យើងដឹងហើយថាបច្ចុប្បន្នក្រុមហ៊ុនផលិតស្មាតហ្វូនកំពូលៗក្នុងពិភពលោកមានដូចជាក្រុមហ៊ុន Apple របស់សរដ្ឋអាមេរិក, Samsung របស់កូរ៉េខាងត្បូង និង Huawei របស់ចិនពូកគេបានធ្វើការស្រាវជ្រាវ និងអភិឌ្ឍផលិតបន្ទះឈីបផ្ទាល់ខ្លួនសម្រាប់ប្រើនៅលើស្មាតហ្វូនរបស់ពួកគេអស់រយះពេលជាច្រើនឆ្នាំមកហើយ។ ហើយការផលិតបន្ទះឈីបផ្ទាល់ខ្លួនរបស់ក្រុមហ៊ុនបិតាបច្ចេកវិទ្យាស្មាតហ្វូនលំដាប់ថ្នាក់កំពូលក្នុងពិភពលោកទាំងបីនេះគឺបានធ្វើអោយក្រុមហ៊ុនរបស់ពួកកាត់បន្ថយការពឹងអាស្រ័យទៅលើក្រុមហ៊ុនផលិតបន្ទះឈីបដូចជា Qualcomm និង MediaTek ជាដើម។
យ៉ាងណាមិញនៅពេលនេះ មានក្រុមហ៊ុនផលិតស្មាតហ្វូនល្បីឈ្មោះរបស់ប្រទេសចិនចំនួន 3 ក្រុមហ៊ុន ទៀតដែលបានប្រកាសពីគម្រោងក្នុងផលិតបន្ទះឈីបផ្ទាល់ខ្លួនសម្រាប់ប្រើនៅលើស្មាតហ្វូនរបស់ពួកគេដូចក្រុមហ៊ុនធំៗទាំងបីខាងលើនេះផងដែរ។ យោងតាមរបាយការណ៍ថ្មីមួយដែលដកស្រង់ការផ្សាយដោយបណ្តាញសារព័ត៌មាន CNBet បានអោយដឹងថា “នាយកប្រតិបត្តិជាន់ខ្ពស់របស់ក្រុមហ៊ុន Oppo ថ្មីៗនេះបានធ្វើការចែកចាយចេញនូវអនុស្សរណៈផ្ទៃក្នុងមួយដែលបង្ហាញពីផែនការមួយដែលហៅថា “Mariana Plan” ដែលត្រូវបានគេដឹងច្បាស់ថាជាគម្រោងការក្នុងរៀបចំផលិតបន្ទះឈីបស្មាតហ្វូនផ្ទាល់ខ្លួននៅពេលអនាគត។
ដោយគំនិតផ្តួចផ្តើមក្នុងការផលិតបន្ទះឈីបផ្ទាល់ខ្លួននេះត្រូវបានគេថាទៀតថាបានដឹកនាំដោយគណៈកម្មាធិការបច្ចេកទេសដែលជាអតីតនាយកបច្ចេកទេសនៅក្រុមហ៊ុន Qualcomm ដែលជាដៃគូផ្គត់ផ្គង់បន្ទះឈីបធំបំផុតមួយរបស់ក្រុមហ៊ុន Oppo ក្នុងពេលបច្ចុប្បន្នថែមទៀតផង។ ហើយដើម្បីជួយពន្លឿនដំណើរការលើគម្រោងការទាំងមូលក្រុមវិស្វករបច្ចេកទេសរបស់ក្រុមហ៊ុន OnePlus និង Realme ក៏ត្រូវបានគេរាយការណ៍ដែរថាបានត្រៀមខ្លួនចូលរួមក្នុងក្រុមសម្រាប់ការងារនេះផងដែរ ដែលនេះវាជាសញ្ញាសបញ្ជាក់ថាក្រុមហ៊ុន Oppo បានកំពុងធ្វើដំណើរឆ្ពោះទៅរកការរចនាបន្ទះឈីបថ្មីផ្ទាល់ខ្លួនដែលអាចត្រូវបានប្រើប្រាស់ដោយក្រុមហ៊ុនបុត្រសម្ព័ន្ធរបស់ខ្លួនផងដែរ។
ថ្លែងប្រាប់ទៅកាន់បណ្តាញសារព័ត៌មាន C114News កាលពីពេលថ្មីៗនេះ ក្រុមហ៊ុន Oppo បានបង្ហើបថា “គោលដៅចុងក្រោយរបស់ខ្លួនក្នុងការផលិតឈីបគឺដើម្បីបម្រើអតិថិជនឱ្យបានល្អ។ ហើយទោះយ៉ាងណាក៏ដោយក្រុមហ៊ុនបានសង្កត់ធ្ងន់ថាការផ្លាស់ប្តូរនេះគឺជាការវិនិយោគរយៈពេលវែងជាជាងការប៉ុនប៉ងប្រកួតប្រជែងជាមួយក្រុមហ៊ុន Qualcomm និង MediaTek ហើយក្រុមហ៊ុនទាំងពីរនេះនៅតែជាដៃគូអាជីវកម្មដ៏ល្អរបស់ក្រុមហ៊ុន Oppo ដដែល។ ដោយឡែកក្នុងពេលថ្មីៗនេះក្រុមហ៊ុន Oppo បានប្រកាសអំពីគម្រោងក្នុងការចំណាយថវិកាប្រមាណ 7 ពាន់លានដុល្លារអាមេរិកសម្រាប់ការវិនិយោគលើការស្រាវជ្រាវ និងអភិវឌ្ឍក្នុងរយៈពេល 3 ឆ្នាំខាងមុខ ហើយភាគច្រើននៃកញ្ចប់ថវិកានេះនឹងត្រូវបានប្រើដើម្បីអភិវឌ្ឍបន្ទះឈីបរបស់ខ្លួនសម្រាប់ប្រើនៅលើស្មាតហ្វូនម៉ាក Oppo, OnePlus និង Realme ជាដើម៕
