នាពេលថ្មីៗនេះ ក្រុមហ៊ុន Huawei គឺមានស្មាតហ្វូន 5G ជាច្រើន ដែលបង្ហាញខ្លួន ដែលមានដូចជា Mate 30 5G, Mate 30 Pro 5G និង Mate 30 RS Porsche Design ក្នុងនោះ ក៏មានស្មាតហ្វូន Mate 20 X 5G ដែលបង្ហាញខ្លួន កាលពីពេលមុននេះផងដែរ។ ក្រុមហ៊ុន Honor វិញនោះ ក៏នឹងប្រកាសបង្ហាញនូវវត្តមានរបស់ស្មាតហ្វូន 5G ជាច្រើនរបស់ខ្លួនដែលក្នុងនោះមាន Honor V30 និង Honor V30 Pro នៅចុងខែនេះផងដែរ។
ព័ត៌មានថ្មីនេះ មានការទម្លាយថា ក្រុមហ៊ុន Huawei និង Honor មានស្មាតហ្វូន 5G ជាច្រើនទៀត។ តាមការបញ្ជាក់របស់ប្រភពនេះ ម៉ាកយីហោស្មាតហ្វូនទាំងពីរនេះគឺមានស្មាតហ្វូន 5G ច្រើនជាង 20 ម៉ូឌែលដែលទើបតែទទួលបាននូវវិញ្ញាបនប័ត្របញ្ជាក់ 5G នេះ។ ស្មាតហ្វូនទាំងនេះគឺស្ថិតនៅក្នុងក្រុម flagship category។ ប្រភពនៃព័ត៌មាននេះ គឺចេញពីប្លុករបស់ចិន Digital Chat Station ដែលប្រកាសនៅលើ Weibo នោះ។
នៅក្នុងការបង្ហោះនៅលើ Weibo នេះ គឺមានការទម្លាយនូវព័ត៌មានលម្អិតជាមួយនឹងរូបភាពនៃលេខម៉ូឌែលរបស់ស្មាតហ្វូននេះផងដែរ។ សម្រាប់លេខម៉ូឌែលទាំងនេះ គឺខុសៗគ្នា ហើយវាអាចនឹងបង្ហាញខ្លួននៅក្នុងរយៈពេលប៉ុន្មានខែទៀត។ យើងជឿជាក់ថា ស្មាតហ្វូនមួយចំនួននឹងប្រកាសបង្ហាញខ្លួននៅឆ្នាំក្រោយនេះ នៅពេលដែលស្មាតហ្វូន 5G ជំនាន់ទី 2 នឹងវាយលុកខ្លាំងនៅលើទីផ្សារនោះ៕