ថ្មីៗនេះ នៅលើវិបសាយរបស់ XDA Developers ត្រូវបានគេរកឃើញនូវឯកសារជាច្រើន ដែលមានការបង្ហាញអំពីមុខងារជាច្រើននៃប្រព័ន្ធកាមេរ៉ាថ្មី ដែលនឹងប្រើប្រាស់នៅលើ កម្មវិធី Samsung Camera app នេះ។ សម្រាប់មុខងារថ្មីៗទាំងនេះ គឺមានដូចជា Director's View, Single Take Photo, Night Hyperlapse, vertical panoramas, custom filters និងជាច្រើនទៀត។ អ្វីដែលគួរអោយចាប់អារម្មណ៍ទៀតនោះ ពួកគេក៏រកឃើញនូវភស្តុតាងជាច្រើន ដែលមានការបញ្ជាក់ថា ស្មាតហ្វូន Galaxy S11 នេះនឹងក្លាយជាស្មាតហ្វូន Samsung flagship ដំបូងបំផុតដែលនឹងទ្រទ្រង់ទៅលើការថតវីដេអូកម្រិត 8K ដែលនឹងប្រើប្រាស់នូវបន្ទះឈីប Exynos 990 ទៀតផង។
ប្រភពនេះបានបន្តថា ស្មាតហ្វូននេះ នឹងទ្រទ្រង់ទៅលើការថតវីដេអូកម្រិត 8K@30fps ទាំង encoding និង decoding ។ បន្ទះឈីប Snapdragon 865 របស់ក្រុមហ៊ុន Qualcomm ត្រូវបានគេរំពឹងថានឹងទ្រទ្រង់នូវវីដេអូកម្រិត 8K ផងដែរ។ ជាមួយនឹងបន្ទះឈីបដ៏ខ្លាំងក្លានេះ ការថតវីដេអូកម្រិត 8K នេះគឺទាមទារអោយមានសេនស័រកាមេរ៉ាដល់ទៅ 33,177,600 ឬភិចសែលដែលខ្ពស់ជាងនេះ។ ការបែកធ្លាយនាពេលថ្មីៗនេះមានការបញ្ជាក់ថា ស្មាតហ្វូន Galaxy S11 ប្រហែលជាមានកាមរ៉ាគោលដែលមានទំហំ 108MP ។ យ៉ាងណាមិញ យើងនៅមិនទាន់អាចធ្វើការកំណត់ទៅលើភាពខុសគ្នានៃសេនស័រ ISOCELL Bright HMX និងសេនស័រថ្មីដែលនឹងប្រើប្រាស់នៅលើស្មាតហ្វូនGalaxy S11 នេះ។
បន្ថែមពីនេះទៀតនោះ XDA Developers ក៏បានរកឃើញនូវឯកសារជាច្រើនដែលបញ្ជាក់ថាវានឹងមានអេក្រង់ប្រភេទ 20:9 aspect ratio ដែលនេះមានន័យថា ស្មាតហ្វូន flagship 2020 ជាច្រើនរបស់ក្រុមហ៊ុន Samsung នឹងមានកម្រិត aspect ratio ខ្ពស់ជាងមុនបន្តិច។ ស្មាតហ្វូន Galaxy S11 series នេះមានពាក្យចចាមអារ៉ាមថានឹងមានកម្រិត refresh rate ខ្ពស់ជាងមុនផងដែរ៕