យោងតាមព័ត៌មានចុងក្រោយនេះ បានបង្ហាញថា ក្រុមហ៊ុន HMD Global បានត្រៀមធ្វើការអាប់ដេតទៅកាន់ប្រព័ន្ធប្រតិបត្តិការ Android 10 សម្រាប់ស្មាតហ្វូនរបស់ខ្លួន បន្ទាប់ពីបានបញ្ចេញនូវផែនទី Android 10 Road map សម្រាប់ការអាប់ដេតទៅលើស្មាតហ្វូនជំនាន់ថ្មៗរបស់ខ្លួន។ កន្លងមក ក្រុមហ៊ុននេះ បានធ្វើការអាប់ដេតទៅកាន់ Android 10 Update នៅលើស្មាតហ្វូន Nokia 8.1 ហើយវាក៏ត្រៀមធ្វើការអាប់ដេតទៅកាន់ស្មាតហ្វូនជាច្រើនទៀតផងដែរ។ ស្មាតហ្វូន Nokia មួយទៀតដែលនឹងធ្វើការអាប់ដេតប្រហែលជាស្មាតហ្វូន flagship Nokia 9 Pureview។
ខណៈពេលដែលយើងនៅមិនទាន់ទទួលបាននូវការបញ្ជាក់ជាផ្លូវការសម្រាប់ការអាប់ដេតទៅលើស្មាតហ្វូន Android 10 នេះ ស្មាតហ្វូន Nokia 9 Pureview ក៏ប្រទះឃើញនៅលើ Geekbench ដែលដំណើរការនូវប្រព័ន្ធប្រតិបត្តិការ Android 9 ផងដែរ។ គួររំលឹកឡើងវិញ ស្មាតហ្វូន Nokia 9 គឺជាស្មាតហ្វូនមួយរបស់ក្រុមហ៊ុនបច្ចេកវិទ្យា HMD Global ដែលភ្ជាប់ជាមួយនឹង Android One ដែលមានការតម្លើងមកជាស្រេចនូវ Android 9 Pie នោះ។
នៅក្នុងរបាយការណ៍មួយចេញពី Counterpoint Research បានទម្លាយថា ស្មាតហ្វូនជាច្រើនរហូតដល់ទៅ 96% របស់ក្រុមហ៊ុន HMD គឺមានការអាប់ដេតទៅកាន់ Android 9 Pie ហើយក្រុមហ៊ុននឹងធ្វើការអាប់ដេតទៅកាន់ Android 10 នៅឆ្នាំក្រោយនេះ។ ក្រៅពីស្មាតហ្វូន Nokia 8.1 ដែលទទួលបាននូវការអាប់ដេតទៅកាន់ Android 10 ហើយនោះ ក្រុមហ៊ុននេះ ក៏បានបញ្ជាក់ថា ស្មាតហ្វូន Nokia 9 Pureview និង Nokia 7.1 ក៏នឹងធ្វើការអាប់ដេតទៅកាន់ Android 10 នៅក្នុងត្រីមាសទី 4 នៅឆ្នាំ 2019 នេះ។ ស្មាតហ្វូន 9 Pureview នេះប្រហែលជាបានធ្វើការតេស្តរួចហើយនៅលើស្មាតហ្វូន Geekbench ៕