នៅថ្ងៃនេះ មានការបង្ហាញប៉ាតង់ថ្មី ដែលមានការដាក់ជូនទៅកាន់ការិយាល័យកម្មសិទ្ធិបញ្ញាសហភាពអ៊ឺរ៉ុប (EUIPO) បានទម្លាយអំពីមុខងារថ្មីមួយទៀត ដែលអាចនឹងប្រើប្រាស់នៅលើស្មាតហ្វូន Galaxy S11។ នៅក្នុងប៉ាតង់ថ្មីនេះគឺមានការចេញផ្សាយនៅថ្ងៃទី 6 ខែវិច្ឆិកា ឆ្នាំ 2019 នេះ ហយវាគឺជាមុខងារ ដែលមានឈ្មោះហៅថា Space Zoom។ តាមការបញ្ជាក់នៅក្នុងព័ត៌មានលម្អិតដែលចេញផ្សាយដោយ LetsGoDigital នេះ សម្រាប់ស្លាកសញ្ញាពាណិជ្ជកម្ម trademark នេះគឺស្ថិតនៅក្នុងក្រុម Class 9/42 ហើយវាត្រូវគេដឹងថា គឺជាប្រភេទ “Smartphones; Software សម្រាប់ធ្វើការ Zoom ទៅលើ subject អ្វីមួយដែលរក្សានូវកម្រិតភាពច្បាស់របស់វាបានខ្ពស់ដដែល។
ក្រុមហ៊ុន Samsung កំពុងតែស្វែងរកនូវការពង្រឹងទៅលើសមត្ថភាពកាមេរ៉ារបស់ស្មាតហ្វូន 2020 របស់ខ្លួន ហើយសម្រាប់មុខងារនេះ ប្រហែលជាលក្ខណៈពិសេសមួយសម្រាប់ស្មាតហ្វូននេះ។ ក្រុមហ៊ុនេះ ប្រហែលជាចង់បន្ថែមនូវមុខងារ ‘Space Zoom’ នេះនៅលើស្មាតហ្វូនរបស់ខ្លួន ប៉ុន្តែវាគ្រាន់តែប្រហែលជាឈ្មោះនៃមុខងារ hybrid zoom ដែលក្រុមហ៊ុននេះ កំពុងតែធ្វើការអភិវឌ្ឍតែប៉ុណ្ណោះ។ ស្មាតហ្វូនជាច្រើនដូចជា Huawei P30 Pro, OPPO Reno 10x Zoom និង Reno 2 គឺសុទ្ធតែមានភ្ជាប់ជាមួយនឹងមុខងារ hybrid zoom នេះ។ សម្រាប់មុខងារ Zoom នេះ គឺអាចធ្វើការចែកចាយរូបភាពបានច្បាស់ស្រស់ស្អាតប្រសើរខ្ពស់ជាងការប្រើប្រាស់នូវបច្ចេកវិទ្យាមុខងារ digital zoom។
សូមជំរាបថា ចាប់តាំងពីមុខងារនេះផ្តើមមានការពេញនិយមខ្លាំងនោះ យើងរំពឹងថា ក្រុមហ៊ុនផលិតស្មាតហ្វូនជាច្រើនទៀតអាចនឹងធ្វើការបញ្ចូលនូវមុខងារនេះនៅលើស្មាតហ្វូន Flagship របស់ខ្លួន។ នេះប្រហែលជាអ្វីដែលក្រុមហ៊ុន Samsung ព្យាយាមក្នុងការធ្វើនោះ។ សម្រាប់មុខងារកាមេរ៉ា 5X zoom ត្រូវបានគេដឹងថា នឹងប្រើប្រាស់នៅលើស្មាតហ្វូន Galaxy S11 ផងដែរ។ ក្រុមហ៊ុន Samsung ត្រូវគេរំពឹងថា នឹងបង្ហាញស្មាតហ្វូននេះនៅក្នុងអំឡុងខែកុម្ភៈឆ្នាំ 2020 ខាងមុខនេះ នៅក្នុងព្រឹត្តិការណ៍ Mobile World Congress (MWC 2020)។ យើងត្រូវធ្វើការរង់ចាំមើលសិនថាតើស្មាតហ្វូននេះនឹងមានភ្ជាប់ជាមួយនឹងមុខងារនេះដែរឬទេ? ប៉ាតង់ថ្មីរបស់ក្រុមហ៊ុន Samsung មួយទៀតគឺទៅលើបច្ចេកវិទ្យា IR spectrometer ដែលត្រូវគេជឿជាក់ថានឹងប្រើប្រាស់នៅលើស្មាតហ្វូន Galaxy S11 នេះផងដែរ៕
