កាលពីចុងឆ្នាំមុននេះ ក្រុមហ៊ុន Huawei និងក្រុមហ៊ុនបុត្រសម្ព័ន្ធរបស់ខ្លួន Honor បានប្រកាសបង្ហាញនូវ Smart Screen ដំបូងបំផុតរបស់ខ្លួន។ ក្រុមហ៊ុននេះ បាននិយាយថា Smart Screen ទាំងនេះ នឹងធ្វើការជំនួសស្មាតហ្វូន ហើយក៏នឹងក្លាយជាមជ្ឈមណ្ឌលទំនាក់ទំនងថែមទៀតផង។ Smart Screen អាចនឹងប្រើប្រាស់សម្រាប់ជាលក្ខណៈគ្រួសារប៉ុណ្ណោះ។ ប៉ុន្តែសម្រាប់ការងារនៅក្នុងការិយាល័យនោះ Smart Screen នឹងមានបន្ថែមនូវមុខងារជាច្រើនទៀត។
នៅថ្ងៃនេះ IT Home បានរាយការណ៍ថា ក្រុមហ៊ុន Huawei នឹងត្រៀមបង្ហាញនូវផលិតផលដូចគ្នា ដែលមានឈ្មោះហៅថា Huawei corporate smart screen។ ក្រុមហ៊ុននេះ ក៏បានប្រកាសចេញនូវផ្ទាំងផ្សព្វផ្សាយចំនួន 2 ផងដែរដែលបង្ហាញអំពីលក្ខណៈពិសេសរបស់ផលិតផលថ្មីនេះថែមទៀតផង។ ក្រុមហ៊ុននេះ បានអះអាងថា នៅលើផ្ទាំងផ្សព្វផ្សាយនេះ Huawei corporate smart screen នឹងនាំយកនូវបច្ចេកវិទ្យាថ្មី និងភាពស្រស់ស្អាតក្នុងការប្រើប្រាស់នៅក្នុងការិយាល័យ និងការឌីស្សាញរូបរាងកាន់តែស្រស់ស្អាតថែមទៀត។ អេក្រង់ធំ គឺពិតជាល្អមែនទែនក្នុងការប្រើប្រាស់នៅក្នុងការិយាល័យ។ផលិតផល Smart Screen សម្រាប់ក្រុមហ៊ុនសហគ្រាសនេះអាចធ្វើការតភ្ជាប់ទៅកាន់ស្មាតហ្វូន និងកុំព្យូទ័រជាច្រើនទៀតដើម្បីការសហការគ្នាជាប្រភេទ Multi-Screen។
Huawei corporate smart screen ក៏មានភ្ជាប់ជាមួយនឹងកាមេរ៉ា តួខ្លួនធ្វើពីលោហធាតុ និងបច្ចេកវិទ្យាជាច្រើនទៀតល្អបំផុតក្នុងការប្រើប្រាស់។ សម្រាប់សន្និសីទអនឡាញរបស់ក្រុមហ៊ុន Huawei នឹងធ្វើឡើងនៅវេលាម៉ោង 21:00 នៅក្នុងទីក្រុងប៉េកាំងនៅថ្ងៃទី 24 ខែកុម្ភៈខាងមុខនេះ។ នៅថ្ងៃដដែលនោះ ក្រុមហ៊ុនបច្ចេកវិទ្យានេះ ក៏នឹងប្រកាសបង្ហាញនូវផលិតផលជាច្រើនទៀតដូជជា Huawei Mate XS ថេប្លេត Huawei 2020 MateBook X Pro, Kirin chip និងជាច្រើនទៀតផងដែរ។ ផលិតផលទាំងនេះក៏មានគម្រោងដាក់តាំងបង្ហាញនូវក្នុងព្រឹត្តិការណ៍ MWC 2020 ប៉ុន្តែពេលនេះកម្មវិធីនេះត្រូវបានលុបចោលហើយ។