Realme គឺជាក្រុមហ៊ុនមួយដែលត្រូវបានគេដឹងថា បានបើកហាងដំបូងបំផុតរបស់ខ្លួនក្នុងនាមជាក្រុមហ៊ុនបុត្រសម្ព័ន្ធរបស់ក្រុមហ៊ុន OPPO នៅក្នុងប្រទេសឥណ្ឌា ហើយក្រោយមកម៉ាកយីហោនេះ ក៏ប្រកាសបង្ហាញខ្លួននៅក្នុងទីផ្សារកំណើតរបស់ខ្លួននោះគឺប្រទេសចិន។ ក្រុមហ៊ុននេះ ក៏ទទួលបានជោគជ័យខ្លាំងនៅលើទីផ្សារចាប់តាំងពីស្មាតហ្វូននៃម៉ាកយីហោរបស់ក្រុមហ៊ុនទាំងពីរនេះ គឺមកពីប្រភពក្រុមហ៊ុនធំតែមួយនោះ។ ទោះជាយ៉ាងណាក៏ដោយនោះ នាយកប្រតិបត្តិ និងជាស្ថាបនិករបស់ក្រុមហ៊ុន Realme បានប្រកាសអំពីការផ្លាស់ប្តូរគោលការណ៍ដ៏ធំរបស់ខ្លួនដែលប្រហែលជាអាចនឹងផ្លាស់ប្តូរទៅលើទស្សនីយភាពជាច្រើនសម្រាប់ទីផ្សារស្មាតហ្វូននៅក្នុងប្រទេសចិនចាប់ពីឆ្នាំក្រោយនេះ។
នាយកប្រតិបត្តិ និងជាស្ថាបនិករបស់ Realme រូបនេះ បានធ្វើការបង្ហោះនៅលើបណ្តាញសង្គម Weibo ថាចាប់ពីឆ្នាំ 2020 នេះ ខ្លួននឹងប្រកាសបង្ហាញស្មាតហ្វូន 5G ជាច្រើនម៉ូឌែលតែនៅក្នុងទីផ្សាររបស់ចិនប៉ុណ្ណោះ។ គាត់បញ្ជាក់ថា ម៉ាកយីហោនេះនឹងអាចបំបាត់ចោលស្មាតហ្វូន 4G មួយចំនួនចាប់ពីឆ្នាំក្រោយនេះ។ ព័ត៌មាននេះក៏មានការទម្លាយថា ក្រុមហ៊ុនផលិតស្មាតហ្វូនជាច្រើននៅក្នុងប្រទេសចិន នឹងមិនទាន់ធ្វើការអនុវត្តន៍នូវការផ្លាស់ប្តូរទៅកាន់បច្ចេកវិទ្យា 5G ទាំងស្រុងនៅឆ្នាំក្រោយនោះទេ។
លោក CEO មិនត្រឹមតែទម្លាយថា ស្មាតហ្វូននេះនឹងជាប្រភេទ Flagship ប៉ុណ្ណោះទេ ប៉ុន្តែវាក៏មានគម្រោងក្នុងការនាំយកនូវបច្ចេកវិទ្យា 5G នេះសម្រាប់ប្រើប្រាស់នៅលើស្មាតហ្វូនថ្នាក់កណ្តាល និងស្មាតហ្វូនលំដាប់ថវិកាជាច្រើនរបស់ខ្លួននៅក្នុងឆ្នាំក្រោយនេះផងដែរ។ តាមការបញ្ជាក់របស់ CEO នេះ គម្រោងនេះនឹងជួយអោយស្មាតហ្វូន 5G ជាច្រើនកាន់តែមានប្រជាប្រិយភាព និងអាចប្រើប្រាស់បានសម្រាប់យុវវ័យនោះ។ លោក CEO ប្រហែលជាកំពុងតែធ្វើការផ្សព្វផ្សាយទៅលើស្មាតហ្វូន 5G ដំបូងបំផុតរបស់ក្រុមហ៊ុននេះនោះ គឺ Realme X50 និង X50 Youth Edition ដែលត្រូវគេរំពឹងថា នឹងប្រកាសបង្ហាញខ្លួនឆាប់ៗនេះនៅក្នុងប្រទេសចិន៕