នៅពេលនេះ Samsung Galaxy Fold ស្មាតហ្វូនដែលអាចបត់បាន គឺចាប់ផ្តើមការដាក់លក់ជាលើកទី 3 ហើយនៅក្នុងទីផ្សារនៃប្រទេសកូរ៉េ។ ក្រុមហ៊ុន Samsung ក៏ចាប់ផ្តើមទទលនូវការបញ្ជាទិញស្មាតហ្វូននេះនៅលើ Homepages របស់ខ្លួន និង e-commerce ជាច្រើនទៀតដូចជា 11st, eBay និង Coupang ចាប់ពីម៉ោង 12 យប់នៅថ្ងៃអាទិត្យនេះ នេះបើតាមការបញ្ជាក់របស់ក្រុមហ៊ុនបច្ចេកវិទ្យាយក្សនេះ។ សម្រាប់ចំនួននៃការលក់ជាលើកទី 3 នេះគឺមិនទាន់បានទម្លាយនៅឡើយទេ ប៉ុន្តែស្មាតហ្វូននេះនឹងមានចំនួន 10000 គ្រឿង។ តាមការព្យាករណ៍នៅលើទីផ្សារនោះ ក្រុមហ៊ុនបច្ចេកវិទ្យា Samsung គឺលក់ស្មាតហ្វូន Galaxy Folds នេះបានប្រហែលជា 20,000 គ្រឿងហើយសម្រាប់ទីផ្សារនៅក្នុងប្រទេសកូរ៉េខាងត្បូងនេះគិតត្រឹមការដាក់លក់លើកទី 1 និងលើកទី 2 នៅក្នុងខែកញ្ញានេះ។
ស្មាតហ្វូននេះគឺមានតម្លៃ 2.39 លានវ៉ុន ($2020) ហើយវាលក់ដាច់អស់រលីងនៅក្នុងរយៈពេលតែប៉ុន្មាននាទីប៉ុណ្ណោះសម្រាប់ការលក់ទាំងពីរលើកនេះ។ សម្រាប់ការលក់លើកទី 3 នេះគឺមានចំនួនកំណត់ផងដែរ។ ប្រភពនៅក្នុងឧស្សាហកម្មនេះនិយាយថា Samsung កំពុងតែទទួលនូវផលចំណេញដោយសារតែតម្លៃរបស់ស្មាតហ្វូននេះ។ ដោយសារតែការលក់មានចំនួនកំណត់នោះ តម្លៃរបស់ស្មាតហ្វូននេះមានការកើនឡើងមិនធម្មតានោះទេ។ ការព្យាករណ៍បញ្ជាក់ថា Samsung Display គឺត្រៀមការផលិតនូវអេក្រង់ AMOLED ដែលអាចបត់បានចំនួន 100,000 បន្ទះសម្រាប់ស្មាតហ្វូនដែលអាចបត់បាននេះរួមទាំងអេក្រង់សម្រាប់ការពារនៅពេលដែលមានការផ្លាស់ប្តូរអេក្រង់ថ្មីផងដែរ។
បន្ទាប់ពីការលក់អស់រលីងមិនត្រឹមតែនៅក្នុងប្រទេសកូរ៉េនោះទេ ប៉ុន្តែវាក៏លក់អស់រលីងនៅក្នុងសហរដ្ឋអាមេរិក ចក្រភពអង់គ្លេស អាល្លឺម៉ង់ សិង្ហបុរី និងបារាំង Samsung ក៏មានគម្រោងក្នុងការដាក់លក់ស្មាតហ្វូននេះនៅក្នុងទីផ្សារជាច្រើនទៀតដូចជាជប៉ុន ប៉ូឡូញ ម៉ិចស៊ីកូ និងនូវែលសាឡង់នៅចុងខែនេះផងដែរ។ សម្រាប់ទីផ្សាររបស់ប្រទេសជប៉ុន ស្មាតហ្វូនដែលអាចបត់បាន Galaxy Fold នេះ នឹងមមិនមានឡូហ្គោ Samsung នៅពេលដែលវាបត់នោះទេ ហើយយុទ្ធសាស្រ្តបន្តរបស់ក្រុមហ៊ុន Samsung គឺការពង្រីកទីផ្សារទៅកាន់អាមេរិកដើម្បីប្រកួតជាមួយនឹង Apple ។
ការដាក់លក់នៅក្នុងប្រទេសជប៉ុនរបស់ស្មាតហ្វូន Galaxy Fold នេះនឹងចាប់ផ្តើមនៅថ្ងៃទី 25 ខែតុលាខាងមុខនេះ។ ក្រុមហ៊ុន Samsung នឹងធ្វើការពង្រីកទីផ្សាររបស់ខ្លួនទៅកាន់ទីផ្សាររបស់ប្រទេសចិនសារជាថ្មីជាមួយនឹវត្តមានរបស់ស្មាតហ្វូន Galaxy Fold នេះនៅថ្ងៃទី 1 ខែវិច្ឆិកាខាងមុខនេះដែលនឹងធ្វើការប្រកួតប្រជែងជាមួយនឹងMate X របស់ Huawei ផងដែរ៕
