បើសិនជាយើងនិយាយដល់ ស្មាតហ្វូនដែលមានអេក្រង់ទឹកធ្លាក់នោះ គឺប្រហែលជាក្លាយជារឿងចាស់ទៅហើយចាប់តាំងពីពេលដែលក្រុមហ៊ុន vivo និង Huawei ប្រើប្រាស់នូវអេក្រង់នេះ នៅលើស្មាតហ្វូន Flagships ជាច្រើនរបស់ពួកគេ។ ប៉ុន្តែថ្មីៗនេះ បច្ចេកវិទ្យានេះ គឺបានត្រឡប់មកជាថ្មីជាមួយនិង Samsung យោងតាមប៉ាតង់ថ្មីរបស់ក្រុមហ៊ុន Samsung នេះ គឺមានការបង្ហើបថា ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ ប្រហែលជាចូលរួមក្នុងការប្រើប្រាស់នូវអេក្រង់ទឹកធ្លាក់នេះផងដែរ។ របាយការណ៍ដំបូងបំផុតចេញពី LetsGoDigital បានបញ្ជាក់ថា ក្រុមហ៊ុននេះ ក៏ទទួលបាននូវប៉ាតង់ជាច្រើននៃស្មាតហ្វូនដែលមានអេក្រង់ទឹកធ្លាក់ដែលគែមរបស់វាពិតជាកោងខ្លាំងមែនទែន។
អ្វីដែលគួរអោយចាប់អារម្មណ៍ទៀតនោះ ប៉ាតង់នេះ គឺត្រូវបានផ្តល់ទៅគ្រប់ការិយាល័យកម្មសិទ្ធិបញ្ញាសំខាន់ៗដូចជា KIPO (ការិយាល័យកម្មសិទ្ធិបញ្ញាកូរ៉េ) ការិយាល័យ USPTO (ការិយាល័យប៉ាតង់និងពាណិជ្ជសញ្ញាសហរដ្ឋអាមេរិក) និង WIPO (ការិយាល័យកម្មសិទ្ធិបញ្ញាពិភពលោក) ដែលផ្តល់ការអនុញ្ញាតឱ្យប្រើប្រាស់ការរចនានេះនៅទូទាំងពិភពលោក។ នៅក្នុងករណីដែលអ្នកមានការងឿងឆ្ងល់នោះ ភាពខុសគ្នារវាងអេក្រង់ទឹកធ្លាក់ និងអេក្រង់ដែលមានគែមកោងធម្មតានោះគឺការពង្រីកទៅលើកម្រិតនៃគែមកោងរបស់វា។
អេក្រង់ទឹកធ្លាក់នេះគឺពិតជាមានគែមកោងមែនទែន ហើយវាគ្មានកន្លែងសម្រាប់ដាក់នូវប៊ូតុងសំឡេង ឬ Power នោះទេ។ នៅក្នុងកម្មវិធីប៉ាតង់ជាច្រើនរបស់ក្រុមហ៊ុនបច្ចេកវិទ្យា Samsung សម្រាប់ប៊ូតុង Power នេះគឺស្ថិតនៅផ្នែកខាងលើ។ យើងនៅមិនទាន់អាចរកឃើញនូវប៊ូតុងឡើងចុះសំឡេងនៅលើគែមរបស់ស្មាតហ្វូននេះនៅឡើយទេ ដូចនេះស្មាតហ្វូននេះប្រហែលជាប្រើប្រាស់នូវកម្មវិធី Software សម្រាប់គ្រប់គ្រងទៅលើប្រព័ន្ធសំឡេងនេះ។
គួររំលឹកផងដែរថា ស្មាតហ្វូន vivo Nex 3 និង Huawei Mate 30 Pro ក៏មានការបោះបង់ចោលនូវប៊ូតុងឡើងចុះសំឡេងផងដែរ។ ខណៈពេលដែលស្មាតហ្វូន Huawei Mate 30 Pro នេះមានភ្ជាប់ជាមួយនឹងប៊ូតុង Power ស្មាតហ្វន Nex 3 គឺប្រើប្រាស់នូវ pressure-sensitive នៅលើគែមរបស់វាវិញ។ ប៉ាតង់របស់ក្រុមហ៊ុនបច្ចេកវិទ្យា Samsung សម្រាប់អេក្រង់ទឹកធ្លាក់នេះគឺអាចគ្របដណ្តប់ទៅលើផ្នែកមួយប៉ុណ្ណោះរបស់ស្មាតហ្វូននេះ។ ប៉ុន្តែស្មាតហ្វូននេះក៏អាចមានគែមកោងទាំងពីរផងដែរ៕
