ក្រុមហ៊ុន Samsung បានប្រើប្រាស់លោហៈធាតុប្រភេទអាលុយមីញ៉ូមសម្រាប់ធ្វើជាស៊ុមព័ទ្ធជុំវិញតួរស្មាតហ្វូនកំពូលរបស់ខ្លួនគឺ Galaxy S-Series ប្រមាណជាប្រាំជំនាន់មកហើយគឺចាប់តាំងពីជំនាន់ Galaxy S6 មកម្ល៉េះ។ យ៉ាងណាមិញស្រាប់តែពេលនេះមានការលេចលឺព័ត៌មានចចាមអារ៉ាមមកថា Samsung នឹងប្រើប្រាស់លោហៈធាតុប្រភេទដែកអ៊ីណុក ឬ Stainless-Steel ធ្វើជាស៊ុមព័ទ្ធជុំវិញរបស់កំពូលស្មាតហ្វូនជំនាន់ថ្មីដែលគេដឹងថាជាម៉ូដែល Samsung Galaxy S20 Ultra វិញ។
ព័ត៌មានបែកធ្លាយពីលក្ខណៈពិសេសនៃកំពូលស្មាតហ្វូនជំនាន់ថ្មីមួយនេះត្រូវបានបញ្ចេញដោយគណនីធ្វីស្ទ័រមួយដែលមានឈ្មោះថា @MaxWinebach។ យើងដឹងហើយថាបច្ចុប្បន្ននេះគឺមានតែក្រុមហ៊ុន Apple ទេដែលបានប្រើប្រាស់លោហៈធាតុប្រភេទដែកអ៊ីណុកសម្រាប់ធ្វើជាស៊ុមព័ទ្ធជុំវិញទូរស័ព្ទ iPhone របស់ខ្លួនដែលមកទល់នឹងពេលនេះគឺមាន iPhone បីជំនាន់ហើយដែលមានស៊ុមព័ទ្ធជុំវិញជា Stainless-Steel។ ជាមួយនឹងស៊ុម Stainless-Steel នេះវាមានភាពធន់ទៅនឹងការកកិតឆ្កូតបានយ៉ាងល្អ និងជួយធ្វើអោយតួររបស់ទូរស័ព្ទមានភាពរឹងមាំធន់ក្នុងប្រើប្រាស់បំផុត។
ចំពោះព័ត៌មាននៃការប្រើប្រាស់ដែកអ៊ីណុកសម្រាប់ធ្វើស៊ុមជុំវិញរបស់កំពូលស្មាតហ្វូន Galaxy S20 Ultra គឺជាដំណឹងដ៏រីករាយបំផុតចំពោះហ្វែននៃស្មាតហ្វូន Galaxy S ប៉ុន្តែវាក៏នឹងចោទជាបញ្ហាខ្លះដែរសម្រាប់អ្នកប្រើប្រាស់ព្រោះថាការប្រើប្រាស់ស៊ុមជាដែកបែបនេះអាចធ្វើអោយទំងន់ស្មាតហ្វូនកើនឡើងដល់ 200 ក្រាម ដែលជាទំងន់ដែលអ្នកប្រើប្រាស់មិនចង់បានសម្រាប់កំពូលស្មាតហ្វូន ព្រោះថាពួកគេចង់បានស្មាតហ្វូនបែបប្រណិតដែលមានទំងន់ស្រាលល្មមផ្តល់ភាពងាយស្រួលក្នុងការកាន់ប្រើប្រាស់ដោយដៃម្ខាង។
យ៉ាងណាមិញនេះគ្រាន់តែជាព័ត៌មានចចាមអារ៉ាមប៉ុណ្ណោះ ហើយចំពោះលក្ខណៈសម្បត្តិ និងគុណសម្បតិ្តលម្អិតទូទៅនៃកំពូលស្មាតហ្វូនជំនាន់ថ្មីរបស់ Samsung យើងនឹងបានដឹងច្បាស់ទាំងអស់គ្នានៅក្នុងព្រឹត្តិការណ៍ Galaxy Unpacked 2020 ដែលនឹងរៀបចំធ្វើឡើងនៅដើមខែក្រោយនេះក្នុងព្រឹត្តិការណ៍ Mobile World Congress (MWC2020) ជាក់ជាមិនខាន៕