Meitu Mobile ដែលជាក្រុមហ៊ុនអភិវឌ្ឍកម្មវិធីកែប្រែរូបភាពរបស់ចិន បានប្រកាសអំពីគម្រោងរបស់ខ្លួនក្នុងការបោះបង់ចោលនូវអាជីវកម្មស្មាតហ្វូនរបស់ខ្លួននៅថ្ងៃទី 14 ខែមេសានេះហើយ។ អាជីវកម្មស្មាតហ្វូននេះ នឹងត្រូវផ្ទេរអោយទៅកាន់ក្រុមហ៊ុន Xiaomi Corporation វិញ។ ក្រុមហ៊ុន Meitu បាននិយាយនៅក្នុងសេចក្តីថ្លែងការណ៍មួយថា “ការបង្កើតនូវស្មាតហ្វូនជាច្រើន ដែលផ្តល់នូវភាពស្រស់ស្អាតសម្រាប់អ្នកប្រើប្រាស់នោះ គឺមានន័យថា មានការបំពេញទៅលើតម្រូវការនៅលើទីផ្សារ ប៉ុន្តែមិនមែនមានន័យថា ការលក់ស្មាតហ្វូននេះ នៅក្នុងបរិមាណចំនួនតិចនោះទេ យើងមិនអាចធ្វើការកាត់បន្ថយតម្លៃនៃការផលិត ដើម្បីប្រកួតប្រជែងជាមួយនឹងក្រុមហ៊ុនជាច្រើនទៅលើតម្លៃរបស់វា។
ក្រុមហ៊ុនបានបន្តថា អាជីវកម្មស្មាតហ្វូននេះ នឹងធ្វើការបិទទ្វារនៅពាក់កណ្តាលឆ្នាំនេះ ដោយបានធ្វើការផ្តាច់មុខទៅកាន់ក្រុមហ៊ុន Xiaomi Corporation ។” តាមការបញ្ជាក់នៅក្នុងរបាយការណ៍ហិរញ្ញវត្ថុរបស់ក្រុមហ៊ុន Meitu នោះ បានអោយដឹងថា ប្រាក់ចំណេញរបស់ក្រុមហ៊ុននេះ ទៅលើអាជីវកម្មអ៊ីនធឺណិតរបស់ខ្លួន គឺមានការកើនឡើងដល់ទៅ 26.3% បើធៀបជាមួយនឹងឆ្នាំមុននេះ ជាមួយនឹងទឹកប្រាក់ចំនួន 948 លានយ៉ន់ ($141.31 លានដុល្លារអាមេរិក) នៅក្នុងឆ្នាំ 2018នេះ ខណៈពេលដែលប្រាក់ចំណេញរបស់ Smart Hardware គឺមានការធ្លាក់ចុះ 50.7% បើធៀបជាមួយនឹងឆ្នាំមុននេះទៅដល់ 184 លានយ៉ន់កាលពីឆ្នាំមុននេះ។
ក្រុមហ៊ុន Meitu បាននិយាយថា ក្រុមហ៊ុនធ្វើការកែតម្រូវទៅលើពាណិជ្ជកម្មដែលមិនរកប្រាក់ចំណេញ និងអាជីវកម្មស្មាតហ្វូនដើម្បីធ្វើការផ្តោតទៅលើវិស័យអ៊ីនធឺណិតវិញ ហើយក្រុមហ៊ុននឹងធ្វើការបង្កើននូវយុទ្ធសាស្រ្តថ្មីក្នុងការវិនិយោគទៅលើផ្នែក “beauty and social” របស់ខ្លួនវិញ។ ស្មាតហ្វូន Meitu ពេលនេះ នឹងធ្វើការអភិវឌ្ឍ ផលិត លក់ និងផ្សព្វផ្សាយតាមរយៈក្រុមហ៊ុនបច្ចេកវិទ្យា Xiaomi ហើយក្រុមហ៊ុន Meitu នឹងធ្វើការបន្តក្នុងការផ្តល់នូវការទ្រទ្រង់សម្រាប់បច្ចេកវិទ្យា imaging technology និង beauty algorithms ផងដែរ។ បន្ថែមពីនេះ ទៀតនោះ Xiaomi ក៏ត្រូវបានអនុញ្ញាតនៅក្នុងការផលិត និងផ្សព្វផ្សាយទៅលើ Smart Hardware ដែលមានម៉ាកយីហោ Meitu ផងដែរ។
Xiaomi ក៏ធ្វើការអធិប្បាយទៅលើការសម្រេចចិត្តមួយនេះ និងបាននិយាយថា ខ្លួនពិតជាជឿជាក់ទៅលើបច្ចេកវិទ្យា image algorithms និង technologies របស់ Meitu ដើម្បីជួយផ្តល់នូវបទពិសោធន៍ថ្មីនៃការប្រើប្រាស់ទៅលើប្រព័ន្ធកាមេរ៉ាកាន់តែអស្ចារ្យថែមទៀតសម្រាប់អ្នកប្រើប្រាស់ស្មាតហ្វូននោះ។ ស្មាតហ្វូនដំបូងបំផុត ដែលធ្វើការផលិត និងធ្វើទីផ្សារដោយ Xiaomi ជាមួយនឹងកាមេរ៉ា Meitu នោះត្រូវគេរំពឹងថា នឹងបង្ហាញខ្លួននៅពាក់កណ្តាលឆ្នាំ 2019 នេះ។ កិច្ចសហប្រតិបត្តិការរវាងក្រុមហ៊ុន Meitu និង Xiaomi ចាប់ផ្តើមធ្វើឡើងនៅក្នុងខែវិច្ឆិកានៅពេលដែលក្រុមហ៊ុនទាំងពីរនេះ ឈានដល់កិច្ចព្រមព្រៀងយុទ្ធសាស្ត្រពិភពលោក ដែលផ្តល់នូវសិទ្ធិផ្តាច់មុខសម្រាប់អាជីវកម្មស្មាតហ្វូន បច្ចេកវិទ្យារូបភាព និង Smart Hardware របស់ក្រុមហ៊ុន Meitu សម្រាប់រយៈពេលដល់ទៅ 30 ឆ្នាំ៕
