ស្មាតហ្វូនដែលអាចបត់បាន Huawei Mate X បានបង្ហាញខ្លួនជាលើកដំបូងបំផុតនៅក្នុងខែកុម្ភៈជាមួយនឹងគម្រោងក្នុងការដាក់លក់តាមក្រោយ។ ដល់ពេលនេះ គឺមានរយៈពេល 8 ខែហើយ ស្មាតហ្វូននេះនៅមិនទាន់ដាក់លក់នៅឡើយទេ ហើយវាមានការពន្យារពេលនៃការដាក់លក់នេះជាបន្តបន្ទាប់ផងដែរ។ នៅក្នុងរយៈពេលនេះ ក្រុមហ៊ុន Huawei បានធ្វើការឌីស្សាញសារជាថ្មីទៅលើស្មាតហ្វូនដែលអាចបត់បាននេះជាមួយនឹងការពង្រឹងទៅលើភាពរឹងមាំរបស់វា។ នៅក្នុងវីដេអូនេះពេលនេះមានការទម្លាយអំពីការផ្លាស់ប្តូរមួយនៅក្នុងចំណោមការផ្លាស់ប្តូរថ្មីៗជាច្រើននៅក្នុងការឌីស្សាញនេះ។
ស្មាតហ្វូន Mate X មានការឌីស្សាញជាមួយនឹងការចុចបត់នៅខាងក្រៅដែលមានន័យថា អ្នកអាចធ្វើការបត់ស្មាតហ្វូននេះទៅខាងក្រោយដោយប្រើប្រាស់នៅក្នុងទម្រង់ជា Phone Mode ឬបត់មកមុខសម្រាប់ប្រើប្រាស់ជា Tablet Mode។ ការឌីស្សាញបែបនេះគឺវាមិនចាំបាច់ប្រើប្រា់សនូវអេក្រង់ទី 2 នោះទេនៅពេលដែលវាបត់នោះ ហើយវាខុសប្លែកពីស្មាតហ្វូន Samsung Galaxy Fold ដែលមានអេក្រង់ទី 2 នៅខាងក្រៅ និងអេក្រង់មួយទៀតនៅខាងក្នុង។ គុណវិបត្តិនោះ គឺថាអេក្រង់នេះ បើកជានិច្ច។
ផ្អែកទៅលើវីដេអូនេះ ស្មាតហ្វូន Mate X ពេលនេះមានភ្ជាប់ជាមួយនឹងប៊ូតុង 1 ដែលមានសមត្ថភាពក្នុងការចុចបើកទៅលើអេក្រង់ប្រសិនបើអ្នកចង់ប្រើប្រាស់ជាទម្រង់ Tablet Mode នោះ។ នៅពេលដែលអ្នកបត់អេក្រង់ជាទម្រង់ Phone Mode ផ្នែកដែលបត់នៃអេក្រង់នេះគឺត្រូវបានចាក់សោរ។ ដូចនេះការបើកអេក្រង់ទៅកាន់ Tablet Mode គឺគ្រាន់តែចុចនៅលើប៊ូតុងក្រហមតែប៉ុណ្ណោះ។ ស្មាតហ្វូនស៊េរីថ្មី Huawei Mate X នេះត្រូវគេរំពឹងថា នឹងដាក់លក់នៅចុងខែនេះនៅខែតុលា។ អេក្រង់ដែលអាចបត់បានរបស់ស្មាតហ្វូននេះ គឺមានទំហំ 8-inches ជាមួយនឹងកម្រិតភាពច្បាស់ 2480x2200។ នៅពេលដែលបត់នោះ ស្មាតហ្វូននេះមានអេក្រង់ទំហំ 6.6-inches ជាមួយនឹងកម្រិតភាពច្បាស់ 2480x1148 ខណៈពេលដែលអេក្រង់មួយទៀតគឺមានទំហំ 6.38-inches ជាមួយនឹងកម្រិតភាពច្បាស់ 2480 x 892 ។ ស្មាតហ្វូននេះមានកាមេរ៉ា ៣ គ្រាប់ខាងក្រោយ បន្ទះឈីប Kirin 990 processor រ៉េមទំហំ 8GB និងម៉េមូរីក្នុងម៉ាស៊ីនទំហំ 512GB ៕