Apple Stores នៅក្នុងសហរដ្ឋអាមេរិក បានប្រកាសបិទទ្វារជាថ្មីម្តងទៀត ដោយសារតែមេរោគកូរ៉ូណាថ្មី បាននឹងកំពុងតែសាយភាយកាន់តែខ្លាំង

ក្រុមហ៊ុនសាជីវកម្ម Apple បានជូនដំណឹងទៅកាន់បុគ្គលិកជាច្រើនថា គ្រប់ហាងលក់រាយទាំងអស់នៅក្នុងសហរដ្ឋអាមេរិកនឹងធ្វើការបិទទ្វាររហូតដល់ខែឧសភានេះ។ បន្ថែមពីនេះទៀតនោះ នៅក្នុងការប្រកាសរបស់ក្រុមហ៊ុន Apple បានអះអាងថា ថ្នាក់ដឹកនាំគឺរៀបចំនូវកិច្ចប្រជុំជារៀងរាល់ថ្ងៃ នៅក្នុងពេលនៃការរីករាលដាលនៃមេរោគ COVID-19 នេះ។ សូមជំរាបថា កាលពីពេលមុននេះក្រុមហ៊ុន Apple ក៏បានបង្ហាញនូវសេចក្តីប្រកាសសម្រាប់ផ្ទៃក្នុងថា ហាងលក់រាយជាច្រើនរបស់ក្រុមហ៊ុន Apple នៅក្រៅប្រទេសចិនត្រូវគេរំពឹងថា នឹងបន្តនូវប្រតិបត្តិការរបស់ខ្លួនឡើងវិញនៅដើមខែមេសានេះ។ 

កាលពីដើមខែមីនានៅក្នុងឆ្នាំនេះ ក្រុមហ៊ុន Apple បានបិទនូវហាងទាំងអស់ចំនួន 458 កន្លែងរបស់ខ្លួននៅក្រៅប្រទេសចិនផងដែរ។ ក្រុមហ៊ុននេះ្ក៏ជម្រុញនូវបុគ្គលិកជាច្រើនរបស់ខ្លួនអោយធ្វើការពីផ្ទះផងដែរ។ នេះគឺជាវិធានការណ៍មួយដើម្បីបញ្ឈប់នូវការរីករាលដាលនៃមេរោគកូរ៉ូណានេះ។ នៅក្នុងខែមីនានេះ គ្រប់ហាងលក់ Apple Stores នៅក្នុងប្រទេសចិន បានបើកដំណើរការវិញផងដែរ។ ក្រុមហ៊ុន Apple ក៏បានធ្វើការអរគុណដល់ក្រុមប្រតិបត្តិការរបស់ខ្លួន និងដៃគូរជាច្រើនរបស់ខ្លួនសម្រាប់កិច្ចខិតខំប្រឹងប្រែងរបស់ខ្លួនក្នុងការបើកនូវខ្សែសង្វាក់ផ្គត់ផ្គង់របស់ខ្លួនផងដែរ។

តាមការបញ្ជាក់របស់លោក Deirdre O’Brien បានអោយដឹងថា ក្រុមហ៊ុន នៅតែបន្តនូវការឃ្លាំមើលស្ថានភាពនៃវីរុសនេះយ៉ាងម៉ត់ចត់បំផុត។ ទោះបីជាហាងទាំងនេះ នឹងបន្តក្នុងការបិទទ្វារនៅក្នុងខែឧសភានេះ វានឹងមានការបើកទ្វារឡើងវិញប្រសិនបើស្ថានភាពនេះល្អប្រសើរនោះ។ ក្រុមហ៊ុននេះ ក៏ពឹងផ្អែកទៅលើអនុសាសន៍ពីរដ្ឋាភិបាលក្នុងស្រុក និងអ្នកជំនាញផ្នែកសុខភាពសាធារណៈផងដែរ។ លោក  O’Brien បាននិយាយទៀតថា ហាងលក់ Apple Stores មួយចំនួននឹងបើកទ្វារនៅក្នុងឆមាសទី 1 គឺចាប់ពីខែមេសានេះ។ ទោះជាយ៉ាងណាក៏ដោយនោះ មានការបង្ហាញថា ស្ថានភាពនេះ មិនអាចទៅរួចបាននោះទេនៅក្នុងស្ថានភាពបច្ចុប្បន្ននៅក្នុងសហរដ្ឋអាមេរិកនោះ។

សូមជំរាបថា បច្ចុប្បន្ននេះ សហរដ្ឋអាមេរិក គឺជាប្រទេសមួយដែលរងគ្រោះថ្នាក់ខ្លាំងបំផុតដោយមេរោគកូរ៉ូណាថ្មីនេះ។ សម្រាប់ពេលនេះ ករណីនៃអ្នកឆ្លងមេរោគ COVID-19 នេះក៏មានការកើនឡើងផងដែរ។ កាលពីម្សិលមិញនេះ អ្នកឆ្លងមេរោគនេះមានចំនួនច្រើនជាង 245,000 នាក់នៅក្នុងសហរដ្ឋអាមេរិក។ សម្រាប់ពេលនេះ ការបង្ខាំងខ្លួន គឺជាជម្រើសមួយដែលល្អបំផុតសម្រាប់ប្រជាជនអាមេរិក៕