យោងទៅតាមរបាយការណ៍ថ្មីមួយ បានបង្ហាញថា មនុស្ស 23% នៃក្មេងជំទង់ គឺពឹងផ្អែកខ្លាំងមែនទែនទៅលើស្មាតហ្វូន។ នៅក្នុងការសិក្សាខាងលើដែលដកស្រង់ចេញពី King’s College London បានបញ្ជាក់ថា ការវក់លេងស្មាតហ្វូន គឺមានន័យថា ប្រសិនបើមនុស្សឈប់លេងស្មាតហ្វូននោះ ពួកគេនឹងក្លាយជាមនុស្សដែលប្លែក ឬមានអារម្មណ៍ខកចិត្តខ្លាំង។ បន្ថែមពីនេះទៀតនោះ ក្មេងជំទង់គឺមិនអាចធ្វើការគ្រប់គ្រងទៅលើរយៈពេលប៉ុន្មានដែលពួកគេចំណាយទៅលើស្មាតហ្វូនរបស់គេនោះទេ។ ការសិក្សានេះ បានព្រមានថា ការវក់លេងស្មាតហ្វូននេះ គឺផ្តល់នូវផលលំបាកដ៏មានគ្រោះថ្នាក់សម្រាប់សុខភាពផ្លូវចិត្ត។
ការសិក្សាស្រាវជ្រាវដែលចេញផ្សាយដោយ BMC Psychiatry ធ្វើការវិភាគទៅលើការសិក្សាចំនួន 41 ដែលមានក្មេងជំទង់ចំនួន 42,000នាក់។ ដូចនេះ ពួកគេរកឃើញថា 23% នៃការឆ្លើយតបនេះ គឺបញ្ជាក់ថាញៀនទៅនឹងស្មាតហ្វូន។ ឧទាហរណ៍ ដោយសារតែអសមត្ថភាពក្នុងការប្រើប្រាស់ស្មាតហ្វូននោះ (ដែលបង្កើតជាការធុញថប់អារម្មណ៍នោះ) នងការប្រើប្រាស់ស្មាតហ្វូនច្រើនហួសប្រមាណនោះ សកម្មភាពជាច្រើនផ្សេងទៀតក៏មានការថយចុះផងដែរ។ ការសិក្សាជាច្រើននិយាយថា ការវក់ទៅនឹងស្មាតហ្វូនប្រហែលជាបង្កើតចេញជាបញ្ហាជាច្រើនទៀតដូចជាបញ្ហាតានតឹងទៅលើអារម្មណ៍ មួរម៉ៅច្រើន គេងខ្វះម៉ោង និងការធ្លាក់ចុះទៅលើការសិក្សារៀនសូត្រនៅសាលារៀន។
លោក Nicola Kalk មកពីវិទ្យាស្ថានចិត្តសាស្រ្ត ចិត្តវិទ្យា និងប្រសាទវិទ្យានៅមហាវិទ្យាល័យ King College London និយាយថា ស្មាតហ្វូនជាច្រើននឹងបន្តកើតឡើង ហើយវាពិតជាចាំបាច់មែនទែនក្នុងការស្វែងយល់អំពីបញ្ហាជាច្រើននៃការប្រើប្រាស់ស្មាតហ្វូននេះ។ លោក Dr. Kalk និយាយបន្ថែមថា យើងនៅមិនទាន់ដឹងថាតើមនុស្សញៀននឹងប្រើប្រាស់ស្មាតហ្វូន ឬទៅលើកម្មវិធី Apps ដែលពួកគេប្រើប្រាស់នោះ។ វាត្រូវមានការលើកកំពស់ទៅលើការយល់ដឹងអំពីការប្រើប្រាស់ស្មាតហ្វូនសម្រាប់ក្មេងៗ និងក្មេងជំទង់ ហើយឪពុកម្តាយគួរតែដឹងថាតើកូនៗត្រូវចំណាយពេលប៉ុន្មាននៅលើស្មាតហ្វូនរបស់ពួកគេនោះ។
បន្ថែមពីនេះទៀតនោះ Amy Orben ដែលជាអ្នកស្រាវជ្រាវនៅក្នុងអង្គភាពវិទ្យាសាស្ត្រផ្នែកខួរក្បាលនិងវិទ្យាសាស្ត្រ MRC នៃសាកលវិទ្យាល័យខេមប្រ៊ីដ (University of Cambridge) ធ្វើការព្រមានប្រឆាំងទៅនឹងការសន្មត់ដែលថា វាមានការតភ្ជាប់រវាងបញ្ហានៃការប្រើប្រាស់ស្មាតហ្វូន និងលទ្ធផលនៃការធ្លាក់ទឹកចិត្ត។ វាគឺមានការបង្ហាញកាលពីពេលមុននេះថា ស្មាតហ្វូនពិតជាមានការប៉ះពាល់ច្រើន មិនមែនតែមួយផ្នែកនោះទេ ហើយវាក៏ប៉ះពាល់ទៅលើចំនួននៃការប្រើប្រាស់ស្មាតហ្វូនផងដែរ៕
