ស្ថាប័នវិភាគទីផ្សារឧបករណ៍បច្ចេកវិទ្យា Canalys បានចេញរបាយការណ៍វិភាគថ្មីចុងក្រោយរបស់ខ្លួនដែលបានធ្វើការព្យាករណ៍ទាក់ទងនឹងការនាំចេញនូវឧករណ៍ឆ្លាតវៃ (Smart Devices) នៅរយះពេលពីរបីឆ្នាំខាងមុខទៀត។ ដោយក្នុងរបាយការណ៍ថ្មីនេះក្រុមហ៊ុនអ្នកវិភាគបានធ្វើការព្យាករណ៍ថាការនាំចេញនូវកាសស្តាប់ត្រចៀកឥតខ្សែ (Bluetooth Handset) នឹងមានការកើនឡើងយ៉ាងឆាប់រហ័សនៅរយះពេលពីរទៅបីឆ្នាំខាងមុខនេះ ហើយទូរស័ព្ទស្មាតហ្វូននៅតែជាឧបករណ៍ឆ្លាតវៃនាំមុខគេក្នុងទីផ្សារឧបករណ៍ឆ្លាតវៃដដែល។
nOក្នុងរបាយការណ៍ Canalys បាននិយាយថាការនាំចេញនូវឧបករណ៍ឆ្លាតវៃនឹងមានការកើនឡើងប្រមាណ 6.5% ស្មើរនឹងចំនួនសរុបដល់ទៅ 3 ពាន់លានគ្រឿងនៅឆ្នាំ 2023 កើនឡើងពីចំនួន 2.4 ពាន់លានគ្រឿងដែលបាននាំចេញកាលពីឆ្នាំ 2019 ហើយពាក់កណ្តាលនៃឧបករណ៍ឆ្លាតវៃទាំងនោះគឺជាស្មាតហ្វូនដែលនឹងមានចំនួន 1.5 ពាន់លានគ្រឿងដែលជាតួលេខកើនឡើងតិចតួចប៉ុណ្ណោះប៉ុន្តែស្របពេលជាមួយគ្នាការនាំចេញនូវឧបករណ៍ផ្សេងទៀតដូចជាម៉ាស៊ីនកុំព្យូទ័រប្រភេទ Desktop កុំព្យូទ័រយួរដៃ និងថាបប្លែតអាចនឹងមានការធ្លាក់ចុះ។ ហើយឧបករណ៍ឆ្លាតវៃដែលមានការនាំចេញធំបំផុតលំដាប់ទីពីរបន្ទាប់ពីស្មាតហ្វូនគឺជាកាសស្តាប់ត្រចៀកឥតខ្សែ ឬ True Wireless Headsets ដែលតាមការព្យាការណ៍ពីក្រុមអ្នកវិភាគរបស់ Canalys បានអោយដឹងថាការនាំចេញនឹងមានចំនួនឡើងដល់ 726 លានគ្រឿងឯណោះ។
ដោយក្នុងរយះពេលដ៏ខ្លីនេះក្រុមហ៊ុន Canalys បានព្យាករណ៍ថាទៀតថាការនាំចេញកាស True Wireless Headsets នឹងមានចំនួនកើនដល់ 490 លានគ្រឿងក្នុងឆ្នាំ 2020 នេះដែលកើនឡើងប្រមាណជា 32,1% បើធៀបនឹងឆ្នាំកន្លងទៅ។ ចំនែកឯឧបករណ៍បំពងសំឡេងឆ្លាតវៃ (Smart Speaker) ជាឧបករណ៍ឆ្លាតវៃបន្ទាប់ពីកាសស្តាប់ដែលនឹងមានកំណើននៃការនាំចេញកើនឡើងយ៉ាងឆាប់រហ័សបំផុតជាមួយកំណើនប្រមាណជា 21,7% ហើយក្រុមហ៊ុនផលិតកម្មមានជំនឿជាក់ថាការនាំចេញនូវ Smart Speaker នឹងមានចំនួន 150 លានគ្រឿងក្នុងឆ្នាំ 2020 នេះ ហើយនៅឆ្នាំ 2023 ឧបករណ៍នេះនឹងមានកើនប្រជាប្រិយភាពខ្លាំងក្លាបំផុតនៅក្នុងចំនោមឧបករណ៍កំសាន្តឆ្លាតវៃ។ សម្រាប់នាឡិកាដៃឆ្លាតវៃ (Smart Watch) នឹងកើនឡើងប្រមាណ 11.8% នៅឆ្នាំ 2020។
ក្រុមអ្នកវិភាគរបស់ Canalys ក៏បានធ្វើការវិភាគទៅលើអាជីវកម្មកាសឥតខ្សែ AirPods និងនាឡិកាឆ្លាតវៃរបស់ក្រុមហ៊ុន Apple ផងដែរថាប្រាក់ចំណូលដែល Apple ទទួលបានពីអាជីវកម្មទាំងពីរនេះនឹងមានចំនួនច្រើនលើសពីចំណូលនៃអាជីវកម្មម៉ាស៊ីនកុំព្យូទ័រ Mac និងឧបករណ៍ iPad នៅចុងឆ្នាំនេះ។ ទោះយ៉ាងណាក៏ដោយ Canalys បានចង្អុលបង្ហាញថា Apple នឹងត្រូវបានរារាំងពីដៃគូប្រកូតផ្សេងទៀតដែលកំពុងព្យាយាមជ្រៀតចូលទៅក្នុងប្រព័ន្ធអេកូឡូស៊ីនៃឧបករណ៍ឆ្លាតវៃទាំងនោះដែលមានលក្ខណះសម្បត្តិស្ទើរតែដូចគ្នាទាំងស្រុង និងផ្តល់នូវបទពិសោធន៍នៃការប្រើប្រាស់ស្រដៀងគ្នាផងដែរ៕