មកទល់នឹងពេលនេះ និន្នាការថ្មីសម្រាប់ស្មាតហ្វូនពេលបច្ចុប្បន្ននេះ គឺមានការអាប់ដែតមែនទែន រៀងរាល់សប្តាហ៍យើងឃើញការនាំយកនូវអ្វីដែលថ្មី ជាច្រើនសម្រាប់បង្ហាញនៅលើទីផ្សារ និងសម្រាប់អ្នកប្រើប្រាស់ជាច្រើនថែមទៀត។ ពេលនេះគឺ ដល់ពេលសម្រាប់ក្រុមហ៊ុន Motorola និងស្មាតហ្វូនប្រណិតជាច្រើនរបស់ខ្លួន នឹងវិលត្រឡប់ចូលមកទីផ្សារវិញផងដែរ។ គិតត្រឹមថ្ងៃនេះ ក្រុមហ៊ុន Motorola ត្រូវបានគេមើលឃើញថា បាននឹងកំពុងតែតស៊ូយ៉ាងខ្លាំងជាថ្មីម្តងទៀត ដើម្បីទទួលបាននូវតំណែងក្នុងទីផ្សារស្មាតហ្វូនឡើងវិញ។
បន្ទាប់ពីការផ្តោតទៅលើកិច្ចខិតខំប្រឹងប្រែងរបស់ខ្លួននៅលើស្មាតហ្វូនថ្នាក់ទាប និងស្មាតហ្វូនថ្នាក់កណ្តាលជាច្រើននោះ ពេលនេះក្រុមហ៊ុននេះ ក៏ចង់វិលត្រឡប់ចូលទៅក្នុងទីផ្សារវិញ ជាមួយនឹងស្មាតហ្វូនថ្នាក់ប្រណិតនៅក្នុងឆ្នាំ 2020 ខាងមុខនេះផងដែរ។ គួរបញ្ជាក់ថា បន្ទាប់ពីក្រុមហ៊ុន Motorola បានក្លាយជាម៉ាកយីហោមួយនៅក្រោមក្រុមហ៊ុន Lenovo នោះ គឺមានរឿងជាច្រើនដែលមានការផ្លាស់ប្តូរនៅក្នុងក្រុមហ៊ុននេះ ដោយសារតែវាធ្វើការផ្លាស់ប្តូរអ្វីគ្រប់យ៉ាងដែលខ្លួនបានធ្វើនៅលើស្មាតហ្វូនប្រភេទ Flagship នេះ។
គ្មានស្មាតហ្វូនរបស់ក្រុមហ៊ុន Motorola ស្ថិតនៅក្នុងប្រណិតថ្នាក់ប្រណិតនោះទេ ដែលមានវត្តមាននៅលើទីផ្សារនៅក្នុងរយៈពេល 2 ឆ្នាំនេះ។ ការប្រកួតប្រជែងរបស់ក្រុមហ៊ុន នេះក៏មានការធ្លាក់ចុះខ្លាំងផងដែរ។ បន្ទាប់ពីការប្រកាសបង្ហាញស្មាតហ្វូនMoto Z3 នៅក្នុងឆ្នាំ 2018 ស្មាតហ្វូននេះ ប្រើប្រាស់នូវបន្ទះឈីប Snapdragon 835។ នៅក្នុងឆ្នាំ 2019 នេះ ស្មាតហ្វូន Moto Z4 ក៏អាចនឹងបង្ហាញខ្លួនជាមួយនឹងបន្ទះឈីប Snapdragon 675 ផងដែរ ប៉ុន្តែអ្វីៗហាក់ដូចជាមិនទាន់មានស្ថានភាពល្អសម្រាប់ក្រុមហ៊ុន Motorola ទេ។
ប្រភពព័ត៌មានខាងលើនេះ បានបញ្ជាក់ថា វត្តមានរបស់ស្មាតហ្វូន Moto Razr របស់ក្រុមហ៊ុន Motorola គឺជាសញ្ញាយ៉ាងច្បាស់ដែលបង្ហាញថា ក្រុមហ៊ុននេះ នឹងបង្ហាញនូវអ្វីគ្រប់យ៉ាងរបស់ខ្លួននៅក្នុងឆ្នាំ 2020 ខាងមុខនេះ។ បន្ថែមពីនេះទៀត ក្រុមហ៊ុននេះ ត្រូវបានគេរំពឹងថា នឹងបង្ហាញនូវស្មាតហ្វូនថ្មីប្រណិតជាច្រើនរបស់ខ្លួននៅឆ្នាំក្រោយផងដែរ។ ស្មាតហ្វូននេះ អាចនឹងប្រើប្រាស់នូវបន្ទះឈីប Snapdragon 865 រួមជាមួយនិងបច្ចេកវិទ្យា 5G ថែមទៀតផង៕
