Foxconn គឺជាក្រុមហ៊ុនដៃគូសហការឧស្សាហកម្មដ៏សំខាន់បំផុតរបស់ក្រុមហ៊ុន Apple បានបញ្ជាក់ទៅកាន់វិនិយោគិនជាច្រើនរបស់ខ្លួនថា ពួកគេអាចធ្វើការផលិតនូវស្មាតហ្វូនម៉ូឌែល iPhone 12 (5G) ទាន់ពេលវេលានៅក្នុងរដូវក្តៅខាងមុខនេះ ខណៈដែលវិនិយោគិនជាច្រើន មានការភ័យខ្លាចជាមួយនឹងសាយភាយនៃមេរោគ Covid-19 ដោយរំពឹងថា កាលវិភាគនៃផលិតកម្មនេះ នឹងមានការប៉ះពាល់ដោយសារតែការផ្ទុះឡើងនៃវីរុសនេះ។
កាលពីខែមុននេះ ក្រុមហ៊ុន Foxconn បានប្រាប់ទៅកានវិនិយោគិនជាច្រើនរបស់ខ្លួនថា ខ្លួនបានប្រឈមមុខទៅនឹងការធ្លាក់ចុះ ដោយសារតែប្រជាជនចិននៅក្នុងស្រុកជាច្រើន ត្រូវបានបង្ខាំងខ្លួននៅក្នុងផ្ទះ ហើយតាមប្រទេសនានា ក៏មានការរឹតបន្តឹងទៅលើការធ្វើដំណើរអន្តរជាតិ រួមនិងភាពវឹកវរជាច្រើនទៀត ដោយសារតែមេរោគរាតត្បាតកូរ៉ូណាវីរុស។ លោក Alex Yang ដែលជា ប្រធានផ្នែកទំនាក់ទំនងសាធារណៈ បាននិយាយនៅក្នុងសន្និសីទមួយ ដែលរៀបចំឡើងដោយ Goldman Sachs ថា រោងចក្រផលិតរបស់ពួកគេនឹងចាប់ផ្តើមនៅក្នុងខែមិថុនាខាងមុខនេះ ហើយវត្តមានរបស់ស្មាតហ្វូន iPhones ថ្មីនេះនឹងបង្ហាញខ្លួនទាន់ពេលវេលា។
សូមជំរាបថា កាលពីខែកុម្ភៈកន្លងទៅនេះ ក្រុមហ៊ុន Foxconn ដែលមានមូលដ្ឋាននៅក្នុងតៃវ៉ាន់នេះ បានតស៊ូយ៉ាងខ្លាំងនៅក្នុងការពង្រឹងទៅលើសមត្ថភាពផលិតផលរបស់ខ្លួន បន្ទាប់ពីមានការផ្ទុះឡើងនៃមេរោគកូរ៉ូណាវីរុស ដែលធ្វើអោយមានការពន្យារពេលដល់អ្នកធ្វើការជាច្រើន រាប់ពាន់នាក់ នៅក្នុងផលិតកម្ម iPhone និងផលិតផលអេឡិចត្រូនិចជាច្រើនទៀតនៅក្នុងប្រទេសចិន។ ក្រុមហ៊ុនបានបញ្ជាក់ថា ដើម្បីបន្តនូវប្រតិបត្តិការជាច្រើនឡើងវិញ ខ្លួននឹងចំណាយពេលវេលាប្រហែលជា 1 ខែដើម្បីគ្រប់គ្រងទៅលើស្ថានភាពនេះ៕