5G នឹងក្លាយជាប្រធានបទដ៏ធំបំផុតនៅឆ្នាំក្រោយនេះ ហើយយើងក៏បានឃើញនូវវត្តមាននៃស្មាតហ្វូន 5G ជាច្រើនម៉ូឌែលបង្ហាញខ្លួននៅលើទីផ្សារនៅថ្ងៃនេះផងដែរ។ មានរឿងជាច្រើនដែលមានការកើនឡើងកម្តៅខ្លាំងនៅក្នុងរយៈពេលប៉ុន្មានខែនេះ ហើយក្រុមហ៊ុនផលិតស្មាតហ្វូនធំៗជាច្រើន ត្រូវបានគេរំពឹងថា នឹងបញ្ចេញនូវស្មាតហ្វូន 5G របស់ខ្លួនដែលជាប្រភេទស្មាតហ្វូនថ្នាក់កណ្តាលនៅដើមឆ្នាំ 2020 នេះ។ ក្រុមហ៊ុន oppo និង vivo អាចនឹងចូលរួមនៅក្នុងការប្រកួតប្រជែងបច្ចេកវិទ្យា 5G នេះ កាន់តែឆាប់ជាងនេះ ខណៈពេលដែលពេលនេះ ក្រុមហ៊ុនកំពុងតែធ្វើការពន្លឿនទៅលើការអភិវឌ្ឍទៅលើស្មាតហ្វូនជាច្រើនម៉ូឌែលនោះ។
តាមការបញ្ជាក់នៅក្នុងរបាយការណ៍ថ្មីមួយរបស់ Digitimes បញ្ជាក់ថាក្រុមហ៊ុន oppo និង vivo គ្រោងនឹងបញ្ចេញនូវស្មាតហ្វូន 5G របស់ខ្លួននៅចុងឆ្នាំ 2019 នេះ ឬនៅដើមឆ្នាំ 2020 នេះដែលមានរយៈពេល 2 ទៅ 3 ខែទៀតប៉ុណ្ណោះ។ ក្រុមហ៊ុនទាំងពីរនេះ មានឱកាសច្រើនក្នុងការយកឈ្នះទៅលើក្រុមហ៊ុនជាច្រើនដូចជា Realme និង Honor ដែលត្រូវបានគេនិយាយថា នឹងប្រកាសស្មាតហ្វូន 5G ជាច្រើនរបស់ខ្លួននៅចុងឆ្នាំនេះ។ ជាក់ស្តែង ក្រុមហ៊ុន Realme បានប្រកាសថា ខ្លួននឹងក្លាយជាម៉ាកយីហោដំបូងបំផុតដែលនឹងបញ្ចេញនូវស្មាតហ្វូនដែលមានភ្ជាប់ជាមួយនឹងបន្ទះឈីប 5G របស់ Qualcomm ។
អ្វីដែលគួរអោយចាប់អារម្មណ៍នោះ ក្រុមហ៊ុន MediaTek នេះ ត្រូវគេនិយាយថា នឹងចាប់ផ្តើមធ្វើការនាំចេញទៅលើបន្ទះឈីប 5G SoCរបស់ខ្លួននៅក្នុងត្រីមាសទី 4 ឆ្នាំ 2019 នេះ។ ខណៈពេលដែលក្រុមហ៊ុន Oppo និងVivo ប្រហែលជាមិនប្រើប្រាស់នូវបន្ទះឈីប MediaTek 5G chip នេះ ក្រុមហ៊ុន vivo គឺមានយ៉ាងហោចណាស់ស្មាតហ្វូនមួយដែលនឹងបង្ហាញខ្លួននៅចុងឆ្នាំនេះជាមួយនឹងបន្ទះឈីប 5G Exynos 980 SoC របស់ក្រុមហ៊ុន Samsung សព្វថ្ងៃនេះ ក្រុមហ៊ុន vivo គឺមានស្មាតហ្វូន 5G ចំនួន 2 ម៉ូឌែលនៅក្នុងប្រទេសចិននោះ គឺ iQOO Pro 5G និង NEX 3 ខណៈពេលដែលក្រុមហ៊ុន Xiaomi គឺមានស្មាតហ្វូនម៉ូឌែលថ្មីមួយទៀតនោះគឺ Mi 9 Pro 5G ដែលនេះគឺជាម៉ូឌែលស្មាតហ្វូន 5G ដែលមានតម្លៃថោកបំផុតនៅក្នុងប្រទេសចិន។ ក្រុមហ៊ុនបច្ចេកវិទ្យាHuawei ក៏មានម៉ូឌែល 5G ផងដែរនោះគឺ Mate 20 X 5G ។ យ៉ាងណាមិញ ក្រុមហ៊ុន oppo នៅមិនទាន់មានស្មាតហ្វូនម៉ូឌែល 5G ណាមួយនៅក្នុងទីផ្សាររបស់ចិននោះទេ៕