បន្ទាប់ពីការបង្ហាញវត្តមានរបស់ស្មាតហ្វូនស៊េរីថ្មី OnePlus 7T series រួចមកនៅក្នុងប្រទេសចិន លោក Pete Lau ដែលជាស្ថាបនិក និង CEO របស់ក្រុមហ៊ុន OnePlus និយាយនៅក្នុងបទសម្ភាសន៍ជាមួយនឹងអ្នកសារព័ត៌មានលោកបានបង្ហាញអំពីគម្រោងជាច្រើនរបស់ខ្លួនសម្រាប់ទីផ្សារក្នុងស្រុក និងទីផ្សាររបស់បរទេសផងដែរ ។
នៅក្នុងនោះលោកបានបញ្ជាក់ថា ក្រុមហ៊ុននេះ មិនមានគម្រោងក្នុងការដាក់លក់នូវស្មាតហ្វូនថ្នាក់ទាប ឬស្មាតហ្វូនថ្នាក់កណ្តាលនោះទេ ដើម្បីចាប់ចំណែកទីផ្សារកាន់តែធំនោះ។ បន្ថែមពីនេះទៀត គាត់បានទៀតនិយាយថា ក្រុមហ៊ុននៅមិនទាន់មានគម្រោងក្នុងការបើកហាងលក់ជាច្រើននៅក្នុងប្រទេសចិននោះទេ។
នៅក្នុងការការលក់ និងអាជីវកម្មនេះ លោក Pete Lau បានធ្វើការទម្លាយថា ច្រើនជាង 70% នៃអាជីវកម្មរបស់ក្រុមហ៊ុននេះគឺមកពីទីផ្សាររបស់បរទេស ហើយប្រហែលជា 30% គឺដោយសារតែទីផ្សារនៅក្នុងស្រុកឧទាហរណ៍នៅក្នុងប្រទេសចិន។ពេលនេះ ក្រុមហ៊ុននេះ បានធ្វើការផ្តោតទៅលើការបង្កើនចំណែកទីផ្សារ។ លោក Pete Lau បាននិយាយបន្តថា ក្រុមហ៊ុន OnePlus មានគម្រោងក្នុងការវិនិយោគទឹកប្រាក់ចំនួន 1 ពាន់លានដុល្លារអាមេរិកក្នុងការបង្កើតនូវមជ្ឈមណ្ឌលស្រាវជ្រាវ និងអភិវឌ្ឍនៅក្នុងប្រទេសឥណ្ឌា។
បច្ចុប្បន្ននេះ ក្រុមហ៊ុនបច្ចេកវិទ្យានេះ ក៏ចាប់ផ្តើមដំណើរការនូវមជ្ឈមណ្ឌល R&D ចំនួន 2 នៅក្នុងទីផ្សារក្នុងស្រុកប្រទេសចិន ហើយមួយទៀតនៅក្នុងប្រទេសឥណ្ឌា ដែលក្រុមហ៊ុននេះ ចាត់ទុកថាជាទីស្នាក់ការទី 2 របស់ខ្លួននោះ។ ប្រទេសឥណ្ឌា គឺពិតជាមានសារៈសំខាន់ណាស់សម្រាប់ក្រុមហ៊ុន OnePlus ហើយក្រុមហ៊ុនបច្ចេកវិទ្យានេះ ក៏ដាក់លក់ស្មាតហ្វូននេះដំបូងបំផុតនៅក្នុងទីផ្សាររបស់ប្រទេសឥណ្ឌា។ នៅក្នុងដំណើរឆ្ពោះទៅមុខ ក្រុមហ៊ុននេះ អាចធ្វើការផ្តោតខ្លាំងទៅលើបច្ចេកវិទ្យា AI ហើយលោក Pete Lau គិតថា បច្ចេកវិទ្យា AI គឺពិតជាសំខាន់ណាស់សម្រាប់ទសវត្សន៍បន្ទាប់នេះ៕