ក្រោយពីបាននាំចេញទៅប្រកាសដាក់លក់ក្នុងទីផ្សារប្រទេសចិនកាលពី 2 ថ្ងៃមុននេះ ឥលូវនេះស្មាតហ្វូនអេក្រង់បត់ជំនានថ្មី Samsung Galaxy Z Flip ត្រូវបានក្រុមហ៊ុនធ្វើការនាំយកទៅប្រកាសដាក់លក់នៅលើទីផ្សារប្រទេសឥណ្ឌាផងដែរ។ ចំពោះតម្លៃរបស់ស្មាតហ្វូនបត់ជំនាន់ថ្មីដែលនឹងត្រូវចេញលក់ក្នុងប្រទេសឥណ្ឌាគឺខ្ទង់ Rs1,09,999 (រ៉ូពី) ឬប្រហែលជាង $1,527 សម្រាប់ម៉ូដែលដែលមានរ៉េមទំហំ 8GB និងអង្គផ្ទុកទិន្នន័យ 256GB។
Samsung នឹងចាប់ផ្តើមការចេញលក់ស្មាតហ្វូនអេក្រង់បត់ជំនាន់ថ្មីនេះចាប់ពីថ្ងៃទី 26 ក្នុងខែកុម្ភះ នេះតាមរយះបណ្តាហាងលក់រាយមួយចំនួន, ហាង Samsung e-Store និងបណ្តាហាង e-commerce ល្បីៗក្នុងប្រទេសឥណ្ឌាផ្សេងៗទៀត។ សម្រាប់អតិថិជនដែលមានបំណងចង់ជាវស្មាតហ្វូន Galaxy Z Flip យកទៅប្រើប្រាស់អាចធ្វើការកក់ទុកមុនបានចាប់ពីថ្ងៃនេះទៅ។
Samsung Galaxy Z Flip គឺជាស្មាតហ្វូនអេក្រង់បត់ម៉ូដែលទីពីរបន្ទាប់ពី Galaxy Fold ដែលចេញកាលពីដើមឆ្នាំ 2019។ ស្មាតហ្វូនអេក្រង់បត់ជំនាន់ថ្មីនេះមានការរចនារូបរាងខុសប្លែងពីជំនាន់ទីមួយទាំងស្រុងតែម្តងគឺប្តូរពីការបត់បែបចំហៀងមកកាច់បត់ឡើងលើដូចទូរស័ព្ទ Flip phone កាលពីជាង 10 ឆ្នាំមុន ឬស្ទាយបត់ដូច Motorola Razr 2019 ដែរ។ Galaxy Flip បំពាក់នូវអេក្រង់បត់ជាកញ្ចក់ស្តើងហៅថា “Ultra-Thin Glass” មិនមែនអេក្រង់ Plastic Display ដូចនៅ Galaxy Fold, Moto Razr 2019 និង Huawei Mate X នោះឡើយ។ អេក្រង់របស់ Galaxy Z Flip មានទំហំលាត 6.7” ប្រភេទបន្ទះបង្ហាញប្រើបច្ចេកវិទ្យា Dynamic AMOLED Infinity-O Display ដែលទ្រទ្រង់ការបង្ហាញបានត្រឹមកម្រិត Full-HD+ ប៉ុណ្ណោះមិនដល់ QHD+ នោះទេ។
ចំនែកនៅផ្នែកខាងក្រោយរបស់វាវិញចែកចេញជាពីរដោយផ្នែកនិមួយៗត្រូវបានស្រោបដោយកញ្ចក់ការពារ Corning Gorilla Glass 6 និងភ្ជាប់ដោយគន្លឹះបត់ ឬហៅថា “Hint” ដែលផលិតឡើងពីសារធាតុសរសៃរកាបោនពិសេសដែលធន់នឹងការកាច់បត់ចុះឡើង និងមានសំលេងស្ងាត់ល្អ។ ស្មាតហ្វូននេះ មានស៊ុមជុំវិញតួរខ្លួនជាអាលុយមីញ៉ូម ហើយនៅលើផ្ទៃខ្នងខាងក្រោយជិតគែមខាងលើបន្តិចគឺមាននូវអេក្រង់តូចមួយមានទំហំ 1.1” ប្រភេទ Super AMOLED Display សម្រាប់មើលសារជូនដំណឹងផ្សេងនៅពេលវាបត់អេក្រង់មេ។
Galaxy Z Flip មានកាមេរ៉ាក្រោយពីរគ្រាប់ដោយ 1 គ្រាប់ៗមានទំហំ 12MP មួយគ្រាប់មាន aperture f/1.8 ជាលែនគោលភ្ជាប់នូវមុខងារ Dual Pixel PDAF និង OIS និងមួយគ្រាប់ទៀតមាន aperture f/2.2 ជាប្រភេទ Ultra wide angle lens។ សម្រាប់កាមេរ៉ាមុខវិញមានទំហំ 10MP ដែលបង្កប់នៅក្នុងប្រជ្រុយលើថ្ងាសអេក្រង់តែម្តងសម្រាប់សែលហ្វី និងវីដេអូខល។ ចំពោះកំលាំងម៉ាស៊ីនរបស់វាវិញគឺរត់លើឈីប Snapdragon 855+ ជាមួយអង្គក្រាហ្វិច Adreno 640 ប្រតិបត្តិការដោយ Android 10 និងស្រោបដោយ Samsung OneUI2.0។ Galaxy Z Flip មានថ្មទំហំ 3,300mAh ទ្រទ្រង់បច្ចេកវិទ្យាសាកភ្លើងចូលកំលាំង 15W តាមរយះខ្សែចម្លង USB-C។ សម្រាប់ប្រព័ន្ធសុវត្ថិភាពវិញ វាប្រើប្រាស់បច្ចេក វិទ្យាស្កែនក្រយ៉ៅម្រាមដៃស្ថិតនៅលើចំហៀងខាងស្តាំ។ បន្ថែមពីនេះ Galaxy Z Flip ទ្រទ្រង់ប្រព័ន្ធសេវា 4LTE, Wi-Fi Dual Band, Bluetooth v5.0, Dual frequency GPS និងបំពាក់នូវប្រព័ន្ធសំលេង AKG Stereo Speaker៕