នៅពេលនេះ ក្រុមហ៊ុន Samsung កំពុងតែត្រៀមខ្លួនសម្រាប់ព្រឹត្តិការណ៍នៃការសម្ភោធន៍នៅថ្ងៃទី 11 ខែកុម្ភៈខាងមុខនេះដែលក្រុមហ៊ុននេះ នឹងបង្ហាញនូវស្មាតហ្វូន Flagship ជំនាន់ថ្មីរបស់ខ្លួនដែលមានឈ្មោះថា Galaxy S20 និងស្មាតហ្វូន Galaxy Z Flip។ ក្រៅពីស្មាតហ្វូនទាំងនេះ ក្រុមហ៊ុននេះ ក៏នឹងបង្ហាញនូវកាសស្តាប់ឥតខ្សែស៊េរិថ្មីដែលឈ្មោះថា Galaxy Buds+ ផងដែរ។ ប៉ុន្មានសប្តាហ៍មុននេះ យើងបានឃើញនូវពាក្យចចាមអារ៉ាមជាច្រើន និងការបែកធ្លាយជាច្រើនទៀតនៅលើអនឡាញដែលមានការបង្ហាញអំពីព័ត៌មានរបស់ផលិតផលនេះ។ នៅពេលនេះ យើងនៅមិនទាន់បានដឹងអំពីកាសស្តាប់ថ្មីនេះច្រើននោះទេ។ យើងកំពុងតែមើលទៅលើរូបភាព Renders របស់កាសស្តាប់នេះដែលបង្ហាញអំពីការឌីស្សាញរូបរាងទាំងស្រុងរបស់វា។ បន្ថែមពីនេះទៀតនោះ យើងក៏មានព័ត៌មានដែលនិយាយអំពីពណ៌របស់កាសស្តាប់នេះផងដែរ។
ការទម្លាយនេះ គឺចេញពី MySmartPrice។ អ្នកទម្លាយព័ត៌មានដ៏ល្បីល្បាញរបស់ឥណ្ឌានេះ គឺមានឈ្មោះថា Ishan Agarwal (@ishanagarwal24) ថ្មីៗនេះ បានក៏ធ្វើការបង្ហោះជាមួយនឹងរូបភាព Renders ជាច្រើនសន្លឹករបស់កាសស្តាប់ Galaxy Buds+ នេះផងដែរ។ ដូចអ្វីដែលបានរំពឹងទុកនោះ រូបភាព Renders ដែលបែកធ្លាយនេះ គឺមានការបង្ហាញអំពីការឌីស្សាញទាំងស្រុងរបស់ផលិតផលនេះជាមួយនឹងពណ៌របស់វាថែមទៀត។ នៅក្នុងរូបភាពជាច្រើននេះ វាហាក់ដូចជាកាសស្តាប់ឥតខ្សែជំនាន់ថ្មីនេះគឺមើលទៅដូចគ្នាទៅនឹងជំនាន់ទី 1 នៃ Galaxy Buds ដែរ។ ជាក់ស្តែង សូម្បីតែប្រអប់បញ្ចូលថ្មរបស់វាក៏មានការឌីស្សាញដូចគ្នាផងដែរ។ លក្ខណៈខុសគ្នាគឺថាវាមានការបន្ថែមនូវប៊ូតុងមួយទៀតនៅខាងស្តាំជាប់ទៅនឹងភ្លើង LED ។
បើនិយាយអំពីពណ៌វិញនោះ កាសស្តាប់ Galaxy Buds+ នេះ នឹងបង្ហាញខ្លួនជាមួយនឹង 3 ពណ៌សម្រាប់ធ្វើការជ្រើសរើសនោះគឺពណ៌ខ្មៅ ពណ៌ស និងពណ៌ខៀវ។ កាសស្តាប់នេះក៏ទ្រទ្រង់ជាមួយនឹងបច្ចេកវិទ្យាបញ្ចូលថាមពលថ្មលឿនជាមួយនឹងរន្ធផត USB Type-C ថែមទៀតផង។ នៅក្នុងរបាយការណ៍ជាច្រើនកាលពីពេលមុននេះ កាសស្តាប់នេះនឹងមិនមានភ្ជាប់ជាមួយនឹងបច្ចេកវិទ្យា active noise cancellation នោះទេ។ សម្រាប់កាសស្តាប់ Buds+ នេះនឹងមានភ្ជាប់ជាមួយនឹង microphone ចំនួន ៤ ជាមួយនឹងថាមពលថ្មទំហំ 85mAh ថែមទៀតផង។ ថាមពលថ្មនេះ អាចប្រើប្រាស់បានយូរ។ សម្រាប់ពេលនេះ វានៅមិនទាន់មានការបញ្ជាក់អំពីតម្លៃរបស់វានៅឡើយទេ។ យើងអាចរំពឹងថា កាសស្តាប់ Galaxy Buds+ នេះនឹងមានតម្លៃស្រដៀងគ្នាទៅនឹងកាសស្តាប់ជំនាន់មុនដែរ។ ការប្រកាសបង្ហាញកាសស្តាប់នេះនឹងចាប់ផ្តើមនាពេលឆាប់ៗនេះ៕