ក្រុមហ៊ុនផលិតស្មាតហ្វូនរបស់ចិន Vivo បានត្រៀមខ្លួនក្នុងការបង្ហាញនូវស្មាតហ្វូនស៊េរីថ្មិ Y17 នៅក្នុងប្រទេសឥណ្ឌាមុនដាច់ឆ្នាំនេះ នេះបើតាមការអះអាងនៅក្នុងរបាយការណ៍ថ្មីមួយ។ កន្លងមក ក្រុមហ៊ុននេះ នៅមិនទាន់ទម្លាយបង្ហាញព័ត៌មានអ្វីជាផ្លូវការរបស់ស្មាតហ្វូននេះនៅឡើយទេ ប៉ុន្តែនៅក្នុងព័ត៌មានបែកធ្លាយ គឺមានបញ្ជាក់អំពីលក្ខណៈសម្បត្តិរបស់វា និងរូបភាពរបស់ស្មាតហ្វូននេះផងដែរ។
ស្មាតហ្វូននេះមានការរចនារូបរាងប្រហាក់ប្រហែលគ្នាទៅនឹងស្មាតហ្វូន Y series ដូចជាស្មាតហ្វូន Y91 អញ្ចឹងដែរ គឺមានអេក្រង់ waterdrop notch display នៅផ្នែកខាងមុខ និងកាមេរ៉ាច្រើនគ្រាប់នៅផ្នែកខាងក្រោយរបស់វារួមជាមួយនឹងប្រព័ន្ធស្កេនក្រយ៉ៅដៃផងដែរ។ ស្មាតហ្វូន Y17 នេះ មានរ៉េមទំហំ 4GB និងម៉េមូរីក្នុងម៉់ាស៊ីនទំហំ 128GB ហើយវាមានថាមពលថ្មទំហំ 5,000 mAh ថែមទៀតផង។ ស្មាតហ្វូននេះមានកាមេរ៉ាខាងមុខទំហំ 20MP selfie ប៉ុន្តែយើងនៅមិនទាន់មានព័ត៌មានលម្អិតនៃកាមេរ៉ា ៣ គ្រាប់នៅខាងក្រោយរបស់ស្មាតហ្វូននេះនៅឡើយទេ។
ព័ត៌មានបែកធ្លាយនេះ បានបញ្ជាក់ថា ស្មាតហ្វូន vivo Y17 នេះ នឹងប្រើប្រាស់ជាមួយនឹងបន្ទះឈីប Helio P35 SoC ហើយវាមានអេក្រង់ទំហំ 6.35-inch ថែមទៀតផង។ សម្រាប់កាលបរិច្ឆេទនៃការបង្ហាញវត្តមានរបស់ស្មាតហ្វូននេះ គឺនៅមិនទាន់មានបញ្ជាក់អោយដឹងនៅឡើយទេ ប៉ុន្តែយើងសង្ឃឹមថា នឹងបានដឹងពីក្រុមហ៊ុន vivo ក្នុងពេលឆាប់ៗនេះ។