹងធ្វើការពិភាក្សានៅពេលខាងមុខជាបន្តទៀត។ ប្រសិនបើការហាមប្រាមនេះ ត្រូវបានលុបចោលទេនោះ ក្រុមហ៊ុន Apple នឹងបន្តនូវតំណែងចំណាត់ថ្នាក់លេខរៀងទី 2 ជាក្រុមហ៊ុនផលិតស្មាតហ្វូនធំបំផុតទី 2 របស់ពិភពលោក ពីក្រុមហ៊ុនរបស់ចិនវិញ ជាក់ជាមិនខាន៕