បន្ទាប់ពីមាននិយាយពី S11 Series នៅពេលនេះ យើងខ្ញុំ នឹងធ្វើការនិយាយអំពីស្មាតហ្វូន Galaxy Note 10 Lite វិញ។ សម្រាប់ស្មាតហ្វូននាពេលខាងមុខរបស់ក្រុមហ៊ុន Samsung នេះ នឹងមានលេខម៉ូឌែល SM-N770F ហើយស្មាតហ្វូននេះ ក៏ទទួលការអនុម័តពី FCCជាមួយនឹងការប្រើប្រាស់បានជាមួយ S Pen បានថែមទៀតផង។ នៅក្នុងព័ត៌មានចុងក្រោយបំផុតនេះ គឺមានការបញ្ជាក់ចេញពីគណនី Twitter ថា ស្មាតហ្វូន Note 10 Lite នឹងមានកាមេរ៉ាដែលស្រដៀងគ្នាទៅនឹងស្មាតហ្វូន iPhone 11 ។ តាមការបញ្ជាក់របស់គាត់ ស្មាតហ្វូននេះ នឹងមានកាមេរ៉ាតែ 3 គ្រាប់ប៉ុណ្ណោះ ដែល កាមេរ៉ាទី 1 + LED Flash បន្ទាប់មក គឺ កាមេរ៉ាទី 2 និងកាមេរ៉ាទី 3 ។
យោងតាមសំដីរបស់ Ishan Agarwal បាននិយាយថា វាហាក់ដូចជាស្មាតហ្វូន Samsung Galaxy Note10 lite នឹងមានកាមេរ៉ាផុសឡើង ដូចគ្នាទៅនឹងស្មាតហ្វូន iPhone 11 ផងដែរ។ វាមានការតម្រៀបជា 1st Cam + Flash 2nd Cam + 3rd Cam Blue S-Pen ជាមួយនឹង Silver/Aura Glow និងពណ៌ក្រហម និងខ្មៅសម្រាប់ធ្វើការជ្រើសរើសផងដែរ។ វានឹងស្រស់ស្អាតបែបនេះ! #Note10lite ព័ត៌មាននេះត្រូវបានផ្តល់ដោយអ្នកទម្លាយព័ត៌មាននេះដែលបញ្ជាក់ថា ស្មាតហ្វូននេះនឹងមានពណ៌ទឹកប្រាក់ Aura Glow ក្រហម និងខ្មៅ។ បន្ថែមពីនេះទៀតនោះ ស្មាតហ្វូននេះនឹងមានប៊ិច S Pen ពណ៌ខៀវថែមទៀត។ អេក្រង់របស់ស្មាតហ្វូននេះគឺសំប៉ែតរាបស្មើ និងមិនកោងនោះទេ។
ស្មាតហ្វូននេះនឹងប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ និងកាមេរ៉ារន្ធប្រហោងនៅខាងមុខរបស់អេក្រង់នេះដូចទៅនឹងស្មាតហ្វូន Note 10 និង 10 Plus ផងដែរ. មានការលើកឡើងថានៅលើ GeekBench មានការទម្លាយថា Galaxy Note 10 Lite នឹងមានលេខកូដ SM-N770F ។ បន្ថែមពីនេះទៀតនោះ ស្មាតហ្វូននេះមានបន្ទះឈីប Exynos 9810 chipset ជាមួយនឹងរ៉េមទំហំ 6GB ថែមទៀផង។ ស្មាតហ្វូននេះ មានពិន្ទុ Single-Core 667 និង Multi-Core 2030 ៕