បច្ចុប្បន្នក្រុមហ៊ុនអាជីវកម្មផលិតបន្ទះឈីបដែលធំបំផុតរបស់ពិភពលោកគឺ TSMC (Taiwan Semiconductor Manufacturing Company, Limited) ដែលមានមូលដ្ឋាននៅកោះតៃវ៉ាន់ ហើយបន្ទះឈីបដែលមានខ្នាតតូចបំផុតរបស់ក្រុមហ៊ុននេះនាពេលបច្ចុប្បន្នគឺ 7nm (ណាណូម៉ែត្រ)។ បើយោងតាមរបាយការណ៍ថ្មីមួយដែលបានចេញពីប្រព័ន្ធផ្សព្វផ្សាយរបស់កោះតៃវ៉ាន់ផ្ទាល់ (Taiwan Media Report) បានចុះផ្សាយអោយដឹងថាក្រុមហ៊ុន TSMC បាននឹងកំពុងរៀបចំសង្វាក់ផលិតកម្មលើបន្ទះឈីបថ្មីដែលមានខ្នាតតូចជាងមុនគឺត្រឹមតែ 5nm ក្នុងទ្រង់ទ្រាយធំ ហើយការផលិតនឹងត្រូវចាប់ផ្តើមនៅត្រីមាសទី 2 ក្នុងឆ្នាំ 2020 នេះ។
បន្ទះឈីបជំនាន់ថ្មីចុងក្រោយនេះត្រូវបានគេដឹងថាគឺមានតម្រូវការខ្ពស់បំផុតពីក្រុមហ៊ុនដៃគូរបស់ TSMC ដែលកំពុងនាំមុខក្នុងឧស្សាហកម្មបន្ទះឈីបដូចជា Huawei HiSilicon, Apple, Qualcomm, Supermicro និង Bitmain ជាដើម។ ហើយបច្ចុប្បន្ននេះក្រុមហ៊ុន TSMC គឺបាននឹងកំពុងធ្វើការងារលើគម្រោងផលិតឈីបជំនាន់ថ្មីនេះយ៉ាងខ្លាំងព្រោះតែការបញ្ជាទិញពីដៃគូគឺមានចំនួនច្រើនលើសលប់។ ក្រុមហ៊ុន Huawei HiSilicon ត្រូវបានគេរាយការណ៍ថានឹងប្រើប្រាស់ខ្នាតស្តង់ដារបន្ទះឈីប 5nm processor នេះក្នុងបរិមាណដ៏ច្រើនលើសលប់សម្រាប់បន្ទះឈីប Kirin 5G ជំនាន់ថ្មីចុងក្រោយរបស់ខ្លួន។ ជាងនេះទៅទៀតបន្ទះឈីបជំនាន់ថ្មី A14 របស់ Apple នឹងប្រើខ្នាតស្តង់ដារថ្មីនេះផងដែរ។
លើសពីនេះទៅទៀតម៉ូឌឹមសេវា 5G baseband X6 និង Snapdragon 875 Mobile phone chip ជំនាន់ថ្មីរបស់ Qualcomm ក៏នឹងប្រើខ្នាតស្តង់ដារថ្មីនេះដូចគ្នាដែរ។ យ៉ាងណាក៏ដោយបើយោងតាមរបាយការណ៍ដែលបានចុះផ្សាយក្នុងពេលថ្មីៗនេះបានអោយដឹងថាក្រុមហ៊ុន TSMC នឹងធ្វើការកាត់បន្ថយសង្វាស់ផ្គត់ផ្គង់របស់ខ្លួនដល់ក្រុមហ៊ុន Huawei។ ក្នុងរបាយការណ៍នោះបានអះអាងថា TSMC បាននឹងកំពុងសម្របសម្រួលដល់ក្រុមហ៊ុនផលិតជាច្រើនទៀតផងដែរ ហើយការកាត់បន្ថយការផ្គត់ផ្គង់ដល់ Huawei នេះត្រូវបានគេដឹងថាអាចជាប់ពាក់ព័ន្ធនឹងផែនការណ៍ថ្មីចុងក្រោយរបស់សហរដ្ឋអាមេរិកទៅលើក្រុមហ៊ុនបច្ចេកវិទ្យាយក្សរបស់ចិនមួយនេះ។
សហរដ្ឋអាមេរិកត្រូវបានគេដឹងថាមានផែនការណ៍ថ្មីដើម្បីកំនត់បរិមាណផ្គត់ផ្គង់សមាសភាគរបស់ក្រុមហ៊ុនបច្ចេកវិទ្យាអាមេរិកដល់ក្រុមហ៊ុន Huawei ពី 25% ទៅ 10%។ ដោយឡែកបើយោងតាមសារព័ត៌មានតៃវ៉ាន់បានជឿជាក់ថាបញ្ហានៃការពង្រីកដែនកំណត់ទំហំនៃការផ្គត់ផ្គង់សម្រាប់ទីផ្សារនេះអាចនឹងមានរយះពេលតែមួយរយៈប៉ុណ្ណោះ។ ហើយវានឹងមិនមានផលប៉ះពាល់ដល់ TSMC នោះទេ។ ទោះបីជាក្រុមហ៊ុនបានកាត់បន្ថយការផ្គត់ផ្គង់ដល់ក្រុមហ៊ុន Huawei ក៏ដោយចុះវាក៏នៅមានក្រុមហ៊ុនដៃគូជាច្រើនទៀតបានធ្វើការបញ្ជាទិញរួចហើយដែរ។ យ៉ាងណាមិញដំណើរការផលិតបន្ទះឈីបខ្នាត 5nm របស់ TSMC គឺនឹងចាប់ផ្តើមវាយលុកទីផ្សារមុនគូប្រកូតប្រហែលកន្លះឆ្នាំមុន ហើយវាក៏នឹងក្តោបបានទីផ្សារសំខាន់ៗផងដែរក្នុងឆ្នាំនេះ។ ឈីប Qualcomm X60 ត្រូវបានគេជឿជាក់ថាគឺជាឈីបដំបូងគេដែលប្រើប្រាស់បច្ចេកវិទ្យាស្តង់ដារថ្មីចុងក្រោយនេះ ហើយឈីបនេះត្រូវបានគេព្យាករណ៍ថានឹងមានចេញលក់លើទីផ្សារនៅឆមាសទីដំបូងនាឆ្នាំក្រោយនេះ (2021)៕
