Galaxy Fold បានបង្ហាញខ្លួននៅលើទីផ្សារជាច្រើនរួចមកហើយតាំងពីខែមុននេះ។ ក្រុមហ៊ុន Samsung ក៏ដាក់លក់ស្មាតហ្វូនដែលអាចបត់បាននេះនៅក្នុងចំណួនដែលមានកំណត់ប៉ុណ្ណោះ ហើយស្មាតហ្វូននេះ ក៏លក់ដាច់អស់រលីងតែម្តងនៅគ្រប់ទីកន្លែងតែម្តង។ ក្រុមហ៊ុនបច្ចេកវិទ្យានេះពេលនេះក៏មានគម្រោងក្នុងការបង្កើនការផលិតអេក្រង់ដែលអាចបត់បានជាច្រើននាពេលខាងមុខនេះផងដែរ។ តាមការបញ្ជាក់នៅក្នុងរបាយការណ៍មួយចេញពីប្រទេសកូរ៉េខាងត្បូង ក្រុមហ៊ុន Samsung Display នឹងធ្វើការបង្កើនការផលិតទៅលើអេក្រង់ដែលអាចបត់បានរបស់ខ្លួនចាប់តាំងពីស្មាតហ្វូនដែលអាចបត់បាន Galaxy Fold មានការដំណើរការលក់ដាច់ខ្លាំងនៅលើទីផ្សារនោះ។ ពេលនេះ ការលក់របស់ស្មាតហ្វូនដែលអាចបត់បាននេះគឺមានការគាំទ្រខ្លាំងជាងការរំពឹងទុកកាលពីដំបូងរបស់ខ្លួន។
របាយការណ៍មួយលើកឡើងថា ក្រុមហ៊ុន Samsung Display មានគម្រោងក្នុងការផលិតអេក្រង់ដែលអាចបត់បានចំនួន 67,000 បន្ទះកាលពីខែមុននេះបន្ទាប់ពីការផលិតអេក្រង់ចំនួន 40,000នៅក្នុងខែសីហានេះ។ ទោះជាយ៉ាងណាក៏ដោយនោះ ក្រុមហ៊ុនបច្ចេកវិទ្យានេះក៏ធ្វើការផលិតអេក្រង់ចំនួន 92,000 ដែលមានការកើនឡើងចំនួន 40 បើធៀបជាមួយនឹងគោលដៅដំបូងរបស់ខ្លួននោះ។ ខណៈពេលដែលស្មាតហ្វូន Galaxy Foldនេះបន្តលក់អស់ពីស្តុកនោះ ក្រុមហ៊ុន Samsung ចង់ធ្វើការរក្សានូវសន្ទុះរបស់ខ្លួនជាមួយនឹងការបន្តទៅលើខ្សែសង្វាក់ផលិតកម្មពេញលេញទៅលើអេក្រង់ដែលអាចបត់បាននេះ។
ពេលនេះ ក្រុមហ៊ុននេះ ត្រូវបានគេរំពឹងថា នឹងធ្វើការផលិតអេក្រង់ចំនួន 102,000 បន្ទះនៅក្នុងខែតុលា និង 99,000 បន្ទះនៅក្នុងខែវិច្ឆិកា។ ក្រុមហ៊ុននេះ ត្រូវបានគេរាយការណ៍ថានឹងធ្វើការផលិតអេក្រង់ចំនួន 3,300 បន្ទះក្នុងមួយថ្ងៃ ហើយប្រសិនបើគោលដៅនេះសម្រេចទៅតាមអ្វីដែលបានគ្រោងទុកនោះ ក្រុមហ៊ុន Samsung Display អាចធ្វើការបន្តដំណើរការបែបនេះបានសម្រាប់រយៈពេលប៉ុន្មានខែក្រោយទៀតផងដែរ។ គួរបញ្ជាក់ផងដែរថា ពេលនេះស្មាតហ្វូន Galaxy Fold គឺលក់ដាច់ខ្លាំងមែនទែន!
