យោងតាមព័ត៌មានថ្មី បាននិយាយថា នៅសប្តាហ៍ក្រោយនេះ ស្មាតហ្វូនស៊េរីថ្មី Redmi K30 5G នឹងបង្ហាញខ្លួនហើយ។ ស្មាតហ្វូនស៊េរីថ្មីនេះ នឹងក្លាយជាស្មាតហ្វូន 5G ដំបូងបំផុតរបស់ក្រុមហ៊ុន Redmi។ នៅមុនព្រឹត្តិការណ៍នៃការសម្ពោធនេះ ព័ត៌មានលម្អិត និងការបែកធ្លាយជាច្រើនរបស់ស្មាតហ្វូននេះ ក៏មានការទម្លាយជាច្រើនផងដែរ។ នៅក្នុងរូបភាពផ្សព្វផ្សាយជាច្រើននេះក៏មានការទម្លាយផ្នែកខាងក្រោយរបស់ស្មាតហ្វូននេះផងដែរ។
សម្រាប់ការឌីស្សាញផ្នែកខាងក្រោយរបស់ស្មាតហ្វូន Redmi K30 5G នេះ មើលទៅដូចគ្នាទៅនឹងស្មាតហ្វូន OnePlus 7T និង OnePlus 7T Pro។ ស្មាតហ្វូននេះ មានភ្ជាប់ជាមួយនឹងកាមេរ៉ាខាងក្រោយ 4 គ្រាប់បញ្ឈរយ៉ាងស្រស់ស្អាត។ ទោះជាយ៉ាងណាក៏ដោយ វាមានការឌីស្សាញដែលមានរូបរាងជារង្វង់ដែលស្រដៀងគ្នាទៅនឹងស្មាតហ្វូន OnePlus 7T។ សម្រាប់រង្វង់នៃការឌីស្សាញទៅលើកាមេរ៉ានេះ គឺមានពណ៌ដូចគ្នាទៅនឹងស្មាតហ្វូននេះដែរ។ នៅខាងក្រោមសេនស័រនេះគឺមានភ្លើង dual-LED flash និងពាក្យថា “5G” និងម៉ាកយីហោ Redmi ថែមទៀត។
សម្រាប់កាមេរ៉ាខាងក្រោយរបស់ស្មាតហ្វូននេះ នៅមិនទាន់ដឹងនៅឡើយទេ ប៉ុន្តែអ្នកទម្លាយម្នាក់និយាយថាកាមេរ៉ាគោលរបស់វាមានទំហំ 60MP Sony IMX686 Sensor ខណៈពេលដែលប្រភេទ 4G version នឹងមានសេនស័រទំហំ 64MP sensor ។ យើងនៅមិនតាន់ដឹងនៅឡើយទេថាប្រសិនបើក្រុមហ៊ុន Redmi នឹងប្រើប្រាស់នូវសេនស័រដូចគ្នានៅលើស្មាតហ្វូនទាំងពីរនេះ។ អ្នកទម្លាយនេះនិយាយថា ស្មាតហ្វូន Redmi K30 នឹងមានកាមេរ៉ា 13 ultra wide angle + 8MP telephoto + 2MP sensor ថែមទៀត។ របាយការណ៍ជាច្រើនទៀត បាននិយាយថា ស្មាតហ្វូននេះ នឹងមានអេក្រង់ 6.6-inch IPS LCD ដែលមានកម្រិត 120Hz refresh rate និងរន្ធប្រហោង punch hole សម្រាប់កាមេរ៉ាពីរថែមទៀត។ ស្មាតហ្វូននេះនឹងមានថាមពលថ្មទំហំ 4500mAh ដល់ទៅ 5000mAh ជាមួយនឹងការទ្រទ្រង់នូវបច្ចេកវិទ្យា 27W fast charging ថែមទៀត។ស្មាតហ្វូននេះទ្រទ្រង់នូវបច្ចេកវិទ្យា NFC និងប្រព័ន្ធប្រតិបត្តិការ Android 10 ថែមទៀតផង៕