ថ្មីៗនេះ ក្រុមហ៊ុន OPPO ត្រូវបានគេមើលឃើញថា បាននឹងកំពុងតែធ្វើការនៅលើនាឡិកាស្មាតវ៉ចដំបូងបំផុតរបស់ខ្លួន ដែលត្រូវបានគេរំពឹងថា នឹងបង្ហាញខ្លួននៅក្នុងពេលឆាប់ៗនេះហើយ។ កាលពីពេលថ្មីៗកន្លងទៅនេះ យើងបានឃើញនូវរូបភាពមុខនាឡិកាជ្រុង ដែលមានអេក្រង់ OLED យ៉ាងស្រស់ស្អាតទាក់ចិត្តបំផុត។ នាឡិកានេះ មានរូបភាព Render ថ្មីទៀតហើយរបស់នាឡិកានេះ ដែលមានការចែកចាយនៅលើអ៊ីនធឺណិតនោះ។
សម្រាប់រូបភាព Render ថ្មីនេះ គឺមានការផ្តោតទៅលើអេក្រង់របស់នាឡិកានេះដែលមានកញ្ចក់ប្រភេទជា 3D កោងយ៉ាងស្រស់ស្អាត។ អេក្រង់កោងនេះធ្វើអោយនាឡិកានេះមើលទៅប្រណិតបំផុតគួរអោយចង់ប្រើប្រាស់ ហើយវាមានការរំពឹងថានឹងជានិន្នាការថ្មីសម្រាប់នាឡិកាស្មាតវ៉ចនេះថែមទៀត។ ខុសប្លែកពីរូបភាព render ដំបូងបំផុតរបស់នាឡិកានេះគឺមានគែមពណ៌មាស និងខ្សែជាប្រភេទស្បែក និងប្រភេទ Silicone ហើយពេលនេះវាមានគែមពណ៌ប្រផេះទឹកប្រាក់ និងខ្សែស្បែកពណ៌ខ្មៅវិញ។ ពេលនេះ យើងអាចដឹងថានាឡិកានេះ នឹងមានពីរពណ៌សម្រាប់ធ្វើការជ្រើសរើស។
រូបភាពនេះគឺច្បាស់ល្អងដែលផ្នែកប៊ូតុងនៅលើនាឡិកានេះក៏អាចមើលឃើញបានយ៉ាងច្បាស់ផងដែរ។ យើងនៅមិនទាន់ច្បាស់អំពីមុខងារនៃប៊ូតុងទាំង 2 នេះនៅឡើយទេ។ វាមានការរាយការណ៍កាលពីពេលមុននេះថា នាឡិកាស្មាតវ៉ច OPPO Smartwatch នឹងអាចដំណើរការជា ECG/EKG បាន ប៉ុន្តែក្រោយមកព័ត៌មាននេះត្រូវបានលុបចោលទៅវិញ។ យើងនៅមិនទាន់ច្បាស់ថាតើវានឹងមានសមត្ថភាពខ្លាំងដូចការរំពឹងទុកដែរឬទេ។
នាឡិកា OPPO Smartwatch នៅមិនទាន់ដឹងអំពីកាលបរិច្ឆេទនៃការប្រកាសបង្ហាញវត្តមានរបស់វានៅឡើយទេ ប៉ុន្តែយើងអាចដឹងថា ក្រុមហ៊ុន OPPO នឹងប្រកាសបង្ហាញវាជាមួយនឹងវត្តមានរបស់ស្មាតហ្វូន Find X2 flagship ជាក់ជាមិនខាន។ ស្មាតហ្វូន Find X2 flagshipនេះនឹងត្រៀមប្រកាសបង្ហាញខ្លួននៅក្នុងព្រឹត្តិការណ៍ MWC នៅសប្តាហ៍ក្រោយនេះតាមការគ្រោងទុក ប៉ុន្តែពេលនេះ មានការផ្លាស់ប្តូរទៅកាន់ខែមីនា ឆ្នាំ 2020 នេះហើយដោយសារតែព្រឹត្តិការណ៍ MWC 2020ត្រូវបានរំសាយចោលនៅក្នុងឆ្នាំនេះនោះ៕
