Samsung Electronics គឺជាក្រុមហ៊ុនបច្ចេកវិទ្យាមួយដ៏ល្បីល្បាញដែលគេស្គាល់ថាផលិតនូវផលិតផលប្រើប្រាស់ជាច្រើនចាប់ពីផលិតផលប្រើប្រាស់នៅក្នុងគេហដ្ឋានរហូតដល់ស្មាតហ្វូន។ ទោះជាយ៉ាងណាក៏ដោយនោះ ក្រុមហ៊ុនបច្ចេកវិទ្យានេះ ក៏ជាក្រុមហ៊ុនដែលនាំមុខគេទៅលើការផ្កត់ផ្គង់បន្ទះម៉េមូរី និងជាក្រុមហ៊ុនផលិតកំពូលទៅលើអេក្រង់ AMOLED នៅក្នុងពិភពលោកថែមទៀតផង។
នៅពេលនេះ ក្រុមហ៊ុនបច្ចេកវិទ្យានេះមានគម្រោងក្នុងការពង្រីកនូវសក្តានុពលរបស់ខ្លួនជាបន្តទៀតតាមរយៈការវិនិយោគទឹកប្រាក់ 500 លានដុល្លារអាមេរិកក្នុងការសាងសង់រោងចក្រផលិតអេក្រង់មួយនៅក្នុងប្រទេសឥណ្ឌានោះ។ ក្រុមហ៊ុនយក្សរបស់ប្រទេសកូរ៉េខាងត្បូងនេះក៏ធ្វើការតម្លើងនូវរោងចក្រថ្មីមួយនៅក្នុងទីក្រុងញ៉ូវដេលីដែលជារដ្ឋធានីរបស់ប្រទេសឥណ្ឌានោះ។ ការមកដល់នេះគឺធ្វើឡើងបន្ទាប់ពីក្រុមហ៊ុនបច្ចេកវិទ្យា Samsung ប្រកាសជាផ្លូវការអំពីទំហំនៃការវិនិយោគ និងគម្រោងក្នុងការដាក់ឯកសារជាមួយនឹងអង្គភាពត្រួតពិនិត្យរបស់ប្រទេសឥណ្ឌាផងដែរ។ រោងចក្រនេះនឹងផ្តោតទៅលើការផលិតអេក្រង់ជាច្រើនសម្រាប់ឧបករណ៍ជាច្រើនផ្សេងៗគ្នារួមមានស្មាតហ្វូន និងផលិតផល IoT ជាច្រើនទៀត។
តាមការបញ្ជាក់នៅក្នុងឯកសារនេះ ក្រុមហ៊ុន Samsung នឹងធ្វើការតម្លើងនូវរោងចក្រផលិតអេក្រង់របស់ខ្លួននៅក្នុងតំបន់ Noida ដែលមានការបែងចែកដីខ្លះដែលខ្លួនមានស្រាប់ធ្វើការសាងសង់នោះ។ រោងចក្រត្រូវគេអះអាងថាជារោងចក្រដែលធំជាងគេបំផុតក្នុងការផលិតស្មាតហ្វូនរបស់ពិភពលោក ហើយនៅឆ្នាំ 2018 ក្រុមហ៊ុននេះវិនិយោគទឹកប្រាក់អស់ជាង ៧០០ លានដុល្លារអាមេរិកថែមទៀតផង។ ជាមួយនឹងរោងងចក្រថ្មីនេះ ក្រុមហ៊ុនបច្ចេកវិទ្យា Samsung នឹងពឹងផ្អែកកាន់តែតិចទៅលើការនាំចូលបច្ចេកវិទ្យាជាច្រើនចេញពីប្រទេសជាច្រើន និងអាចធ្វើការផ្គត់ផ្គង់នូវសមាសភាគជាច្រើនដោយខ្លួនឯងនៅក្នុងតំបន់ថែមទៀត។
រោងចក្រផលិតអេក្រង់ថ្មីនេះក៏ជួយបង្កើនសមត្ថភាពផលិតកម្មដែលភាគច្រើននឹងទទួលបានអត្ថប្រយោជន៍ពីពន្ធរបស់រដ្ឋាភិបាលឥណ្ឌានិងការឧបត្ថម្ភធនលើការផលិតក្នុងស្រុក។ បច្ចុប្បន្នប្រទេសឥណ្ឌាគឺជាទីផ្សារស្មាតហ្វូនធំបំផុតលំដាប់ទី 2 នៅលើពិភពលោកដែលរដ្ឋាភិបាល បានទទួលស្គាល់ហើយដូច្នេះ ផ្តល់នូវការលើកទឹកចិត្តដល់ក្រុមហ៊ុនផលិតស្មាតហ្វូនជាច្រើនទៀត (OEMs) ដើម្បីបង្កើតរោងចក្រផលិតនិងដំឡើងរោងចក្ររបស់ពួកគេនៅក្នុងស្រុក
គួរកត់សម្គាល់នោះគឺថា ក្រុមហ៊ុន Samsung គឺជាយីហោដែលពេញនិយមបំផុតលំដាប់ទី 2 នៅក្នុងប្រទេសអាស៊ីអាគ្នេយ៍មួយនេះ។ ទោះយ៉ាងណាគេរំពឹងថា ម៉ាកយីហោចិន Realme អាចនឹងវ៉ាដាច់នៅត្រីមាសទី 4 ឆ្នាំ 2019 នេះ បើយោងតាមអ្នកវិភាគមួយចំននួនបានបញ្ជាក់នោះ។ ដូច្នេះការផ្លាស់ប្តូរនេះ អាចជួយឱ្យក្រុមហ៊ុន Samsung កំណត់តម្លៃលក់ស្មាតហ្វូន Galaxy របស់ខ្លួនកាន់តែមានលក្ខណៈប្រកួតប្រជែងខ្លាំងនាពេលអនាគត ដើម្បីឱ្យកាន់តែមានភាពពាក់ព័ន្ធនៅក្នុងនិន្នាការស្មាតហ្វូននាពេលបច្ចុប្បន្នខណៈក្រុមហ៊ុនបច្ចេកវិទ្យាយក្សរបស់ចិន ដូចជាក្រុមហ៊ុន Xiaomi កំពុងតែមានប្រជាប្រិយភាពកាន់តែខ្លាំងឡើងនៅក្នុងប្រទេសនេះផងដែរនោះ៕