ក្រុមហ៊ុនផលិតស្មាតហ្វូនម៉ាក realme របស់ចិននឹងប្រកាសបង្ហាញចេញកំពូលស្មាតហ្វូនជំនាន់ថ្មីម៉ាក realme X50 Pro របស់ខ្លួននៅរយះពេល 10 ថ្ងៃខាងមុខទៀតនេះដោយព្រឹតិ្តការដាក់សម្ពោធផលិតផល ស្មាតហ្វូនជំនាន់ថ្មីនេះគឺត្រូវធ្វើឡើងតាមរយះអនឡាញ (Livestream) ក្រោយពីក្រុមហ៊ុនបានប្រកាសមិនចូលរួមក្នុងព្រឹត្តិការណ៍សមាជពិភពទូរស័ព្ធពិភពលោកដែលហៅថាកាត់ថា “MWC2020” ដោយផ្ទាល់។ ចំពោះកំពូលស្មាតហ្វូនជំនាន់ថ្មីរបស់ Realme មួយនេះមានការលេចធ្លាយចេញនូវព័ត៌មានចចាមអារ៉ាមជាច្រើនដែលបាននិយាយពីគុណសម្បត្តិ និងលក្ខណៈពិសេសៗមួយចំនួនរបស់វាមិនដាច់ផងដែរ។
យ៉ាងណាមិញខណៈពេលនេះបើតាមរយះផ្ទាំងរូបភាព Poster មួយដែលបង្ហាញចេញដោយសាខាក្រុមហ៊ុន Realme ប្រចាំនៅទីផ្សារតំបន់អឺរ៉ុបផ្ទាល់បានបញ្ជាក់អោយគ្រប់គ្នាដឹងថា “កំពូលស្មាតហ្វូន realme X50 Pro នឹងពាក់ផ្ទៃមុខដោយបន្ទះអេក្រង់ Super AMOLED FullScreen Display ដែលមានកម្រិតល្បឿន 90Hz ដូចនេះនឹងធ្វើអោយការចុចបញ្ជាកម្មវិធីនៅលើអេក្រង់របស់ស្មាតហ្វូនជំនាន់ថ្មីមួយនេះមានភាពរអិលល្អបំផុត”។ បន្ថែមពីនេះអេក្រង់របស់ស្មាតហ្វូនជំនាន់ថ្មីនេះគឺជាប្រភេទអេក្រង់ទំលុះ Punch-hole Display ដែលបង្កប់ដោយលែនកាមេរ៉ាសែលហ្វីចំនួនពីរគ្រាប់ស្ថិតនៅជិតកែងខាងឆ្វេងនៃអេក្រង់ខាងលើ។
ស្មាតហ្វូននេះត្រូវបានគេដឹងទៀតថានឹងដំឡើងមកជាមួយនឹងកញ្ចប់កាមេរ៉ាថតរូបផ្នែកខាងក្រោយចំនួន 4 គ្រាប់ទៀតផង។ ដោយឡែកបើយោងទៅលើប្រភពព័ត៌មានដែលបានបែកធ្លាយកន្លងមកបានអោយដឹងថា “កំពូលស្មាតហ្វូន realme X50 Pro នឹងប្រើប្រាស់បន្ទះឈីប Snapdragon 865 មានរ៉េមទំហំ 12GB ជាមួយអង្គផ្ទុកទិន្នន័យទំហំយ៉ាងហោចណាស់ក៏ 256GB និងដំឡើងមកជាមួយប្រតិបត្តិការ Android 10 ស្រោបផ្ទៃមុខដោយ realme UI v1.0 ផ្ទាល់តែម្តង”។
ស្មាតហ្វូនជំនាន់ថ្មីដែលមានលេខកូដតួរ RMX2071 នេះនឹងទ្រទ្រង់នូវបច្ចេកវិទ្យាសាកថាមពលចូលល្បឿនលឿនដូចរន្ទះ SuperDart Charge កំលាំង 65W ហើយវាក៏ជាស្មាតហ្វូនដំបូងរបស់ realme ដែលត្រូវចេញលក់លើទីផ្សារសកលដោយទ្រទ្រង់ជាមួយនឹងប្រព័ន្ធសេវា 5G ផងដែរ៕
