កាលពីដើមខែនេះ vivo V1945A/T គឺបានបង្ហាញនៅលើប្រព័ន្ធ Database របស់ទីភ្នាក់ងារ TENAA របស់ចិន។ ស្មាតហ្វូននេះ នៅមិនទាន់បង្ហាញខ្លួននៅឡើយទេ ហើយសម្រាប់ឈ្មោះរបស់ស្មាតហ្វូននេះ នៅក្នុងប្រទេសចិន នៅមិនទាន់ដឹងនៅឡើយទេ។ ស្មាតហ្វូនដដែលនេះ ត្រូវបានគេរាយការណ៍ថា នឹងបង្ហាញខ្លួននៅក្នុងប្រទេសឥណ្ឌា ហើយសម្រាប់ទីផ្សារជាច្រើនរបស់ប្រទេសរុស្ស៊ី នឹងមានឈ្មោះថា vivo V17។ ក្រុមហ៊ុន vivo ក៏មានគម្រោងក្នុងការនាំយកនូវស្មាតហ្វូនដដែលនេះ សម្រាប់ទីផ្សារជាច្រើនទៀតដូចជា ប្រទេសឥណ្ឌូនេស៊ី ថៃ ហ្វីលីពីន និងម៉ាឡេស៊ីថែមទៀតផង។
ក្រុមហ៊ុន vivo នៅក្នុងប្រទេសឥណ្ឌូនេស៊ី បានទម្លាយបង្ហាញនូវលក្ខណៈសម្បត្តិមួយចំនួនរបស់ស្មាតហ្វូន vivo S1 Pro ផងដែរ។ក្រុមហ៊ុននេះទម្លាយថា ស្មាតហ្វូនត្រកូល S-series ថ្មីនេះនឹងមានអេក្រង់ទំហំ 6.38-inch Super AMOLED ជាមួយនឹងកម្រិតភាពច្បាស់ Full HD+។ ស្មាតហ្វូននេះ គឺមានអេក្រង់ទំហំ 90% បើធៀបជាមួយនឹងតួខ្លួនរបស់វា។ អេក្រង់របស់ស្មាតហ្វូននេះនឹងមានបញ្ចូលនូវបច្ចេកវិទ្យាស្កេនក្រយ៉ៅដៃក្រោមអេក្រង់ “Screen Touch ID” ថែមទៀត។ ស្មាតហ្វូន Vivo S1 Pro នេះប្រើប្រាស់នូវបន្ទះឈីប Snapdragon 665 និងរ៉េមទំហំ 8GB។ សម្រាប់ម៉េមូរីក្នុងម៉ាស៊ីនទំហំ 128GB ហើយវាក៏មានការបន្ថែមនូវម៉េមូរី 256 GB microSD card ថែមទៀតផង។ ស្មាតហ្វូននេះ មានថាមពលថ្មទំហំ 4,500mAh និងទ្រទ្រង់នូវបច្ចេកវិទ្យាបញ្ចូលថាមពលថ្ម 18W dual-engine fast charging តាមរយៈរន្ធដោត USB-C ថែមទៀត។
សម្រាប់ការថតរូបភាព Selfies វិញនោះ ស្មាតហ្វូន vivo S1 Pro នេះមានកាមេរ៉ាខាងមុខទំហំ 32-megapixel ថែមទៀត។ ផ្នែកខាងក្រោយរបស់ស្មាតហ្វូននេះគឺមានការឌីស្សាញរូបរាងដែលមានទម្រង់ជាគ្រាប់ត្បូងពេជ្រដែលមានកាមេរ៉ាទំហំ 48-megapixel Samsung GM1 និង 120-degree 8-megapixel Super wide lens ថែមទៀត។ កាលបរិច្ឆេទនៃការបង្ហាញស្មាតហ្វូន vivo S1 Pro នៅក្នុងប្រទេសឥណ្ឌូនេស៊ីនៅមិនទាន់ដឹងនៅឡើយទេ។ ស្មាតហ្វូននេះ មានពណ៌ Glowing Black និង Crystal Blue ថែមទៀត។ វាមានការបង្ហាញថា ប្រទេសឥណ្ឌូនេស៊ី និងទីផ្សារជាច្រើនទៀតនៅក្នុងតំបន់អាស៊ីអាគ្នេយ៍ឆាប់ៗនេះនឹងទទួលបានស្មាតហ្វូន vivo S1 Pro មុនដាច់ចុងខែនេះ។
ដូចអ្វីដែលបានលើកឡើងនៅក្នុងការបង្ហោះនៅមុននេះ សម្រាប់ទីផ្សារមួយចំនួនដូចជាប្រទេសចិន ឥណ្ឌា និងប្រទេសរុស្ស៉ី គឺនឹងទទួលបានស្មាតហ្វូននេះជាមួយនឹងឈ្មោះផ្សេង។ នៅក្នុងប្រទេសចិន និងប្រទេសឥណ្ឌា ក្រុមហ៊ុន vivo ក៏ប្រកាសបង្ហាញនូវស្មាតហ្វូន vivo S1 Pro ផ្សេងមួយទៀតនៅដើមឆ្នាំនេះផងដែរ។ នៅក្នុងប្រទេសរុស្ស៉ី ក្រុមហ៊ុន vivo នៅមិនទាន់បានបង្ហាញស្មាតហ្វូន S-Series នេះនៅឡើយទេ។ នៅក្នុងប្រទេសរុស្ស៉ីនិងបានប្រទេសឥណ្ឌា វាទំនងជាមានឈ្មោះហៅថា vivo V17 នៅមុនដាច់ខែនេះ។ ការលក់ស្មាតហ្វូននេះចាប់ផ្តើមនៅក្នុងប្រទេសឥណ្ឌា គឺនៅសប្តាហ៍ទី 1 នៅក្នុងខែធ្នូនេះ។ ថ្មីៗនេះ ប្រទេសចិន ក៏ទទួលបានស្មាតហ្វូន vivo S5 ។ ស្មាតហ្វូន vivo V1945A/T ប្រហែលជាប្រភេទ Version ដែលទាបជាងស្មាតហ្វូន vivo S5 ដោយសារតែស្មាតហ្វូននេះ មានការឌីស្សាញផ្នែកខាងក្រោយដែលស្រដៀងគ្នានោះ៕