ខណៈពេលដែលជំងឺរលាកសួតដ៏កាចសាហាវប្រភេទថ្មីហៅថាកូវីដ 19 បានរីករាលដាលជាសកលនៅកំឡុងខែមិនា ដែលពីដំបូងឡើងមេរោគនេះបានផ្ទុះឡើងខ្លាំងនៅទីក្រុង Wuhan ប្រទេសចិន ដែលធ្វើអោយសេដ្ឋកិច្ចក្នុងប្រទេសមហាអំណាចសេដ្ឋកិច្ចក្នុងតំបន់អាស៊ីមួយនេះទទួលរងផលប៉ះពាល់យ៉ាងខ្លាំង ដោយសារតែប្រតិបត្តិការទីផ្សារស្ទើរទូទាំងប្រទេសត្រូវបានបិទ។ ដោយឡែកស្ថានភាពនៃការរីករាលដាលមេរោគកូវីដ 19 នៅក្នុងប្រទេសចិនបច្ចុប្បន្នគឺមានលក្ខណៈល្អប្រសើរឡើងវិញហើយប្រតិបត្តិការទីផ្សារក៏ត្រូវបានបើកដំណើរការឡើងវិញផងដែរ។
ដូច្នេះហើយនេះ គឺជាពេលដែលក្រុមហ៊ុនផលិតស្មាតហ្វូនក្នុងប្រទេសនេះ បានត្រៀមខ្លួនសម្រាប់ការប្រកាសចេញទូរស័ព្ទស្មាតហ្វូនជំនាន់ថ្មីៗរបស់ពួកគេដើម្បីវាយលុកទីផ្សារក្នុងខែមេសានេះផងដែរ។ ដូច្នេះខាងក្រោមនេះគឺជាស្មាតហ្វូនស៊េរីថ្មីរបស់ក្រុមហ៊ុនល្បីៗរបស់ចិនត្រៀមបង្ហាញខ្លួនក្នុងខែមេសា 2020 នេះ៖
1-Honor Play 4T ៖ ក្រុមហ៊ុនផលិតស្មាតហ្វូនម៉ាក Honor ត្រូវបានគេដឹងថាត្រៀមខ្លួនប្រកាសចេញស្មាតហ្វូនស៊េរីថ្មី Honor Play 4T នៅថ្ងៃទី 09 ក្នុងខែមេសានេះ។ ហើយស្មាតហ្វូនជំនាន់ថ្មីនេះក៏នឹងមានមកជាមួយម៉ូដែល Pro ផងដែរដោយស្មាតហ្វូនស៊េរីថ្មីនេះត្រូវបានគេរំពឹងទៀតថានឹងមានទីផ្សារល្អដូចជំនាន់មុនក្នុងស្រឡាយ Honor Play របស់វាថែមទៀតផង។
2-OPPO Ace 2៖ សម្រាប់ក្រុមហ៊ុន OPPO វិញត្រូវបានគេទម្លាយព័ត៌មានមកថាបានត្រៀមបញ្ចេញស្មាតហ្វូនស៊េរីថ្មីម៉ូដែល Ace 2 ដែលជាម៉ូដែលជំនាន់ថ្មីទីពីរក្នុងសែស្រឡាយស្មាតហ្វូន Oppo Reno Ace ដែលចេញកាលពីឆ្នាំទៅ។ ស្មាតហ្វូននេះត្រូវបានគេនិយាយថានឹងភ្ជាប់មកជាមួយនឹងបច្ចេកវិទ្យាសាកថ្មល្បឿនលឿនទាំងការសាកតាមខ្សែ និងឥតប្រើខែ្ស។ ស្មាតហ្វូនជំនាន់ថ្មីនេះនឹងត្រូវប្រកាសចេញនៅថ្ងៃទី 13 ក្នុងខែមេសានេះ។
3-OnePlus 8 Series ៖ ប្រាកដណាស់យើងទាំងអស់គ្នាបាននឹងកំពុងទន្ធឹងរងចាំការមកដល់នៃរបស់ស្មាតហ្វូនបីសាចល្បឿនជំនាន់ថ្មីរបស់ក្រុមហ៊ុន OnePlus មួយនេះ បន្ទាប់ពីពួកវាត្រួវបានក្រុមហ៊ុនធ្វើការពន្យាពេលប្រកាសចេញជាច្រើនលើកដោយសារតែបញ្ហារីករាលដាលនៃមេរោគកូវីដ 19។ យ៉ាងណាមិញតាមប្រភពព័ត៌មានច្បាស់ការណ៍ថាស្មាតហ្វូននេះនឹងប្រកាសចេញនៅចិននាថ្ងៃទី 16 ខែមេសានេះ ប៉ុន្តែសម្រាប់ទីផ្សារប្រទេសឥណ្ឌាវិញនឹងត្រូវប្រកាសចេញមុនថ្ងៃទី 14 ក្នុងខែមេសានេះផងដែរ។
4-Honor 30 ៖ ស្មាតហ្វូនរបស់ក្រុមហ៊ុន Sub-Brand របស់ Huawei មួយនេះត្រួវបានគេដឹងថាគឺជាម៉ូដែលកំពូលរបស់ក្រុមហ៊ុន Honor ដែលនឹងប្រើប្រាស់ផ្នែករឹងនៃប្រព័ន្ធកាមេរ៉ាថតរូប (Camera Hardware) របស់កំពូលស្មាតហ្វូនជំនាន់ថ្មី Huawei P40 Series ដែលក្រុមហ៊ុនទើបតែបានធ្វើការប្រកាសចេញក្នុងពេលថ្មីៗនេះ។ កំពូលស្មាតហ្វូនម៉ាក Honor មួយនេះនឹងត្រួវប្រកាសចេញនាថ្ងៃទី 15 ក្នុងខែមេសានេះ។
5-Meizu M17 ៖ ក្រុមហ៊ុន Meizu ក៏បានត្រៀមប្រលែងចេញកំពូលស្មាតហ្វូនជំនាន់ថ្មីរបស់ខ្លួនផងដែរគឺម៉ូដែល Meizu 17 ក្នុងខែមេសានេះដែលអាចនៅថ្ងៃទី 15។ ហើយស្មាតហ្វូនជំនាន់ថ្មីនេះត្រូវបានគេរំពឹងថាជាស្មាតហ្វូនដំបូងរបស់ Meizu ដែលបានដំឡើងមកជាមួយនឹងប្រព័ន្ធបណ្តាញសេវា 5G Connectivity ថែមទៀតផង។
6-Huawei Nova 7 Series ៖ ងាកមកក្រុមហ៊ុន Huawei វិញត្រូវបានគេដឹងថាបានត្រៀមបញ្ចេញស្រឡាយស្មាតហ្វូនពាក់កណ្តាលប្រណិត (Premium Mid-Range) គឺ Huawei Nova 7 Series នៅថ្ងៃទី 23 ក្នុងខែមេសានេះ។ ស្មាតហ្វូនជំនាន់ថ្មីត្រូវបានគេដឹងថានឹងមានដល់ទៅបីម៉ូដែលគឺ Huawei Nova 7 SE 5G, Nova 7 5G និង Nova 7 Pro 5G។
ក្រៅពីផលិតផលដែលបានបញ្ជាក់ទាំងអស់ខាងលើនេះទំនងជាយើងនឹងឃើញមានការប្រកាសកាន់តែច្រើននូវស្មាតហ្វូនស៊េរីថ្មីៗពីម៉ាកល្បីៗដូចជា OPPO និងផលិតផលផ្សេងៗទៀតនៅពេលឈានចូលដល់សប្តាហ៍ទី 2 នៃខែមេសា៕
