នៅក្នុងអំឡុងពេលសន្និសីទអ្នកអភិវឌ្ឍន៍ (Developers Conference) នៅខែតុលាឆ្នាំ 2019 ក្រុមហ៊ុន Samsung បង្ហាញនូវគំនិតស្មាតហ្វូនដែលអាចបត់បានរបស់ខ្លួន។ ស្មាតហ្វូននេះ មានយន្តការពត់កោងដែលមានរាងបញ្ឈរដូចទៅនឹងស្មាតហ្វូន Motorola RAZR 2019 ដែលត្រូវបានប្រកាសនាពេលថ្មីៗនេះ។ ស្មាតហ្វូននេះត្រូវគេរំពឹងថានឹងបង្ហាញខ្លួននៅត្រីមាសទី 1 នៃឆ្នាំ 2020 ហើយនឹងមានត្រចៀកបត់ដែល “ លាក់ខ្លួន” នៅលើស្មាតហ្វូននេះ។
នៅក្នុងពេលជិតដាច់ឆ្នាំ 2019 នេះ មួយឆ្នាំដំបូងរបស់ក្រុមហ៊ុន Samsung បន្ទាប់ពីការបង្ហាញវត្តមានរបស់ស្មាតហ្វូន Galaxy Fold ដំបូងបំផុតរបស់ខ្លួនផងដែរ។ តាមអ្វីដែលយើងបានដឹងរហូតមកទល់ពេលនេះ ក្រុមហ៊ុន Samsung ត្រូវគេរំពឹងថានឹងប្រកាសបង្ហាញស្មាតហ្វូនដែលអាចបត់បានចំនួន 2 ម៉ូឌែលផ្សេងទៀតនៅក្នុងឆ្នាំនេះដែលមួយនឹងជាជំនាន់បន្ទាប់របស់ស្មាតហ្វូន Galaxy Fold។ បើក្រឡេកមើលទៅលើការឌីស្សាញនោះ ស្មាតហ្វូនមួយនឹងមានការឌីស្សាញបត់បានជាប្រភេទ Clamshell (ការបត់បញ្ឈរ)។ នេះនឹងធ្វើអោយស្មាតហ្វូននេះមានទម្រង់នៃត្រចៀកបត់ថ្មីយ៉ាងស្រស់ស្អាត។
សម្រាប់ស្មាតហ្វូន Galaxy Fold ដែលមានការឌីស្សាញរូបរាងដែលអាចបត់បាននេះ ត្រូវបានគេរំពឹងថា នឹងមានភ្ជាប់ជាមួយនឹងត្រចៀកបត់ថ្មីដែលលាក់នៅលើស្មាតហ្វូននេះតែម្តង គឺថាវាមើលមិនងាយឃើញនោះទេ។ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងក៏ស្នើសុំនូវ Trademark ទៅលើ “Hideaway Hinge” ជាមួយនឹងការិយាល័យកម្មសិទ្ធិបញ្ញាសហភាពអ៊ឺរ៉ុប (EUIPO) ផងដែរ។ អ្វីដែលគួរអោយកត់សម្គាល់នោះគឺថា ការឌីស្សាញថ្មីនេះ អាចប្រើប្រាស់បាននៅលើស្មាតហ្វូន និងថេប្លេតចាប់តាំងពីក្រុមហ៊ុន Samsung ត្រូវបានធ្វើការនៅលើថេប្លេតដែលអាចបត់បាននេះ។
នៅមិនទាន់ច្បាស់នោះទេថា ស្មាតហ្វូនដែលអាចបត់បានទាំងពីរនេះនឹងមានភ្ជាប់ជាមួយនឹងការឌីស្សាញនូវត្រចៀកបត់ថ្មីនេះខណៈពេលដែលស្មាតហ្វូនដែលអាចបត់បាន Galaxy Fold 2 នឹងបង្ហាញខ្លួននៅក្នុងខែសីហា ឆ្នាំ 2020 នេះ។ ក្រុមហ៊ុន Samsung ត្រូវបានគេរំពឺងថា នឹងបង្ហាញខ្លួននៅលើប្រទេសច្រើនជាង 60 ប៉ុន្តែវាអាចនឹងមានបញ្ហាទៅលើតម្លៃរបស់វាផងដែរសម្រាប់ម៉ូឌែលថ្មីទាំងពីរនេះ៕